બિહારમાં નીતિશ કુમારે 10મી વખત CM પદના શપથ લીધા:PM-શાહ પણ હાજર, ચિરાગ માંઝી-નડ્ડાને પગે લાગ્યા
PM મોદી શપથ ગ્રહણ સમારોહમાં પહોંચ્યા
નીતિશ કુમારે CM પદના શપથ લીધા છે. નીતિશ કુમાર 10મી વખત બિહારના મુખ્યમંત્રી બન્યા છે.
બિહારમાં નીતિશ કુમારના નેતૃત્વ હેઠળની નવી સરકારના શપથ ગ્રહણ સમારોહમાં હાજરી આપવા માટે વડાપ્રધાન નરેન્દ્ર મોદી ગાંધી મેદાન પહોંચ્યા છે. પીએમ મોદી પટના એરપોર્ટથી હેલિકોપ્ટર દ્વારા ગાંધી મેદાન પહોંચ્યા હતા.
હરિયાણા, આસામ, ગુજરાત, મેઘાલય, ઉત્તર પ્રદેશ, નાગાલેન્ડ, ઓડિશા, દિલ્હી અને રાજસ્થાનના મુખ્યમંત્રીઓ પટના પહોંચ્યા છે. સવારે શપથ પહેલા નીતિશ કુમાર હોટેલ મૌર્ય ગયા હતા, અહીં તેઓ કેન્દ્રીય ગૃહમંત્રી અમિત શાહ સાથે મુલાકાત કર્યા બાદ ગાંધી મેદાન પહોંચ્યા હતા.
સમ્રાટ ચૌધરી અને વિજય કુમાર સિંહા ડેપ્યુટી CM પદના શપથ લેશે. કુલ 18 મંત્રીઓ શપથ લે તેવી અપેક્ષા છે. જેમાં મુખ્યમંત્રી, જેડીયુના સાત, ભાજપના આઠ અને એલજેપી (આર), આરએલએસપી અને એચએએમના એક-એક મંત્રીનો સમાવેશ થાય છે.
સમારોહ સવારે 11 વાગ્યે શરૂ થયો. કેન્દ્રીય ગૃહમંત્રી અમિત શાહ અને સંરક્ષણમંત્રી રાજનાથ સિંહ સહિત ભાજપના અનેક વરિષ્ઠ નેતાઓ હાજર છે. ગુજરાતના મુખ્યમંત્રી ભૂપેન્દ્ર પટેલ પણ હાજર છે. ગાંધી મેદાનની સુરક્ષા SPGના હાથમાં છે.
આજે એટલે કે (20 નવેમ્બર, 2025) ગુરુવારે નીતિશ કુમાર 10મી વખત મુખ્યમંત્રી બનીને એક નવો રેકોર્ડ બનાવશે. તેમના નામે 9મી વખત મુખ્યમંત્રી બનવાનો રેકોર્ડ પણ છે. તમિલનાડુના ભૂતપૂર્વ મુખ્યમંત્રી જયલલિતા અને હિમાચલ પ્રદેશના ભૂતપૂર્વ મુખ્યમંત્રી વીરભદ્ર સિંહે સૌથી વધુ 6 વખત મુખ્યમંત્રી તરીકે શપથ લીધા હતા.
ધારાસભ્યોને ફોન આવ્યો
જેડીયુ ક્વોટામાંથી મંત્રી પદની નિમણૂકો મેળવવા માંગતા ધારાસભ્યોને ફોન કોલ કરવામાં આવ્યા છે. પાર્ટીના વરિષ્ઠ નેતાઓ અને મુખ્યમંત્રીના નજીકના સહયોગીઓ, વિજય ચૌધરી, લેસી સિંહ, શ્રવણ કુમાર, જામા ખાન, અશોક ચૌધરી અને બિજેન્દ્ર યાદવને ફોન કરવામાં આવ્યો છે.
દાનાપુરમાં બાહુબલીને હરાવનારા ભાજપના રામકૃપાલ યાદવ અને જમુઈના ધારાસભ્ય શ્રેયસી સિંહને ફોન આવ્યો છે. બંને મંત્રી બનવાનું લગભગ નક્કી છે. ઉપેન્દ્ર કુશવાહાના પુત્ર દીપક પ્રકાશનું નામ પણ નક્કી થયું છે. વિધાનસભાના સ્પીકરનું પદ ભાજપ પાસે ગયું છે. ડૉ. પ્રેમ કુમાર સ્પીકર રહેશે.
