પાકિસ્તાની નેતા બોલ્યા, 'ગુજરાત, હરિયાણા અને રાજસ્થાન અમારાં છે':'અમે એને સાબિત કરી બતાવીશું', રાજનાથ સિંહના સિંધ સંબંધિત નિવેદન પર વાંધો ઉઠાવ્યો
પાકિસ્તાન રાજનાથના નિવેદનને ઉશ્કેરણીજનક ગણાવી ચૂક્યું છે
પાકિસ્તાને સોમવારે રાજનાથના નિવેદન પર વાંધો ઉઠાવતાં એેને ખોટું, ઉશ્કેરણીજનક અને ખતરનાક ગણાવ્યું હતું. પાકિસ્તાને કહ્યું હતું કે આવાં નિવેદનો આંતરરાષ્ટ્રીય કાયદા અને દેશોની નિર્ધારિત સીમાઓ વિરુદ્ધ છે. પાકિસ્તાને માગ કરી કે ભારતના નેતાઓ આવાં નિવેદનોથી બચે, કારણ કે એનાથી ક્ષેત્રમાં તણાવ વધી શકે છે.
પાકિસ્તાને ભારતના આંતરિક મામલાઓ પર નિવેદનબાજી કરતાં કહ્યું હતું કે ભારતે લઘુમતીઓની સુરક્ષા કરવી જોઈએ. જમ્મુ-કાશ્મીરને લઈને પાકિસ્તાને ફરીથી કહ્યું કે આ મુદ્દાને સંયુક્ત રાષ્ટ્રના પ્રસ્તાવો અને કાશ્મીરી લોકોની ઈચ્છા મુજબ ઉકેલવો જોઈએ.
પાકિસ્તાનનું કહેવું છે કે તે ભારત સાથેના તમામ મુદ્દાઓને શાંતિથી ઉકેલવા માગે છે, પરંતુ સાથે જ પોતાના દેશની સુરક્ષા અને સાર્વભૌમત્વની રક્ષા માટે હંમેશાં તૈયાર છે.
સિંધના નેતાએ રાજનાથના નિવેદનનું સ્વાગત કર્યું
જેય સિંધ મુત્તહિદા મહાઝ (JSMM)ના નેતા શફી બુરફતે રાજનાથ સિંહના નિવેદનનું ઉષ્માભર્યું સ્વાગત કર્યું છે. તેમણે લખ્યું કે આ નિવેદન સિંધી લોકો માટે ઐતિહાસિક, હિંમત આપનારું અને પ્રેરણાદાયક છે.
તેમના મતે આ નિવેદન સિંધની આઝાદી અને ભારત સાથે ભવિષ્યમાં મજબૂત સંબંધોની આશા જગાવે છે. તેમણે કહ્યું હતું કે સિંધુદેશ આંદોલન શરૂઆતથી જ આ વિચારને માનતું રહ્યું છે કે સિંધ અને ભારત વચ્ચે ઊંડા સાંસ્કૃતિક, ઐતિહાસિક અને ભાવનાત્મક સંબંધો છે.
બુરફતે પાકિસ્તાન પર આરોપ લગાવ્યો કે તે સિંધી લોકોની ઓળખ, ભાષા અને સંસ્કૃતિને નબળી પાડવાનો પ્રયાસ કરી રહ્યું છે. તેમણે કહ્યું હતું કે પાકિસ્તાનમાં સિંધીઓના રાજકીય અધિકારો છીનવાઈ રહ્યા છે, તેમનાં સંસાધનોનું શોષણ કરવામાં આવી રહ્યું છે અને કાર્યકરો પર અત્યાચાર કરવામાં આવી રહ્યા છે.
હિંદુ-મુસ્લિમોએ સાથે મળીને અલગ સિંધની લડાઈ લડી હતી
1936 સુધી ગુજરાત અને મહારાષ્ટ્ર સાથે સિંધ પણ બોમ્બે પ્રાંતનો ભાગ હતો. એેને અલગ પ્રાંત બનાવવા માટે સિંધના મુસ્લિમો અને હિંદુઓએ સાથે મળીને આંદોલન કર્યું હતું. સિંધમાં રહેતા લોકોનું કહેવું હતું કે મરાઠી અને ગુજરાતીઓના વર્ચસ્વને કારણે તેમના હકો અને પરંપરાઓને અવગણવામાં આવી રહી છે.
1913માં હરચંદ્રાઈ નામના એક હિંદુએ જ સિંધ માટે એક અલગ કોંગ્રેસ એસેમ્બ્લીની માગ કરી હતી. 1936માં સિંધ અલગ પ્રાંત બનતાં જ ત્યાંની રાજકીય આબોહવા બદલાવા લાગી. 1938માં આ જ ભૂમિ પરથી પહેલીવાર અલગ પાકિસ્તાનની માગ ઊઠી.
સિંધની રાજધાની કરાચીમાં યોજાયેલા મુસ્લિમ લીગના વાર્ષિક સત્રમાં મહમદ અલી ઝીણાએ પહેલીવાર સત્તાવાર રીતે મુસ્લિમો માટે અલગ દેશ પાકિસ્તાનની માગ કરી હતી.
1942માં સિંધની વિધાનસભાએ પાકિસ્તાનની માગને લઈને એક પ્રસ્તાવ પસાર કર્યો. આ સમયે સિંધના લોકોને એ વાતની જાણ પણ નહોતી કે ભાગલા તેમને બરબાદી તરફ ધકેલશે.
પ્રસ્તાવનાં માત્ર 5 વર્ષ પછી 1947માં ભારત 2 ટુકડામાં વહેંચાઈ ગયું. બાકીના પાકિસ્તાનની જેમ અહીંથી પણ હિંદુઓને પોતાનું ઘર છોડીને ભારત તરફ પ્રયાણ કરવું પડ્યું.
