ભાઈને નુકસાન પહોંચાડ્યું તો ખૂબ જ ખરાબ થશે:ઈમરાનની બહેને કહ્યું, જીવ લેવાની કોશિશ કરી તો કોઈ બચશે નહીં; કાલે અમેરિકામાં પ્રદર્શનની તૈયારી
નોરીને આગળ કહ્યું હતું કે આ લોકો ઉપર બેઠા છે, તેમની પાસે તાકાત છે એટલે એવું વિચારે છે કે તેઓ બધું કરી શકે છે અને અમે કંઈ કરી શકીશું નહીં. આ સરકાર અત્યાચાર કરી રહી છે. પાકિસ્તાનમાં આર્મી ચીફ અસીમ મુનીરનું શાસન હિટલરના શાસન કરતાં પણ ખરાબ છે.
ખરેખર છેલ્લા કેટલાક દિવસોથી ઇમરાન ખાનના મૃત્યુની અફવાઓ તેજ બની છે. ગુરુવારે ઇમરાન ખાનના પુત્ર કાસિમ ખાને પોતાના પિતા જીવિત હોવાના પુરાવા માગ્યા હતા. જ્યારે ઇમરાન ખાનની પાર્ટી PTI રવિવારે વોશિંગ્ટન સ્થિત દૂતાવાસની બહાર પ્રદર્શન કરવાની તૈયારી કરી રહી છે.
ઇમરાનના પુત્ર બોલ્યા- 6 અઠવાડિયાંથી પિતાને એકલા 'ડેથ સેલ'માં રાખ્યા છે
કાસિમે X પર લખ્યું છે કે તેમના પિતાની 845 દિવસ પહેલાં ધરપકડ કરવામાં આવી હતી. છેલ્લાં 6 અઠવાડિયાંથી તેમને એકલા 'ડેથ સેલ'માં રાખવામાં આવ્યા છે.
કાસિમ કહ્યું હતું કે તેમની ફોઈને પણ તેમના ભાઈને મળવા દેવામાં આવતાં નથી. આ બધું કોઈ સુરક્ષા નિયમને કારણે નહીં, પરંતુ જાણીજોઈને કરવામાં આવી રહેલી કાર્યવાહી છે. સરકાર તેમના પિતાની સાચી હાલત છુપાવી રહી છે.
ઇમરાનની બહેન બોલી, શાસક સત્તાના નશામાં ચૂર છે
નોરીને કહ્યું હતું કે અમારો સરકાર પરથી વિશ્વાસ ઊઠી ગયો છે. ઇમરાનને ઘણા દિવસો સુધી આઇસોલેશનમાં રાખી રહ્યા છે. પાકિસ્તાનના જેલ મેન્યુઅલ મુજબ, કોઈને પણ ચાર દિવસથી વધુ આઇસોલેટ કરી શકાતા નથી, પરંતુ તેઓ ઇમરાનને ત્રણ-ત્રણ અઠવાડિયાં, ચાર-ચાર અઠવાડિયાં આઇસોલેટ કરી દે છે. અમે પરેશાન થઈ ગયા છીએ.
તેમણે કહ્યું હતું કે પાકિસ્તાનનો શાસક સત્તાના નશામાં ચૂર છે. શું ઇમરાન ખાનને નુકસાન પહોંચાડવાનો પ્રયાસ થઈ શકે છે?
આ સવાલ પર નોરીને કહ્યું હતું કે ઇમરાન ખાન શાંતિપ્રિય છે. તેઓ હંમેશાં પોતાના લોકોને શાંતિ જાળવી રાખવા કહે છે, પરંતુ તમને ખબર જ છે કે પહેલાં પણ ઘણી વખત તેમની હત્યાનો પ્રયાસ થઈ ચૂક્યો છે.
જેલ પ્રશાસન દ્વારા ઇમરાન ખાન વિશે માહિતી આપવાનો ઇનકાર
નોરીને કહ્યું હતું કે ક્યારેક ઇમરાન પર ગોળીઓ ચલાવવામાં આવી તો ક્યારેક તેમની ગાડી ખરાબ કરી દેવામાં આવી. પેટ્રોલ પણ નાખવામાં આવ્યું. આ લોકો ઘણુંબધું કરી ચૂક્યા છે. ઇમરાન ખાન સાથે આખી દુનિયા ઊભી છે. દુનિયામાં જ્યાં-જ્યાં પાકિસ્તાનીઓ છે, બધા ઇમરાન ખાન સાથે છે.
