એકતરફી પ્રેમમાં પાગલ પ્રેમી યુવતી સામે ભડભડ સળગ્યો,સળગતી હાલતમાં પહેલા માળેથી કૂદ્યો, અમદાવાદમાં વહેલી સવારે મોત
યુવતી સાથે રકઝક થયા બાદ યુવકે પોતાના શરીરે આગ લગાડી અમદાવાદના ફતેવાડી વિસ્તારમાં રહેતી 28 વર્ષની યુવતી ખાનગી હોસ્પિટલમાં નોકરી કરે છે. યુવતીના પાડોશમાં રહેતો કામરાન નામનો યુવક તેને છ મહિનાથી હેરાન કરતો હતો અને એકતરફી પ્રેમમાં પાગલ હતો. ગઈકાલે 27 નવેમ્બરના રોજ રાતે 8:30 વાગ્યે કામરાન હોસ્પિટલ ખાતે પહોંચ્યો હતો અને યુવતી સાથે બોલાચાલી કરી હતી. હોસ્પિટલમાં માથાકૂટ કર્યા બાદ યુવકે તોડફોડ કરી અચાનક જ તેણે પોતાના શરીર ઉપર જાતે જ પેટ્રોલ નાખીને લાઇટરથી આગ લગાવી દીધી હતી. પહેલા માળે આગ લાગતાં અફરાતફરીનો માહોલ સર્જાયો હતો. યુવતી પણ આગ લાગતાં બેભાન થઈ ગઈ હતી.
યુવક સળગતી હાલતમાં જ પહેલા માળેથી નીચે પટકાયો કામરાન આગ લાગેલી સ્થિતિમાં જ પહેલા માળેથી નીચે પડ્યો હતો. નીચે ડેન્ટલ ક્લિનિક હતું, ત્યાં પણ નુકસાન થયું હતું. કામરાન સળગતી હાલતમાં રોડ ઉપર આવી ગયો હતો. આસપાસના લોકોએ આગ બુજાવ્યા બાદ તેને સારવાર માટે 108 દ્વારા સોલા સિવિલ હોસ્પિટલ ખસેડવામાં આવ્યો હતો, જોકે કામરાનનું મોટા ભાગનું શરીર દાઝી ગયું હોવાથી સોલા સિવિલમાં પ્રાથમિક સારવાર બાદ વધુ સારવાર માટે અસારવા સિવિલમાં ખસેડવામાં આવ્યો હતો. અસારવા સિવિલમાં મોડીરાતે કામરાનનું સારવાર દરમિયાન મોત થયું હતું. આ અંગે સરખેજ પોલીસે અકસ્માતે મોતનો ગુનો નોંધી તપાસ શરૂ કરી છે.
યુવકે આગ લગાડ્યા બાદ શું બન્યું એ દૃશ્યો વીડિયોમાં કેદ યુવક આગ લાગ્યા બાદ પહેલા માળેથી નીચે પડ્યો હતો, જે દરમિયાન ત્યાં હાજર લોકોએ તેનો વીડિયો પોતાના મોબાઈલમાં કેદ કર્યો હતો, જેમાં દેખાઈ રહ્યું છે કે યુવક ડેન્ટલ ક્લિનિક પર નીચે પડ્યા બાદ ચાલતો ચાલતો રોડ પર આવી જાય છે અને આજુબાજુના લોકો પાણી, સાલ અને ફાયર એક્સટિંગ્વિશર વડે આગને ઓલવવાનો પ્રયાસ કરી રહ્યા હતા. એ દરમિયાન ફાયર એક્સટિંગ્વિશરથી આગ ઓલવાતાં યુવક ધુમાડાથી ઢંકાયેલો અને પોતાના બળેલા શરીરને વારંવાર જોઈ રહ્યો હતો. એ બાદ લોકોએ તાત્કાલિક 108 એમ્બ્યુલન્સને બોલાવી તેને સારવાર અર્થે ખસેડ્યો હતો.
યુવતીનું નિવેદન નોંધવામાં આવશે: PI એસ.એ ગોહિલ સરખેજ પોલીસ સ્ટેશનના પીઆઇ એસ.એ ગોહિલે જણાવ્યું હતું કે બનાવની જાણ થતાં પોલીસ સ્થળ પર પહોંચી હતી. યુવકનું સારવાર દરમિયાન મોત થયું છે, જેથી એડી નોંધવામાં આવી છે. યુવતી હાલ સારવાર હેઠળ છે અને સ્વસ્થ થયા બાદ તેનું નિવેદન પણ નોંધવામાં આવશે.
