અફઘાન શરણાર્થીએ વ્હાઇટ હાઉસ પાસે ગોળીબાર કર્યો:2 નેશનલ ગાર્ડ્સની હાલત ગંભીર, હુમલાખોરની ધરપકડ; ટ્રમ્પ બોલ્યા, આની ભારે કિંમત ચૂકવવી પડશે
વ્હાઇટ હાઉસની બહાર ગોળીબાર પછીના ડરામણા ફૂટેજ. પોલીસ અને નેશનલ ગાર્ડ ઘટનાસ્થળે પહોંચ્યા.
ટ્રમ્પ બોલ્યા, આ માનવતા વિરુદ્ધનો ગુનો છે
અમેરિકી જસ્ટિસ ડિપાર્ટમેન્ટ આ મામલાને આતંકવાદી હુમલા તરીકે તપાસી રહ્યું છે. હુમલા પછી રાષ્ટ્રપતિ ટ્રમ્પે પેન્ટાગોનને નિર્દેશ આપ્યો કે વોશિંગ્ટન DCમાં સુરક્ષા વધારવા માટે 500 વધારાના નેશનલ ગાર્ડ્સ મોકલવામાં આવે. ટ્રમ્પે કહ્યું કે આરોપી એની ભારે કિંમત ચૂકવશે.
APના સમાચાર મુજબ, એક અધિકારીએ નામ ન છાપવાની શરતે જણાવ્યું કે એક ગાર્ડને માથામાં ગોળી વાગી છે. રાષ્ટ્રપતિ ટ્રમ્પે શંકાસ્પદને જાનવર કહ્યો છે. તેમણે કહ્યું હતું કે તે એની ખૂબ મોટી કિંમત ચૂકવશે.
ટ્રમ્પે ટ્રુથ પર લખ્યું- અમારા મહાન નેશનલ ગાર્ડ અને સુરક્ષા દળો પર ગર્વ છે. હું અને મારી આખી ટીમ તેમની સાથે છીએ. આ સમગ્ર રાષ્ટ્ર વિરુદ્ધનો અપરાધ છે. આ માનવતા વિરુદ્ધનો અપરાધ છે.
હજુ સુધી આરોપીનો હેતુ સ્પષ્ટ નથી
રિપોર્ટ અનુસાર, લાકનવાલ ઓપરેશન એલાઇઝ વેલકમ પ્રોગ્રામ હેઠળ અમેરિકા આવ્યો હતો. તેને વોશિંગ્ટનના બેલિંગહામમાં વસાવવામાં આવ્યો હતો. પોલીસનું કહેવું છે કે લખનવાલે એકલા હાથે આ હુમલો કર્યો હતો અને અત્યારસુધી તેનો હેતુ સ્પષ્ટ નથી.
NBC અને વોશિંગ્ટન પોસ્ટનું કહેવું છે કે FBI આ મામલાની આતંકવાદી હુમલા તરીકે તપાસ કરી રહી છે. ટ્રમ્પે પૂર્વ રાષ્ટ્રપતિ જો બાઈડનની ટીકા કરતા દાવો કર્યો હતો કે શંકાસ્પદને બાઈડન પ્રશાસનના સમયમાં અમેરિકા લાવવામાં આવ્યો હતો.
નેશનલ ગાર્ડની તહેનાતી પહેલાંથી જ વિવાદમાં
વોશિંગ્ટન ડીસીમાં નેશનલ ગાર્ડની તહેનાતી છેલ્લા કેટલાક મહિનાઓથી વિવાદનો વિષય રહી છે. ટ્રમ્પ પ્રશાસને વધતા અપરાધનો હવાલો આપીને ઓગસ્ટમાં આદેશ જાહેર કરીને ડીસી પોલીસને ફેડરલાઇઝ કરતાં 8 રાજ્ય અને કોલંબિયામાંથી નેશનલ ગાર્ડ બોલાવ્યા હતા, જોકે આદેશ એક મહિના પછી સમાપ્ત થઈ ગયો હતો, પરંતુ સૈનિકો તહેનાત રહ્યા.
વળી, ગયા અઠવાડિયે એક ફેડરલ જજે વોશિંગ્ટન ડીસીમાં નેશનલ ગાર્ડની તહેનાતી સમાપ્ત કરવાનો આદેશ આપ્યો હતો, પરંતુ અપીલની સંભાવના જોતાં આદેશને 21 દિવસ માટે રોકી દેવામાં આવ્યો. આ દરમિયાન ફાયરિંગની આ ઘટના સામે આવી.
6 ઓગસ્ટ: અમેરિકામાં જ્યોર્જિયા રાજ્યના મિલિટરી બેઝ પર હુમલો થયો હતો
6 ઓગસ્ટે અમેરિકાના જ્યોર્જિયા રાજ્યમાં ફોર્ટ સ્ટીવર્ટ મિલિટરી બેઝ પર એક હુમલાખોરે ગોળીબાર કર્યો હતો, જેમાં પાંચ સૈનિક ઘાયલ થયા હતા. હુમલા બાદ મિલિટરી બેઝના કેટલાક ભાગોને સીલ કરી દેવામાં આવ્યા હતા.
તમામ ઘાયલ સૈનિકોની ઘટનાસ્થળે જ તાત્કાલિક સારવાર કરવામાં આવી હતી અને બાદમાં તેમને વધુ સારવાર માટે વિન આર્મી કોમ્યુનિટી હોસ્પિટલમાં લઈ જવામાં આવ્યા હતા. હુમલાખોર પણ પકડાઈ ગયો હતો. મીડિયા રિપોર્ટ્સ અનુસાર, તે પણ સૈનિક જ હતો.
વ્હાઇટ હાઉસનાં પ્રવક્તા કેરોલિન લેવિટે X પર લખ્યું હતું કે સરકાર પરિસ્થિતિ પર નજર રાખી રહી છે. જ્યોર્જિયામાં ત્રણ શાળામાં પણ લોકડાઉન લગાવી દેવામાં આવ્યું છે.
Image Gallery
