'પ્રાઇવેટ પાર્ટમાં રોડ નાખવાની ધમકી, પરપુરુષ સાથે સંબંધ બાંધવાનું દબાણ':બોલિવૂડ એક્ટ્રેસ સેલિના જેટલીએ વર્ષો સુધી પતિનો ત્રાસ સહન કર્યો
પતિ પીટર પર સેલિના દ્વારા લગાવવામાં આવેલા 15 ગંભીર આરોપો...
પ્રાઈવેટ પાર્ટમાં સળિયો નાખવાની ધમકી- સેલિના અને પીટરે 2010માં લગ્ન કર્યાં હતાં. વર્ષ 2012માં દિલ્હીમાં થયેલા નિર્ભયાકાંડ પછી જ્યારે પણ પીટર અને સેલિના વચ્ચે ઝઘડો થતો ત્યારે તે પ્રાઈવેટ પાર્ટમાં સળિયો (રોડ) નાખવાની ધમકી આપતો.
અપ્રાકૃતિક યૌન સંબંધ બાંધવાનું દબાણ- સેલિનાનો આરોપ છે કે પીટર તેને દરરોજ તેના સ્ટડી રૂમમાં બોલાવતો અને તેને પોતાની શરતો પર અપ્રાકૃતિક યૌન ગતિવિધિઓમાં સામેલ થવા માટે મજબૂર કરતો હતો.
કંપનીના બોર્ડ ડિરેક્ટર્સ સાથે સંબંધ બાંધવાનું દબાણ- અરજીમાં જણાવાયું છે કે પીટરે 2014ના અંત અને 2015ની શરૂઆત વચ્ચે વર્કપ્લેસ પર પોતાની સ્થિતિ સુધારવા માટે સેલિનાને કંપનીના બોર્ડ ડિરેક્ટર્સમાંથી એકસાથે ફિઝિકલ રિલેશન બનાવવાની સલાહ આપી હતી.
નિર્વસ્ત્ર ફોટો પાડ્યા, પછી બ્લેકમેલ કર્યું- સેલિનાએ દાવો કર્યો કે પતિ પીટરે પહેલા તેના નિર્વસ્ત્ર અને વાંધાજનક ફોટો પાડ્યા અને પછી તેના દ્વારા બ્લેકમેલ કર્યું. પિટર આ તસવીરો દ્વારા ધમકી આપતો હતો કે જો તેની સેક્સ્યૂઅલ માગણીઓ પૂરી નહીં થાય તો તે ફોટો લીક કરી દેશે.
જોડિયા બાળકોનાં જન્મનાં ત્રણ અઠવાડિયાં પછી ઘરમાંથી કાઢી મૂકી- પોતાની ફરિયાદમાં એક્ટ્રેસે એક ઘટનાનો ઉલ્લેખ કરતાં જણાવ્યું હતું કે પ્રેગ્નન્સી પછી જ્યારે તેણે પીટર પાસેથી પેટરનલ લીવ લઈને બાળકોની સંભાળ રાખવામાં મદદ માગી, ત્યારે પીટરે તેને હાથ પકડીને ઘરમાંથી બહાર કાઢી મૂકી હતી. આ ઘટના સમયે તેનાં જોડિયા બાળકોના જન્મના માત્ર ત્રણ અઠવાડિયાં જ થયાં હતાં.
પિરિયડ્સ દરમિયાન મદદ માગવા પર દારૂનો ગ્લાસ દીવાલ પર માર્યો- ફરિયાદમાં સેલિનાએ બંને વચ્ચે પહેલીવાર થયેલા ઝઘડાનો પણ ઉલ્લેખ કર્યો છે. હનીમૂનથી પાછા ફર્યા પછી સેલિના પિરિયડ્સના દુખાવાથી પરેશાન હતી. ડૉકટરોને બતાવવાની નોબત આવી ગઈ હતી. જ્યારે તેણે પતિને ડૉક્ટર પાસે લઈ જવા કહ્યું, ત્યારે તે ભડકી ગયો. પછી બૂમો પાડતા દારૂનો ગ્લાસ દીવાલ પર મારી દીધો.
આ ઉપરાંત સેલિનાએ અરજીમાં જે આરોપો લગાવ્યા છે એ આ પ્રમાણે છે…
- નોકરાણી કહીને બોલાવવું.
- બાળકોથી અલગ કરવું.
- બાળકોની સામે ગાળો આપવી.
- સેલિનાના મુંબઈના ઘરની માલિકી ટ્રાન્સફર કરવાની માગ.
- સેલિનાનાં તમામ ક્રેડિટ અને ડેબિટ કાર્ડ પર નિયંત્રણ રાખવું.
- સેલિના અને તેના પરિવાર પાસેથી મોંઘી ભેટોની માગ.
- સેલિનાના ઘરેથી મળતા ભાડાને પોતાના ખાતામાં ટ્રાન્સફર કરાવવાની માગ, લિવ-ઇનમાં રહ્યા પછી પણ સેલિના સાથેના સંબંધ માટે પોતાને સિંગલ ગણાવ્યો.
