વર્લ્ડ ચેમ્પિયન ભારતીય પ્લેયર્સની કિંમત ₹22.65 કરોડ:WPL ઓક્શનમાં મંધાનાનો રેકોર્ડ તૂટ્યો નહીં, દીપ્તિ ₹3.20 કરોડ, ચરણી ₹1.30 કરોડમાં સોલ્ડ
વર્લ્ડ ચેમ્પિયન ખેલાડીઓની કિંમત અને તેમનું પર્ફોર્મન્સ...
1. દીપ્તિ શર્મા
3.20 કરોડમાં યુપીમાં સામેલ
વનડે વર્લ્ડ કપમાં પ્લેયર ઓફ ધ ટુર્નામેન્ટ દીપ્તિ શર્માને યુપી વોરિયર્સે ફરીથી પોતાની ટીમમાં સામેલ કરી લીધા. દીપ્તિ 3.20 કરોડ રૂપિયામાં યુપીનો હિસ્સો બની. દીપ્તિએ ICC ટુર્નામેન્ટની 9 મેચોમાં 22 વિકેટ લેવાની સાથે 215 રન પણ બનાવ્યા હતા. તે ટુર્નામેન્ટની ટોપ વિકેટ ટેકર રહી અને ઓલરાઉન્ડ પ્રદર્શનના કારણે પ્લેયર ઓફ ધ ટુર્નામેન્ટ બની.
2. રેણુકા સિંહ
60 લાખમાં ગુજરાતમાં સામેલ
વર્લ્ડ કપમાં ભારત માટે બોલિંગની શરૂઆત કરનાર રેણુકા સિંહને ગુજરાત જાયન્ટ્સે ખરીદી. તે ગત સિઝનમાં રોયલ ચેલેન્જર્સ બેંગલુરુનો ભાગ હી, પરંતુ મેગા ઓક્શનમાં ગુજરાત દ્વારા તેને 60 લાખ રૂપિયામાં ટીમમાં સામેલ કરવામાં આવી. ICC ટુર્નામેન્ટની 6 મેમાં રેણુકા માત્ર 3 વિકેટ જ લઈ શકી હતી, પરંતુ T20માં તે પોતાની સ્વિંગથી બેટર્સને ખરાબ શોટ રમવા મજબૂર કરી દે છે.
3. ક્રાંતિ ગૌર
યુપીએ 50 લાખમાં ટીમમાં સામેલ કરી
રેણુકા સિંહ સાથે બોલિંગની શરૂઆત કરનાર ફાસ્ટ બોલર ક્રાંતિ ગૌર 50 લાખ રૂપિયામાં સોલ્ડ થઈ. તેને યુપી વોરિયર્સે ફરીથી પોતાનો હિસ્સો બનાવી. ICC ટુર્નામેન્ટની 8 મેમાં તેણે 5.73ની ઇકોનોમીથી રન ખર્ચીને 9 વિકેટ લીધી હતી. તે WPLમાં શાનદાર પ્રદર્શન કર્યા પછી જ ટીમ ઇન્ડિયામાં સ્થાન બનાવી શકી હતી.
4. રાધા યાદવ
બેંગલુરુએ 65 લાખમાં ટીમમાં સામેલ કરી
લેફ્ટ આર્મ સ્પિન બોલિંગ ઓલરાઉન્ડર રાધા યાદવને રોયલ ચેલેન્જર્સ બેંગલુરુએ 65 લાખ રૂપિયામાં ટીમમાં સામેલ કરી. તે છેલ્લા 3 સિઝનથી દિલ્હી કેપિટલ્સનો ભાગ હી. ICC ટુર્નામેન્ટની 3 મેમાં રાધાએ 4 વિકેટ લીધી હતી. તેણે છેલ્લી ગ્રુપ સ્ટેજ મેચમાં 3 વિકેટ લઈને ભારતને જીત અપાવી હતી. રાધા વુમન્સ ક્રિકેટની ટોપ ફિલ્ડર પણ છે.
