પલંગ પર બેસીને આરામથી કરી ચોરી, બેડરૂમના CCTVમાં કેદ:ભગવાન કૃષ્ણનું ચિત્ર ફાડ્યું, સુરતના ઉદ્યોગપતિના ઘરે ધાડ પાડનારની સ્માર્ટફોને ખોલી પોલ
સુરતના વરાછા વિસ્તારમાં રહેતા જાણીતા ઉદ્યોગપતિના ફ્લેટમાં ગત રાત્રે ચોરીની એક અજીબ ઘટના બની હતી. ચોર જ્યારે ઘરમાં ઘૂસ્યો ત્યારે તેને બિલકુલ અંદાજ નહોતો કે ઘરના ખૂણેખૂણામાં, છેક બેડરૂમ સુધી CCTV કેમેરા લગાવેલા છે. સામાન્ય રીતે સુરક્ષા માટે લોકો હોલ કે ગેલેરીમાં કેમેરા રાખતા હોય છે, પરંતુ અહીં ઉદ્યોગપતિની સતર્કતાએ ચોરની મુશ્કેલી વધારી દીધી હતી.
ચોરે પોતાનું ઘર હોય તેમ પલંગ પર જમાવી બેઠક CCTV ફૂટેજમાં જોવા મળ્યું હતું કે, ચોર જ્યારે બેડરૂમમાં પ્રવેશ્યો ત્યારે તે બિલકુલ ડર્યા વગર, જાણે પોતાના જ મકાનમાં હોય તેમ આરામથી બેડ પર બેસી ગયો હતો. બેડ પર બેસીને તેણે ચોરીના સામાનની ફંફોસણ કરી હતી. તેની આ તમામ હરકતો હાઈ-ડેફિનેશન કેમેરામાં કેદ થઈ ગઈ હતી, જે પાછળથી તેને પકડવા માટે મુખ્ય પુરાવો સાબિત થઈ હતી.
ભગવાન શ્રીકૃષ્ણના સ્કેચનું અપમાન ચોરીની ઘટનાને અંજામ આપતા પહેલા ચોરે એક ગંભીર ભૂલ કરી હતી. તેણે બેડરૂમમાં મુકેલા ભગવાન શ્રીકૃષ્ણના સુંદર સ્કેચને ફાડી નાખ્યું હતું. કદાચ ચોરને એમ હશે કે ભગવાનની તસ્વીર હટાવી દેવાથી તે બચી જશે, પરંતુ તે ભૂલી ગયો કે ટેકનોલોજીના જમાનામાં કેમેરાની નજર તેની દરેક હિલચાલ નોંધી રહી છે. આ કૃત્ય તેના માટે નસીબના દરવાજા બંધ કરનારું સાબિત થયું.
સ્માર્ટફોન ચોરતાં પોલ ખુલી ચોરે ઘરમાંથી રોકડ અને અન્ય કિંમતી વસ્તુઓ સાથે 1 મોબાઈલ ફોનની પણ ચોરી કરી હતી. આ તેની સૌથી મોટી ભૂલ હતી. સ્માર્ટફોન ચોરવો એ પોલીસ માટે લોકેશન ટ્રેક કરવાનું સૌથી સરળ સાધન બની જાય છે. વરાછા પોલીસે આ જ ટેકનોલોજીનો ઉપયોગ કરીને ચોરને ટ્રેક કરવાનું શરૂ કર્યું અને તેને છુપાઈ જવાની તક જ ન આપી.
પોલીસે 3 કલાકમાં આરોપીને દબોચ્યો ઉદ્યોગપતિ કેયુર ખેનીના પરિવારને સવારે 8:00 વાગ્યે ચોરી થઈ હોવાની જાણ થઈ હતી. તેમણે તાત્કાલિક વરાછા પોલીસનો સંપર્ક કર્યો. પોલીસે ઘટનાસ્થળે પહોંચી CCTV ફૂટેજ મેળવ્યા અને મોબાઈલ લોકેશનના આધારે તપાસ તેજ કરી. આશ્ચર્યની વાત એ છે કે સવારે 11:00 વાગ્યા સુધીમાં તો પોલીસે આરોપીને ઝડપી પાડી જેલના સળિયા પાછળ ધકેલી દીધો હતો.
પોલીસે રૂ. 1,40,000 નો મુદ્દામાલ રિકવર કર્યો પોલીસે આરોપી પાસેથી ચોરી કરાયેલો તમામ સામાન, જેમાં મોબાઈલ અને અન્ય કિંમતી વસ્તુઓ સામેલ હતી, તે જપ્ત કરી લીધી છે. આશરે 1,40,000 રૂપિયાની કિંમતનો મુદ્દામાલ પોલીસે સુરક્ષિત રીતે પરત મેળવ્યો છે. આટલી ઝડપી કામગીરીના કારણે ઉદ્યોગપતિના પરિવારમાં રાહત અને પોલીસ પ્રત્યે વિશ્વાસ જોવા મળ્યો હતો.
Image Gallery
