અમદાવાદના SG હાઈ-વે પર હિટ એન્ડ રન:કારચાલકે બે હોમગાર્ડને ઉડાવ્યા, એક ગંભીર; નશામાં આગળ અન્ય 3 લોકોને અડફેટે લીધાની ચર્ચા
બુમાબુમ થતાં અન્ય પોલીસકર્મીઓ દોડી આવ્યાં સરખેજ પોલીસ સ્ટેશનમાં ફરજ બજાવતા હોમગાર્ડ જવાન મંજૂરહુસેન અને તનવીર શેખ બાઈક પર સરખેજ પોલીસ સ્ટેશનની ફરજ પર જઈ રહ્યા હતાં. આ સમયે રાજપથ રંગોલી રોડ પર પૂરઝડપે એસ. પી. રિંગ રોડ તરફથી આવી રહેલી કારે પાછળથી તેઓની બાઈકને ટક્કર મારી હતી. આ અકસ્માતમાં બાઇકચાલક હોમગાર્ડ જવાન મંજૂરહુસેન અને તનવીર શેખ નીચે પડ્યા હતા. બુમાબુમ કરતા નજીકના પોઇન્ટ પર ઊભેલા પોલીસકર્મીઓ દોડી આવ્યા હતા અને બંને હોમગાર્ડને 108 દ્વારા સારવાર માટે ખાનગી હોસ્પિટલમાં ખસેડયા હતા.
કારચાલક નશામાં હોવાની શંકા અકસ્માતમાં તનવીર શેખને ગંભીર ઇજા પહોંચી છે, જેની ખાનગી હોસ્પિટલમાં સારવાર ચાલી રહી છે. સ્થાનિકોના જણાવ્યા અનુસાર, અકસ્માત કરનાર કારચાલક નશાની હાલતમાં હતો, જે રસ્તામાં 3 શ્રમિકને અડફેટે લઈને આવ્યો હતો. જે બાદ બીજો અકસ્માત સર્જ્યો હતો. સરખેજ પોલીસે અકસ્માત કરનાર કારચાલક સામે ગુનો નોંધી તપાસ શરૂ કરી છે.
8 નવેમ્બરઃ સવારે SG હાઈવે પરના ગુરુદ્વારા પાસેના અંડરબ્રિજમાં ટ્રક-કારનો અકસ્માત, યુવકનું મોત
8 નવેમ્બરના સવારે 5 વાગ્યે થલતેજ અંડરબ્રિજમાં બંધ પડેલી આઈસર ટ્રકની પાછળ પૂરપાટ ઝડપે આવતી કાર ઘૂસી જતાં કારચાલક યુવકનું મોત નીપજ્યું હતું. જ્યારે કારમાં સવાર અન્ય બે યુવતીને પણ સામાન્ય ઈજા પહોંચી હતી. આ કારમાં કિયા કારના આગળના ભાગનો બુકડો બોલી ગયો હતો. અકસ્માત થતાની સાથે જ ટ્રકનો ચાલક સ્થળેથી ફરાર થઈ ગયો હતો
9 નવેમ્બરની મોડીરાતે ઓઢવ રિંગ રોડ પર હિટ એન્ડ રનની ઘટના ઘટી હતી
અમદાવાદના ઓઢવ રિંગ રોડ પર 9 નવેમ્બરની મોડીરાતે મોપેડ લઈને જઈ રહેલા બે ભાઈને પૂરપાટ ઝડપે આવતા ડમ્પરચાલકે ટક્કર મારી હતી. ડમ્પરની ટક્કર વાગતા બંને જમીન પર પટકાયા હતા, જેમાં મોપેડચાલક યુવકને માથામાં ગંભીર ઇજા થતા સ્થળ પર જ મોત થયું છે. અન્ય મોપેડ સવાર યુવકને ઈજા પહોંચતાં સારવાર માટે ખસેડવાની ફરજ પડી હતી. આ મામલે આઈ ડિવિઝન ટ્રાફિક પોલીસે ગુનો નોધી તપાસ હાથ ધરી હતી
14 નવેમ્બરની મોડીરાતે ખોખરા વિસ્તારના કાંકરિયા રોડ પર ન્યુ ગ્રીન માર્કેટ પાસે હિટ એન્ડ રનની ઘટના બની હતી
અમદાવાદના ખોખરા વિસ્તારમાં કાંકરિયા રોડ પર ન્યુ ગ્રીન માર્કેટ પાસે 14 નવેમ્બરની મોડીરાત્રે હિટ એન્ડ રનની ઘટના બની હતી. ન્યુ ગ્રીન માર્કેટમાં સિક્યુરિટી ગાર્ડ તરીકે નોકરી કરતા રમણભાઈ પરમાર રાત્રે 3 વાગ્યે ચા પીવા માટે જતા હતા, ત્યારે રોડ ક્રોસ કરવા જતા અજાણ્યા વાહનચાલકે ટક્કર મારી નીચે પાડી દેતા કોઈ વાહનનું વ્હીલ તેમના માથા ઉપરથી ફરી વળ્યું હતું, જેમાં તેમનું ઘટનાસ્થળ પર જ મોત થયુ હતું
ઓવરસ્પીડમાં વાહન હંકારવું અને સ્ટંટ કરવાનો અત્યારે એક ક્રેઝ બની ગયો છે. જાહેર રોડ પર બેફામ ફરતા વાહનચાલકો સામે અમદાવાદ RTO દ્વારા કાર્યવાહી કરવામાં આવી છે. ટ્રાફિક નિયમોનું પાલન ન કરનારા 250 લોકોના લાઈસન્સ સસ્પેન્ડ કરવામાં આવ્યા છે. એમાં પણ ફેટલ એટલે કે અકસ્માત સર્જી નિર્દોષનો જીવ લીધો હોય એવા કેસમાં સૌથી વધુ લાઈસન્સ સસ્પેન્ડ કરાયા છે.