5. શ્રી ચરણી
દિલ્હીએ 1.30 કરોડમાં ટીમમાં સામેલ કરી
વર્લ્ડ કપમાં ભારતની બીજી ટોપ વિકેટ ટેકર લેફ્ટ આર્મ સ્પિનર શ્રી ચારણીને 1.30 કરોડ રૂપિયામાં ફરીથી દિલ્હી કેપિટલ્સે ટીમમાં સામેલ કરી છે. ICC ટુર્નામેન્ટમાં ચરણીએ પોતાની સ્પિનથી વિદેશી બેટર્સને ખૂબ પરેશાન કર્યા હતા. તેના નામે 9 મેચમાં 14 વિકેટ રહી. જેમાં ઓસ્ટ્રેલિયા સામેની મેચમાં 3 વિકેટ સામેલ રહી.
6. અરુંધતી રેડ્ડી
RCBએ 75 લાખમાં ટીમમાં સામેલ કરી
વર્લ્ડ કપ વિજેતા અરુંધતિ રેડ્ડીને 75 લાખ રૂપિયામાં રોયલ ચેલેન્જર્સ બેંગલુરુએ ટીમમાં સામેલ કરી છે. રેડ્ડીને ICC ટુર્નામેન્ટમાં એક પણ મેચ રમવાની તક મળી ન હતી, પરંતુ તેણે સબ્સ્ટિટ્યુટ ફિલ્ડર બનીને કેટલાક મહત્વના કેચ ચોક્કસ પકડ્યા. અરુંધતિ મીડિયમ પેસ બોલિંગ કરવાની સાથે લોઅર ઓર્ડરમાં જરૂર પડ્યે બેટિંગ પણ કરી લે છે.
7. પ્રતિકા રાવલ
50 લાખમાં યુપીએ ટીમમાં લીધી
વર્લ્ડ કપમાં સ્મૃતિ મંધાના સાથે ભારતને મજબૂત શરૂઆત અપાવનાર પ્રતિકા રાવલ ત્રીજા રાઉન્ડમાં સોલ્ડ થઈ. તેનું નામ 12મા સેટની બેટર્સમાં હતું, એક્સલરેટેડ રાઉન્ડમાં તેમનું નામ આવ્યું, પરંતુ તેને કોઈએ લીધી નહીં. પછી છેલ્લા રાઉન્ડમાં તેને 50 લાખ રૂપિયામાં યુપીએ સામેલ કરી. વર્લ્ડ કપમાં ગ્રુપ સ્ટેજ સુધી તેમણે 7 મેચ રમી અને 51થી વધુની સરેરાશથી 308 રન બનાવ્યા. પ્રતિકા 2026માં WPL ડેબ્યૂ કરશે.
8. હરલીન દેઓલ
યુપીએ 50 લાખ રૂપિયામાં સામેલ કરી
મિડલ ઓર્ડર બેટર હરલીન દેઓલ 50 લાખ રૂપિયામાં યુપી વોરિયર્સનો ભાગ બની. વર્લ્ડ કપની 7 મેમાં તેણે 33.80ની સરેરાશથી 169 રન બનાવ્યા હતા. જોકે, ખરાબ સ્ટ્રાઈક રેટને કારણે તે નોકઆઉટ મેચમાંથી બહાર થઈ ગઈ. તે WPLમાં ગુજરાત તરફથી રમી ચૂકી છે, પરંતુ હવે યુપી તરફથી રમતી જોવા મળશે.
9. સ્નેહ રાણા
દિલ્હીએ 50 લાખમાં સામેલ કરી
ઓફ સ્પિન ઓલરાઉન્ડર સ્નેહ રાણાને 50 લાખ રૂપિયામાં દિલ્હી કેપિટલ્સે સામેલ કરી. વર્લ્ડ કપની 6 મેચોમાં સ્નેહે 99 રન બનાવવાની સાથે 7 વિકેટ પણ લીધી. ગ્રુપ સ્ટેજમાં તેની બોલિંગે જ ભારતને ટૂર્નામેન્ટમાં ટકાવી રાખ્યું હતું, પરંતુ છેલ્લી મેચોમાં રાધા યાદવે તેને રિપ્લેસ કરી દીધી. સ્નેહ RCB અને ગુજરાત તરફથી WPL રમી ચૂકી છે, હવે તે ત્રીજી ટીમ તરફથી રમતી જોવા મળશે.
