કોમનવેલ્થ ગેમ્સ પહેલાં મોદી સ્ટેડિયમ પાસે ડિમોલિશન:પોલીસ-બંદોબસ્ત વચ્ચે મોટેરા આસપાસનાં મકાનો તોડવાનું શરૂ, બળદેવનગરનાં 15 ઘર તોડી પડાયાં
24 મીટર પહોળાઈનો ટીપી રસ્તો ખુલ્લો કરવામાં આવશે સાબરમતી વિસ્તારમાંથી પસાર થતા 24 મીટર પહોળાઈનો ટીપી રસ્તો ખુલ્લો કરવામાં આવશે. આ ટીપી રોડ નરેન્દ્ર મોદી સ્ટેડિયમ પાસે કોમનવેલ્થ ગેમ્સ માટે બનનારા એકવાટિક સ્ટેડિયમ નજીક ખૂલશે. આ રોડ પરથી સીધા એક્વેટિક સ્ટેડિયમ તરફ જઈ શકાશે, જેથી આ રોડને ખુલ્લો કરવો જરૂરી હોવાથી મ્યુનિસિપલ કોર્પોરેશનના એસ્ટેટ વિભાગ દ્વારા રહેણાક તથા કોમર્શિયલ પ્રકારનાં મળી કુલ 29 જેટલાં દબાણો દૂર કરવાની કામગીરી શરૂ કરી છે.
મોદી સ્ટેડિયમ પાછળ કરોડોના ખર્ચે નવું SVP એન્કલેવ બનાવાશે આગામી કોમનવેલ્થ ગેમ્સને લઈને અમદાવાદ શહેરને સ્પોર્ટ્સ સિટી બનાવવાની તૈયારીઓ શરૂ કરી દેવામાં આવી છે. મોટેરાના નરેન્દ્ર મોદી સ્ટેડિયમની પાછળ કરોડો રૂપિયાના ખર્ચે નવું SVP એન્કલેવ બનાવવાનું છે, ત્યારે આજુબાજુના વિસ્તારને પણ ડેવલપ કરવાની કામગીરી શરૂ થઈ ગઈ છે. નરેન્દ્ર મોદી સ્ટેડિયમ પાસે આવેલા બળદેવનગર પાસેથી ટીપી રોડ ખોલવાની કામગીરી મ્યુનિસિપલ કોર્પોરેશનના પશ્ચિમ ઝોન દ્વારા કરવામાં આવી છે. અચેર ડેપોથી ટીપી રોડ સીધો ટોરેન્ટ પાવર પાસે ખૂલે છે. ટીપી રોડમાં સાબરમતી બળદેવનગર વિસ્તાર અને સુભાષનગર વિસ્તારનાં કેટલાંક મકાનનો સમાવેશ થાય છે.
સાંજ સુધીમાં તમામ 29 મકાન તોડી પડાશે મ્યુનિસિપલ કોર્પોરેશનના પશ્ચિમ ઝોનના એસ્ટેટ વિભાગ દ્વારા સ્ટાફ સાથે આજે (29 નવેમ્બર) વહેલી સવારથી 4 હિટાચી મશીન, બે જેસીબી અને મજૂરો સાથે ડિમોલિશનની શરૂ કરવામાં આવ્યું હતું. વહેલી સવારે જે પણ રહીશો હતા તે તમામ રહીશોનાં મકાનો ખાલી કરાવી દેવામાં આવ્યાં હતાં. મકાનો ખાલી કરાવ્યાં બાદ એસ્ટેટ વિભાગ દ્વારા ડિમોલિશન શરૂ કરવામાં આવ્યું હતું. સવારથી 15 જેટલાં મકાનો મ્યુનિસિપલ કોર્પોરેશન દ્વારા ડિમોલિશન કરી દેવામાં આવ્યાં છે. આજે સાંજ સુધીમાં તમામ 29 મકાનો તોડી પાડવામાં આવશે.
મામલો હાઇકોર્ટમાં જતાં ડિમોલિશન અટકી પડ્યું હતું મ્યુનિસિપલ કોર્પોરેશનના એસ્ટેટ વિભાગ દ્વારા ટીપી રોડ પર આવતા અચેર વિસ્તારના સુભાષનગરનાં મકાનોનું ડિમોલિશન પહેલા કરી દેવામાં આવ્યું હતું, જેથી એ ભાગ ખુલ્લો થઈ ગયો હતો, પરંતુ એકમાત્ર મોટેરાના બળદેવનગરનાં આ મકાનો તોડવામાં આવ્યાં નહોતાં. રહીશો ગુજરાત હાઇકોર્ટમાં ગયા હતા, જેના કારણે ડિમોલિશન થયું નહોતું.
