આ અઠવાડિયે સોનું ₹748 ઘટીને ₹1.21 લાખ પર પહોંચ્યું:ચાંદીના ભાવમાં ₹2,092નો વધારો, ચાંદી ₹1.49 લાખ પ્રતિ કિલો પહોંચી
આ વર્ષે સોનું ₹44,608 અને ચાંદી ₹63,108 મોંઘી થઈ
આ વર્ષે અત્યાર સુધીમાં સોનાના ભાવમાં ₹44,608નો વધારો થયો છે. 31 ડિસેમ્બર, 2024ના રોજ, 24 કેરેટ સોનાના 10 ગ્રામનો ભાવ ₹76,162 હતો, જે હવે વધીને ₹1,20,770 થયો છે. આ દરમિયાન ચાંદીના ભાવમાં પણ ₹63,108નો વધારો થયો છે. 31 ડિસેમ્બર, 2024ના રોજ એક કિલોગ્રામ ચાંદીનો ભાવ ₹86,017 હતો અને હવે તે વધીને ₹1,49,125 પ્રતિ કિલોગ્રામ થયો છે.
સોનું ખરીદતી વખતે આ 2 બાબતોનું ધ્યાન રાખો
1. ફક્ત સર્ટિફાઈડ સોનું જ ખરીદો
હંમેશાં બ્યૂરો ઓફ ઇન્ડિયન સ્ટાન્ડર્ડ્સ (BIS)ના હોલમાર્ક ધરાવતું સર્ટિફાઈડ સોનું જ ખરીદો. સોના પર 6-અંકનો હોલમાર્ક કોડ હોય છે. એને હોલમાર્ક યુનિક આઇડેન્ટિફિકેશન નંબર અથવા HUID કહેવામાં આવે છે. આ નંબર આલ્ફાન્યુમેરિક છે, એટલે કે કંઈક આના જેવો - AZ4524. હોલમાર્કિંગ દ્વારા સોનું કેટલા કેરેટનું છે એ જાણી શકાય છે.
2. કિંમત ક્રોસ ચેક કરો
ખરીદીના દિવસે સોનાનું ચોક્કસ વજન અને એની કિંમત બહુવિધ સ્ત્રોતો (જેમ કે ઇન્ડિયા બુલિયન એન્ડ જ્વેલર્સ એસોસિયેશનની વેબસાઇટ) પરથી તપાસો. સોનાની કિંમત 24 કેરેટ, 22 કેરેટ અને 18 કેરેટ પ્રમાણે બદલાય છે. 24 કેરેટ સોનાને સૌથી શુદ્ધ સોનું માનવામાં આવે છે, પરંતુ એમાંથી ઘરેણાં બનાવવામાં આવતા નથી, કારણ કે એ ખૂબ જ નરમ હોય છે. સામાન્ય રીતે 22 કેરેટ કે તેથી ઓછા કેરેટ સોનાનો ઉપયોગ ઘરેણાં માટે થાય છે.
શહેરોમાં સોનાના ભાવમાં ફેરફાર થવાના 4 કારણો
1. ટ્રાન્સપોર્ટેશન ખર્ચ: સોનું એક ફિઝિકલ વસ્તુ છે, તેથી તેનું પરિવહન મોંઘુ છે. મોટાભાગની આયાત હવાઈ માર્ગે થાય છે. ત્યારબાદ સોનાને આંતરિક ભાગમાં પહોંચાડવું પડે છે. ટ્રાન્સપોર્ટેશન ખર્ચમાં બળતણ, સુરક્ષા, વાહનો, સ્ટાફ અને અન્ય ખર્ચનો સમાવેશ થાય છે.
2. સોનાની ખરીદીનું પ્રમાણ: શહેર અને રાજ્ય પ્રમાણે સોનાની માંગ બદલાય છે. ભારતના કુલ સોનાના વપરાશમાં દક્ષિણ ભારતનો હિસ્સો આશરે 40% છે. અહીં, વેચાણકર્તાઓ જથ્થાબંધ સોનું ખરીદે છે, જેનાથી કિંમતો ઓછી થાય છે. જોકે, ટાયર-2 શહેરોમાં કિંમતો વધુ હોય છે.
3. સ્થાનિક જ્વેલરી એસોસિએશન: જેમ કે તમિલનાડુમાં, સોનાનો ભાવ જ્વેલર્સ અને ડાયમંડ ટ્રેડર્સ એસોસિએશન દ્વારા નક્કી કરવામાં આવે છે. તેવી જ રીતે, દેશભરમાં ઘણા અન્ય એસોસિએશન છે જે ભાવ નક્કી કરે છે.
4. સોનાની ખરીદી કિંમત: વિવિધ શહેરોમાં સોનાના ભાવને અસર કરતું આ સૌથી મોટું પરિબળ છે. જે ઝવેરીઓએ પોતાનો સ્ટોક ઓછી કિંમતે ખરીદ્યો હોય, તેઓ ઓછા દર વસૂલ કરી શકે છે.
Image Gallery