10. ઉમા છેત્રી
ખરીદનાર ન મળ્યો
વિકેટકીપર બેટર ઉમા છેત્રીને WPL ઓક્શનમાં કોઈ ખરીદનાર મળ્યો નહીં. તેની બેઝ પ્રાઈસ 50 લાખ રૂપિયા હતી, પરંતુ કોઈ પણ ટીમે તેને ખરીદવામાં રસ દાખવ્યો નહીં. વર્લ્ડ કપમાં તે એક જ મેચ રમી શકી, પરંતુ તેની બેટિંગ આવી નહીં. તે ભારત માટે 7 ટી-20માં 37 રન બનાવી ચૂકી છે. WPLમાં યુપી તરફથી રમતા તેના નામે 80 રન છે.
11. સ્મૃતિ મંધાના
3.50 કરોડમાં રીટેન
ભારતની વાઇસ કપ્તાન અને ICC ટુર્નામેન્ટમાં ભારતની ટોપ રન સ્કોરર સ્મૃતિ મંધાના ઓક્શનમાં ઉતરી જ નહીં. તેને રોયલ ચેલેન્જર્સ બેંગલુરુએ 3.50 કરોડ રૂપિયામાં રીટેન કરી લીધી હતી. તે પહેલા ઓક્શનમાં 3.40 કરોડ રૂપિયામાં સોલ્ડ થઈ હતી. તેનાથી વધુ બોલી હજુ પણ કોઈ પ્લેયર પર લાગી નથી. વર્લ્ડ કપની 9 મેમાં મંધાનાએ 434 રન બનાવ્યા હતા.
12. હરમનપ્રીત કૌર
2.50 કરોડમાં રિટેન
ભારતની કેપ્ટન હરમનપ્રીત કૌરને મુંબઈ ઈન્ડિયન્સે રિટેન કરી હતી. તે 2.50 કરોડ રૂપિયામાં 2 વખતની ચેમ્પિયન MIનો ભાગ રહી હતી. હરમનની કેપ્ટનશીપમાં જ ભારતે ICC ટુર્નામેન્ટ જીતી હતી. હરમને ટુર્નામેન્ટની 9 મેમાં 32.50ની સરેરાશથી 260 રન બનાવ્યા હતા. આમાં ઓસ્ટ્રેલિયા સામે સેમિફાઇનલમાં 89 રનની મહત્વપૂર્ણ ઇનિંગ પણ સામેલ હતી.
13. જેમિમા રોડ્રિગ્સ
2.20 કરોડમાં રીટેન
ઓસ્ટ્રેલિયા સામે વર્લ્ડ કપ સેમિફાઇનલમાં સદી ફટકારીને ભારતને જીતાડનાર જેમિમા રોડ્રિગ્સને દિલ્હી કેપિટલ્સે રીટેન કરી લીધી. તેને 2.20 કરોડમાં ટીમમાં સામેલ કરી છે. તેણે શરૂઆતની ત્રણેય સિઝન પણ દિલ્હીથી જ રમી હતી. ICC ટુર્નામેન્ટની 8 મેચોમાં તેના નામે 292 રન રહ્યા, જેમાં એક સદી અને એક ફિફ્ટીનો સમાવેશ થાય છે.
14. શેફાલી વર્મા
2.20 કરોડમાં રીટેન
વર્લ્ડ કપ સેમિફાઇનલમાં ઇજાગ્રસ્ત પ્રતિકા રાવલની જગ્યાએ ટીમનો ભાગ રહેલી શેફાલી વર્માને પણ દિલ્હી કેપિટલ્સે 2.20 કરોડ રૂપિયામાં રીટેન કરી. શેફાલી પહેલા ICC ટુર્નામેન્ટના સ્ક્વોડનો ભાગ નહોતી. પ્રતિકાની ઇજાએ તેને ટુર્નામેન્ટ રમવાની તક આપી. શેફાલી સેમિફાઇનલમાં કંઈ ખાસ કરી શકી નહીં, પરંતુ ફાઇનલમાં સાઉથ આફ્રિકા સામે 87 રન બનાવ્યા. એટલું જ નહીં, તેણે બોલિંગથી 2 વિકેટ પણ લીધી. તે સતત ચોથી સીઝન દિલ્હીથી રમશે.