જેલ પ્રશાસન શું જવાબ આપીને તેમને ઇમરાન ખાનને મળવા દેતું નથી? આનો જવાબ આપતાં નોરીને કહ્યું હતું કે જેલ પ્રશાસન સાચું કારણ ક્યારેય જણાવતું નથી. ક્યારેક તેઓ અમને અવગણે છે. ઘણીવાર તેઓ અમારી સામે લાકડીઓ લઈને ઊભા રહી જાય છે.
ઇમરાનની જેલ સુવિધાઓ પર નોરીન બોલી, આ એકદમ ખોટું છે
નોરીને ઇમરાન ખાનને જેલમાં મળી રહેલી સુવિધાઓના દાવાઓ પર કહ્યું, આમાં કોઈ સચ્ચાઈ નથી. આ એકદમ ખોટી વાત છે.
ખરેખર રક્ષામંત્રી ખ્વાજા આસિફે બુધવારે ઇમરાનની જેલ સુવિધાઓનો ઉલ્લેખ કર્યો હતો. તેમણે કહ્યું હતું કે ઇમરાન પાસે જેલમાં ટીવી છે, બહારથી ભોજન આવે છે અને જિમ ઇક્વિપમેન્ટ પણ ઉપલબ્ધ છે.
આસિફે કહ્યું હતું કે જ્યારે તેઓ જેલમાં બંધ હતા ત્યારે તેમની પાસે ફક્ત બે ધાબળા હતા. તેમણે જણાવ્યું હતું કે અમે ઠંડા ફ્લોર પર સૂતા હતા અને જેલમાં બનેલું ભોજન જ ખાતા હતા. અમને ગરમ પાણી પણ મળતું ન હતું.
તેમણે આરોપ લગાવ્યો કે ઇમરાન પાસે ડબલ બેડ અને મખમલી પથારી છે. દાવો કર્યો કે જેલ અધિકારીઓ વ્યક્તિગત રીતે તેમની સંભાળ રાખે છે.
આસિફે કહ્યું હતું કે ઇમરાન પર તેમના સમર્થકોને જૂઠું બોલતા પહેલાં ખુદાથી ડરવું જોઈએ.
ખૈબર-પખ્તુનખ્વાના CMને પાડીને માર માર્યો
ઇમરાન ખાનનું સમર્થન કરવા રાવલપિંડીની અડિયાલા જેલ પહોંચેલા ખૈબર-પખ્તુનખ્વા (KP) રાજ્યના મુખ્યમંત્રી સોહેલ આફ્રિદીને પોલીસે ગુરુવારે રસ્તા પર પાડીને માર માર્યો.
મીડિયા રિપોર્ટ્સ અનુસાર, CM સોહેલ આફ્રિદી પર હુમલો સેનાના આદેશ પર કરવામાં આવ્યો હતો. ગુરુવારે જ્યારે આફ્રિદી જેલ પહોંચ્યા ત્યારે ત્યાં ભારે સુરક્ષા તહેનાત હતી અને PTI સમર્થકોની ભીડ સતત વધી રહી હતી. તેમના પહોંચવાથી પરિસ્થિતિ વધુ વણસી ગઈ.
પોલીસે તેમને અને તેમની સાથે આવેલા નેતાઓને આગળ વધતા રોક્યા. ધક્કામુક્કી દરમિયાન પોલીસકર્મીઓએ CMને લાત-ઘૂંસા પણ માર્યાં અને જમીન પર પાડી દીધા. PTIએ આ ઘટનાને લોકતાંત્રિક અધિકારો પર હુમલો ગણાવ્યો છે.
ઈમરાન ખાન જેલમાં, બહાર મૃત્યુની અફવા
ઇમરાન ખાનના મૃત્યુને લઈને સોશિયલ મીડિયા પર અફવાઓ તેજ બની ગઈ છે. ઇમરાન ઓગસ્ટ 2023થી રાવલપિંડીની અડિયાલા જેલમાં બંધ છે.
કેટલાક મીડિયા રિપોર્ટ્સમાં દાવો કરવામાં આવી રહ્યો છે કે તેમની તબિયત સારી નથી. છેલ્લાં 3 અઠવાડિયાંથી ઇમરાનની બહેનો તેમને મળવાનો પ્રયાસ કરી રહી છે, પરંતુ જેલ પ્રશાસન એેની મંજૂરી આપતું નથી. આને કારણે ઇમરાનના ખરાબ સ્વાસ્થ્ય અંગે અટકળો લગાવવામાં આવી રહી છે.
