ICBI NEWS

રાજ્ય

Dec 13, 2025

SIRની કામગીરીમાં મોતની ઘટનાઓ વચ્ચે એક BLO આવા પણ...:ગળા નીચે મણકાની ગાદી ખસી છતાં કરે છે કામગીરી; કહ્યું- લોકતંત્રને મજબૂત કરવાના કેમ્પેનમાંથી બાકાત નથી રહેવું

શરૂઆતમાં મકરંદ જોશીને કોઈ તકલીફ નહોંતી સુરતના અડાજણ વિસ્તારમાં રહેતા 37 વર્ષીય મકરંદ રાજેશભાઈ જોશી 2013થી નગર પ્રાથમિક શિક્ષણ સમિતિમાં શિક્ષક તરીકે ફરજ બજાવે છે. બે દીકરીના પિતા એવા મકરંદભાઈ હાલ SIR (સ્પેશિયલ ઈન્ટેન્સિવ રિવિઝન)ની કામગીરીમાં BLO (બૂથ લેવલ ઓફિસર) તરીકે કામગીરી કરી રહ્યા છે. કામગીરી શરૂ થઈ ત્યારે તેઓ એકદમ સ્વસ્થ હતાં. જોકે થોડા દિવસોમાં તેમની મણકાની ગાદી ખસી જવાના કારણે તકલીફ શરૂ થઈ હતી. જોકે, લોકશાહીને મજબૂત કરવાની આ કામગીરીમાં પોતાનુ યોગદાન આપી રહ્યા છે.

ગરદનમાં દુખાવો થતાં મેં ડોક્ટર પાસે ચેક કરાવડાવ્યુંઃ મકરંદ જોશી મકરંદ રાજેન્દ્રભાઈ જોશીએ જણાવ્યું હતું કે, અત્યારે SIRમાં બીએલઓ તરીકે હું સુરતમાં 138 ભાગમાં કામ કરી રહ્યો છું. જ્યારે આ કામગીરી શરૂ થઈ એની વચ્ચે જ મને ગરદનમાં દુખાવો ચાલુ થયો, એટલે મેં ડોક્ટર પાસે ચેક કરાવડાવ્યું તો ડોક્ટરે કહ્યું કે, તમારા મણકાની ગાદી ખસી ગઈ છે. એટલે એનો ઇલાજ પણ સાથે-સાથે ચાલુ છે અને કામગીરી પણ સાથે સાથે ચાલુ છે.

‘ઈલાજની સાથે મેં SIRનું કામ પણ કરવાનુ નક્કી કર્યું’ શરૂઆતમાં તો હું થોડો ગભરાઈ ગયો. મને થયું આની માટે ઇલાજ પર આપણે વધુ ધ્યાન આપવું જોઈએ. પણ સાથે-સાથે મને એ પણ ધ્યાનમાં આવ્યું કે, લોકતંત્રને ખૂબ મજબૂત કરવાની આ SIRની પ્રક્રિયા છે. ક્યાંકને ક્યાંક આપણે એનો ભાગ છીએ. આ કામગીરી એટલી ક્લિષ્ટ અને કોમ્પ્લેક્સ છે કે કદાચ મને આમાંથી મુક્ત પણ કરે અને કોઈ નવો વ્યક્તિ પણ આવે તો તેને પણ સમજવામાં-કરવામાં ખૂબ તનાવ થશે. એટલે મને થયું કે, આપણે આ સાથે બંને કામો સાથે જ કરીએ.

‘કામ અને તબિયત બેલેન્સ કરીને બધુ કરૂ છું’ તબિયતનું ધ્યાન રાખવાની સાથે-સાથે કામ કરૂ છું. કામ અને તબિયતને લઈ એ રીતનો પ્રયાસ રહે છે કે, બહું શારીરિક રીતે પણ શ્રમ ન પડે અને શારીરિક અંગોનું પણ હલનચલન થાય. સાથે-સાથે જે આપણા કામો છે, જેમ કે, ફોર્મ્સ લેવાના હોય કે શિફ્ટેડના ફોર્મ હોય, ઓનલાઇન ચઢાવવાના એ બધું કરીએ છીએ.

‘ઘણી વખત ફ્રસ્ટ્રેશનની સ્થિતિ થાય, ધીરજ રાખવી પડે’ જ્યારે અમે ઘરે-ઘરે જઈએ તો ઘણા લોકો આ કામગીરીને બહુ ગંભીરતાથી લેતા નથી. ફોર્મ સમય પર આપતા નથી, જેથી એમના ઘરે જવું પડે, બેસીને ફોર્મ ભરવું પડે અને ખૂબ ધીરજ રાખવી પડે. ફ્રસ્ટ્રેશનની સ્થિતિ થાય કારણ કે, લોકોના એવા રિસ્પોન્સ હોય કે આ આપણું કામ છે, લોકો સુધી જવું જરૂરી છે. એટલે માનસિક રીતે ધીરજ રાખીને પેશન્સ રાખીને કામ કરવું પડે

‘એક વાતાવરણ ઊભું કર્યા બાદ ફોર્મ મળવા લાગ્યા’ મને જ્યારે ધ્યાનમાં આવ્યું કે, ફોર્મ ભરીને આપવાનું જે કામ છે તેને લઈને લોકોમાં ગંભીરતા નથી. તેમને ખ્યાલ નથી કે એમનું નામ મતદાર યાદીમાંથી નીકળી શકે છે. એટલે વ્યક્તિગત ઘરે જઈને પણ જ્યારે રિસ્પોન્સ ન મળ્યો, ત્યારે મને થયું કે આનું એક વાતાવરણ ઊભું કરવું પડશે. સોસાયટીમાં માઈક સ્પીકર લઈને જવું પડશે તો વાતાવરણ બને અને પછી લોકો એકબીજા સાથે વાતો કરીને આના વિશે ચર્ચા કરે તો ફોર્મ મળવા લાગ્યા. જે બાદ સારૂ પરિણામ મળ્યું.

‘મેં કામખથી મુક્ત થવા અધિકારીને ના પાડી’ અમારા અધિકારીને પણ જાણ કરી અને એમનો પણ ખૂબ સારો પ્રતિભાવ હતો. તેઓ પણ મને આ કામગીરીમાંથી જો મુક્ત થવું હોય એ વિષય પણ વિચારતા હતાં. પણ મેં એમને સામેથી જ ના પાડી. કારણ કે, મેં રાત્રે વિચાર કર્યો કે આ એટલી કોમ્પ્લેક્સ કામગીરી છે, તો નવો વ્યક્તિ કઈ રીતે કરશે? અને ક્યાંકને ક્યાંક લોકતંત્રને મજબૂત કરવાનું આ આખું કેમ્પેન છે અને એમાંથી હું બાકાત રહેવા નથી માંગતો.