15. રિચા ઘોષ
2.75 કરોડમાં રીટેન
વિકેટકીપર બેટર રિચા ઘોષને રોયલ ચેલેન્જર્સ બેંગલુરુએ 2.75 કરોડ રૂપિયામાં રિટેન કરી. વર્લ્ડ કપની 8 મેમાં તેણે 133.52ના સ્ટ્રાઈક રેટથી 235 રન બનાવ્યા હતા. આમાં સાઉથ આફ્રિકા સામે ગ્રુપ સ્ટેજમાં 94 રનની મહત્વપૂર્ણ ઇનિંગ પણ સામેલ હતી. રિચાએ ટૂર્નામેન્ટમાં 23 ચોગ્ગા અને 12 છગ્ગા ફટકાર્યા હતા.
16. અમનજોત કૌર
1 કરોડમાં રિટેન
ઓલરાઉન્ડર અમનજોત કૌરને મુંબઈ ઈન્ડિયન્સે 1 કરોડ રૂપિયામાં રિટેન કરી. અમનજોતે જ વર્લ્ડ કપ સેમિફાઇનલમાં ઓસ્ટ્રેલિયા સામે વિનિંગ બાઉન્ડ્રી ફટકારી હતી. ટુર્નામેન્ટની 7 મેચોમાં તેણે 146 રન બનાવવાની સાથે 6 વિકેટ પણ લીધી હતી. તે ફિનિશર પોઝિશન પર બેટિંગ કરવાની સાથે નવા બોલથી બોલિંગ પણ કરી શકે છે.
મેન્સ પ્લેયર્સથી હજુ પણ ઘણા પાછળ
WPLમાં સોલ્ડ ભારતીય ખેલાડીઓની કિંમત ભલે 22.65 કરોડ રૂપિયા રહી હોય, પરંતુ મેન્સ ખેલાડીઓની સરખામણીમાં તેમની કિંમત હજુ પણ ઘણી ઓછી છે. IPLના સૌથી મોંઘા ભારતીય ખેલાડી રિષભ પંતની એકલાની કિંમત આના કરતાં વધુ છે. તે ગયા ઓક્શનમાં 27 કરોડ રૂપિયામાં સોલ્ડ થયો હતો. એટલે કે, વર્લ્ડ ચેમ્પિયન 15 ખેલાડીઓ મળીને જેટલું નથી કમાઈ રહ્યા, એકલા પંત તેમના કરતાં 4.35 કરોડ રૂપિયા વધુ કમાઈ રહ્યા છે.
WPLમાં 5 ટીમો રમે છે અને એક ટીમ પાસે 15 કરોડ રૂપિયાનું પર્સ જ હોય છે. 5 ટીમો પાસે કુલ 75 કરોડ રૂપિયાનું પર્સ. બીજી તરફ IPLમાં એક ટીમનું પર્સ જ 120 કરોડ રૂપિયા હોય છે. એટલે કે ટીમો ઈચ્છવા છતાં પણ મહિલા ખેલાડીઓને પુરુષો જેટલો પગાર આપી શકતી નથી.
9 જાન્યુઆરીથી ચોથી સીઝન શરૂ થશે
WPLની ચોથી સિઝન 9 જાન્યુઆરીથી 5 ફેબ્રુઆરી સુધી રમાશે. નવી મુંબઈ અને વડોદરા, 2 સ્થળોએ જ આખી ટુર્નામેન્ટ રમાશે. WPL 2023માં શરૂ થઈ હતી. મુંબઈ ઈન્ડિયન્સે 2 વખત ટાઈટલ જીત્યું, જ્યારે રોયલ ચેલેન્જર્સ બેંગલુરુ 2024માં ચેમ્પિયન બની. દિલ્હી કેપિટલ્સ ત્રણેય વખત રનર-અપ રહી.