'જીવને મારી પાસેથી બધું જ છીનવી લીધું'
સેલિના જેટલીએ પોતાના છૂટાછેડા વિશે ખૂલીને વાત કરી. તેણે સોશિયલ મીડિયા પર એક પોસ્ટ કરીને લખ્યું, 'હિંમત, છૂટાછેડા. મારા જીવનના સૌથી મુશ્કેલ, સૌથી તોફાની સમયગાળા વચ્ચે, મેં ક્યારેય વિચાર્યું નહોતું કે મારે આ લડાઈ એકલા લડવી પડશે. માતા-પિતા વિના, કોઈ સપોર્ટ સિસ્ટમ વિના. મેં ક્યારેય વિચાર્યું નહોતું કે એક દિવસ એવો પણ આવશે, જ્યારે મારી દુનિયાની છતને ટેકો આપનારા બધા સ્તંભો, મારાં માતા-પિતા, મારો ભાઈ, મારાં બાળકો અને તે વ્યક્તિ જેણે મને વચન આપ્યું હતું કે તે મારી સાથે ઊભી રહેશે, મને પ્રેમ કરશે, મારી સંભાળ રાખશે અને દરેક મુશ્કેલીમાં મારી સાથે રહેશે, તે બધાં ગાયબ થઈ ગયાં.'
એક્ટ્રેસે આગળ લખ્યું, 'જીવને મારી પાસેથી બધું છીનવી લીધું. જે લોકો પર મેં ભરોસો કર્યો તેઓ દૂર ચાલ્યા ગયા. જે વચનો પર મેં વિશ્વાસ કર્યો એ ચૂપચાપ તૂટી ગયા, પરંતુ આ તોફાને મને ડુબાડી નહીં, તેણે મને જન્મ આપ્યો. તેણે મને તેજ મોજાંથી ઉછાળીને ગરમ રેતી પર પહોંચાડી દીધી. તેણે મને તે સ્ત્રી સાથે મળાવી, જે મારી અંદર રહે છે અને ક્યારેય હાર માનતી નથી, કારણ કે હું એક સૈનિકની દીકરી છું, હિંમત, શિસ્ત, દૃઢતા, સહનશક્તિ, આગ અને વિશ્વાસ પર ઊછરેલી.''
'હું દરેક તોફાનનો સામનો કરીશ'
અંતે એક્ટ્રેસે લખ્યું, 'મને શીખવવામાં આવ્યું છે કે દુનિયા મને નીચે પાડવાનો પ્રયાસ કરે તોપણ હું ઊભી થઈ જાઉં. દિલ તૂટી રહ્યું હોય, ત્યારે પણ લડતા શીખું. જ્યારે મારી સાથે અન્યાય થાય ત્યારે દયા ન બતાવું અને ત્યારે પણ જીવું, જ્યારે જીવવું અશક્ય લાગે. મારી પ્રાથમિકતા છે, મારા સૈનિક ભાઈ માટે લડવું, મારાં બાળકોના પ્રેમ માટે લડવું, મારી ગરિમા માટે લડવું. મારી સાથે થયેલી દરેક ક્રૂરતા અને ત્યાગ વિરુદ્ધ ઘરેલુ હિંસાની ફરિયાદ નોંધાવવામાં આવી છે. મારા સૌથી અંધકારમય સમયમાં કાનૂની શક્તિ ‘કરંજાવાલા એન્ડ કંપની’ એ કવચ બની જેની મને મારા અધિકારો અને સન્માનની લડાઈમાં જરૂર હતી. તેમની અડગ સમજણ અને સુરક્ષા માટે હું અત્યંત આભારી છું.'
એક્ટ્રેસે પોસ્ટમાં એ પણ કહ્યું છે કે તેમનો મામલો કોર્ટમાં છે, તેથી તેઓ તેના પર કોઈ ટિપ્પણી કરશે નહીં. આ સાથે તેમણે લખ્યું, 'આ વર્ષ મને તોડશે નહીં. આ એ વર્ષ હશે, જેમાં હું તોફાનથી પણ ઊંચે ઊઠીશ. આ એ વર્ષ હશે, જેમાં હું દરેક એ વસ્તુ પાછી મેળવીશ, જે મારાથી છીનવી લેવામાં આવી હતી.'
2010માં ઓસ્ટ્રિયાના બિઝનેસમેન સાથે લગ્ન કર્યા હતા
નોંધનીય છે કે સેલિનાએ પીટર હાગ સાથે વર્ષ 2010માં ઓસ્ટ્રિયામાં લગ્ન કર્યા હતા. બંનેને ત્રણ બાળક- વિન્સ્ટન, વિરાજ અને આર્થર છે. 2012ના માર્ચમાં આ કપલ જોડિયા દીકરાનાં માતા-પિતા બન્યાં હતાં.
પછી 2017માં એક્ટ્રેસે જોડિયા દીકરાઓને જન્મ આપ્યો, જેમાંથી એકનું હાઇપોપ્લાસ્ટિક હાર્ટ કન્ડિશનના કારણે મૃત્યુ થયું.
2001માં 'મિસ ઇન્ડિયા' બની
વર્કફ્રન્ટની વાત કરીએ તો... સેલિનાએ 'નો એન્ટ્રી', 'અપના સપના મની મની', 'મની હૈ તો હની હૈ', 'ગોલમાલ રિટર્ન્સ' અને 'થેન્ક યુ' જેવી ફિલ્મોમાં કામ કર્યું છે.
Image Gallery
