બંધ ટ્રકમાં કાર ઘૂસી જતાં યુવકનું મોત, 2 યુવતીને ઈજા:અમદાવાદના SG હાઇવે પરના અંડરબ્રિજમાં વહેલી સવારે અકસ્માત, કિયા કારનો બુકડો
પૂરપાટ આવતા કારચાલકને બંધ પડેલી ટ્રક ન દેખાઈ 8 નવેમ્બરે સવારે 5 વાગ્યે એસ. જી. હાઈવે પરના ગુરુદ્વારા પાસેના અંડરબ્રિજમાં એક આઈસર ટ્રક પસાર થતા સમયે બંધ પડી ગઈ હતી. આ દરમિયાન થલતેજથી ઈસ્કોન તરફ કાળા કલરની કિયા સેલ્ટોસ કાર પૂરઝડપે જઈ રહી હતી. કારની સ્પીડ એટલી હતી કે અંડરબ્રિજમાં બંધ પડેલી આઈસર ટ્રક કારચાલકને દેખાઈ નહીં અને પાછળથી ટક્કર મારી દીધી હતી. ધાડાકાભેડ કાર ટ્રકમાં અથડાવતાં કારચાલક યુવક ગંભીર રીતે ઈજાગ્રસ્ત થયો હતો. જ્યારે તેની સાથે બેઠેલી બે યુવતી પણ ઈજાગ્રસ્ત થઈ હતી.
જોરદાર ટક્કરથી યુવક-યુવતીઓને ઈજા પહોંચી આ અકસ્માત થતાંની સાથે જ આઈસર ટ્રકનો ચાલક ફરાર થઈ ગયો હતો, જ્યારે ઈજાગ્રસ્ત યુવક અને યુવતીઓને સારવાર માટે સોલા સિવિલ હોસ્પિટલ લઈ ગયાં હતાં. ઘટનાની જાણ ટ્રાફિક- પોલીસને થતાં તેઓ તાત્કાલિક ઘટનાસ્થળે આવી પહોચ્યા હતા અને તપાસનો ધમધમાટ શરૂ કર્યો છે.
યુવકનું સારવાર દરમિયાન મોત પોલીસ તપાસમાં સામે આવ્યું કે કારચાલકનું નામ આર્યન બત્રા છે અને તે આંબલી પાસે આવેલા આર્યન ઓપ્યુલ્સન ફ્લેટમાં રહે છે. અકસ્માતના કારણે આર્યનને શરીર પણ ગંભીર ઈજાઓ પહોંચતાં તેનું સારવાર દરમિયાન મોત થયું છે. આર્યનની સાથે તેની બે મહિલા મિત્ર પણ હતી, જેમને શરીર પર ઈજા પહોચતાં હોસ્પિટલમાં દાખલ કરવામાં આવી છે. બન્ને યુવતી નવરંગપુરાના પીજી હોસ્ટેલમાં રહે છે. એસજી 1 ટ્રાફિક-પોલીસે આ મામલે અકસ્માત મોતનો ગુનો નોંધીને તપાસનો ધમધમાટ શરૂ કર્યો છે.
જાન્યુઆરીથી જૂન સુધીમાં 179 લોકોનાં રોડ અકસ્માતમાં મોત જાન્યુઆરીથી માંડી જૂન મહિના સુધીમાં 179 લોકોનાં રોડ અકસ્માતમાં મોત નીપજ્યાં હોવા છતાં પોલીસ શહેરના એક્સિડન્ટ ઝોનની તપાસ નથી કરી શકી. ગંભીર અને સામાન્ય અકસ્માતના આંકડા પર નજર કરીએ તો પહેલા 6 મહિનામા 383 ગંભીર અકસ્માત અને 94 સામાન્ય અકસ્માત પોલીસ ચોપડે નોંધાયા છે.