હાઇકોર્ટ ડબલ જજની બેન્ચ સમક્ષ સુનાવણી થાય એ પહેલાં જ ડિમોલિશન ગત 28 નવેમ્બર, 2025ના રોજ ગુજરાત હાઈકોર્ટમાં સિંગલ જજ દ્વારા અમદાવાદના સાબરમતીમાં આવેલા અચેર ગામના બળદેવનગર વિસ્તારમાં રહેતા 29 રહેવાસી દ્વારા દાખલ કરેલી અરજીઓને નકારી દેવાઈ હતી, સાથે જ સિંગલ જજે પોતાના ચુકાદા ઉપર બે સપ્તાહનો સ્ટે મૂક્યો હતો, જે પૂર્ણતાના આરે છે, ત્યારે રહેવાસીઓએ સિંગલ જજના ચુકાદાને ડબલ જજની બેન્ચ સમક્ષ પડકારતાં તાત્કાલિક સુનવણીની માગ કરી છે. તેમણે કહ્યું હતું કે તેમના રહેણાક મકાન કોર્પોરેશન તોડી શકે એમ છે. ત્યારે હાઇકોર્ટે આ મુદ્દે સોમવારે(1 ડિસેમ્બરે) સુનાવણી રાખી છે.
24 નવેમ્બરે ઈસનપુર તળાવમાં મેગા ડિમોલિશન, 900 દબાણ હટાવ્યા 24 નવેમ્બરના રોજ ચંડોળા તળાવ બાદ સૌથી મોટું મેગા ડિમોલિશન શહેરના પૂર્વ વિસ્તારમાં આવેલા ઈસનપુર તળાવમાં કરવામાં આવ્યું હતું. ઈસનપુર તળાવમાં છેલ્લાં અનેક વર્ષોથી દબાણો કરવામાં આવ્યાં હતાં. ચંડોળા તળાવની જેમ જ ઈસનપુર તળાવમાં 1,000થી વધારે લોકો રહેતા હતા. આ તમામ દબાણોને દૂર કરવા માટેની કાર્યવાહી કરાઈ હતી. 20 JCB મશીન, 500 મ્યુનિસિપલ કોર્પોરેશનના કર્મચારીઓ અને મજૂરોએ ચુસ્ત પોલીસ-બંદોબસ્ત વચ્ચે ડિમોલિશનની કાર્યવાહી હાથ ધરી હતી.
ડિમોલિશન અંગે સુપ્રીમ કોર્ટે શું કહ્યું હતું? 6 નવેમ્બર, 2024ના રોજ સુપ્રીમ કોર્ટે ઉત્તરપ્રદેશ સરકારની કામગીરીને ‘ગેરકાયદે’ જણાવીને કહ્યું હતું કે કોઈપણ ડિમોલિશનની કામગીરી પ્રક્રિયા અનુસાર કરવામાં આવવી જોઈએ અને પરિવારને એ મિલકત ખાલી કરવા માટે પૂરતો સમય આપવો જરૂરી છે.
કોર્ટે ઉત્તરપ્રદેશ સરકારને દરેક અસરગ્રસ્ત પરિવારને રૂ. 25 લાખ દંડ પેટે ચૂકવવા માટે આદેશ આપ્યો હતો, જે આ પ્રકારના ડિમોલિશન માટે કાયદેસરની સત્તા ન હોવાને હાઇલાઇટ કરે છે.
ડિમોલિશન અંગે સુપ્રીમ કોર્ટની ગાઇડલાઇન
- કોઈપણ સંપત્તિનું ડિમોલિશન કરતાં પહેલાં નોટિસ આપવી જોઈએ.
- કોઈપણ પગલાં લેતાં પહેલાં અસરગ્રસ્ત વ્યક્તિઓને ઓછામાં ઓછા 15 દિવસનો સમય આપવો જોઈએ.
સુપ્રીમ કોર્ટેના ચુકાદા સામે ઉત્તરપ્રદેશ સરકારે દલીલ કરી હતી કે આવાં ડિમોલિશન ગુનાખોરીને રોકવા અને કાયદો-વ્યવસ્થાને જાળવવા માટે જરૂરી છે, જોકે કોર્ટે સ્પષ્ટ કર્યું કે સરકાર ન્યાયિક ભૂમિકા ભજવી શકતી નથી અને ગેરકાયદે રીતે સંપત્તિ ડિમોલિશન કરીને વ્યક્તિઓને દંડિત કરી શકતી નથી.
Image Gallery