ઇમરાનની બહેનોએ સરકાર પાસે સત્ય જણાવવાની માગ કરી છે. તણાવ વધ્યા બાદ જેલ પ્રશાસને કહ્યું હતું કે ઇમરાન ખાનની તબિયત બિલકુલ ઠીક છે.
ઇમરાનની પાર્ટી પાકિસ્તાન તહરીક-એ-ઇન્સાફ (PTI)એ પણ ઇમરાનના સ્વાસ્થ્ય વિશેની તાજેતરની અફવાઓ અંગે સરકાર પાસેથી સ્પષ્ટતા માગી છે, સાથે જ પ્રશાસન પાસે પૂર્વ વડાપ્રધાન અને તેમના પરિવાર વચ્ચે મુલાકાતની વ્યવસ્થા કરવાની માગ કરી છે.
મુલાકાતની પરવાનગી ન મળતાં અફવા ફેલાઈ
અડિયાલા જેલમાં દર મંગળવારે કેદીઓને મળવાની પરવાનગી મળે છે. ઇમરાન ખાનના પરિવાર અને પીટીઆઈ નેતાઓનું કહેવું છે કે તેમને ઘણાં અઠવાડિયાંથી ખાનને મળવા દેવામાં આવ્યા નથી.
ગયા મંગળવારે પણ મોટી સંખ્યામાં પીટીઆઈ કાર્યકરો ઈમરાન ખાનને મળવા પહોંચ્યા હતા, પરંતુ જેલ પ્રશાસને કોઈને પણ તેમને મળવા દીધા ન હતા. આનાથી લોકોની ચિંતા વધુ વધી ગઈ.
આ પછી મંગળવારે રાત્રે સોશિયલ મીડિયા પર ‘ઈમરાન ખાન ક્યાં છે’ ટ્રેન્ડ થવા લાગ્યું. ત્યાર બાદ બુધવારે અદિયાલા જેલની બહાર મોટી સંખ્યામાં પીટીઆઈ સમર્થકો એકઠા થયા.
હાઈકોર્ટે ઈમરાન સાથે મુલાકાતની મંજૂરી આપી દીધી છે
માર્ચ 2025માં ઈસ્લામાબાદ હાઈકોર્ટે ઈમરાન ખાનને પરિવાર અને વકીલો સાથે નિયમિત મુલાકાતની મંજૂરી આપી હતી, પરંતુ જેલ પ્રશાસન આદેશનું પાલન કરતું નથી.
ઓક્ટોબર 2025માં કોર્ટે ફરીથી મુલાકાતો શરૂ કરવાનો નિર્દેશ આપ્યો હતો, તેમ છતાં તેમની બહેનોને અત્યારસુધી એકપણ વાર મળવા દેવામાં આવી નથી.
ઇમરાન ખાન 2 વર્ષથી વધુ સમયથી જેલમાં બંધ છે
ઇમરાન ખાન પર 100થી વધુ કેસ ચાલી રહ્યા છે અને તેઓ ઓગસ્ટ 2023થી જેલમાં છે. ભ્રષ્ટાચારના કેસમાં તેમને 14 વર્ષની સજા સંભળાવવામાં આવી છે, જેમાં સરકારી ભેટો (તોષાખાના કેસ) વેચવા અને સરકારી રહસ્યો લીક કરવા જેવા આરોપો સામેલ છે.
ઇમરાન પર આરોપ છે કે તેમણે અલ-કાદિર ટ્રસ્ટ માટે પાકિસ્તાન સરકારની અબજો રૂપિયાની જમીનને સસ્તામાં વેચી દીધી હતી. આ મામલે ઇમરાનને 9 મે 2023ના રોજ ધરપકડ કરવામાં આવી હતી. આ પછી આખા દેશમાં સેનાનાં ઘણાં મહત્ત્વપૂર્ણ ઠેકાણાં પર હુમલા થયા હતા.
પાકિસ્તાનના નેશનલ એકાઉન્ટેબિલિટી બ્યૂરો (NAB)એ અલ-કાદિર ટ્રસ્ટ કેસમાં ડિસેમ્બર 2023માં ઇમરાન ખાન અને તેમની પત્ની બુશરા બીબી અને અન્ય 6 વ્યક્તિ પર કેસ દાખલ કર્યો હતો, જોકે જ્યારે ઇમરાન વિરુદ્ધ આ કેસ દાખલ થયો, એ પહેલાંથી જ તેઓ તોશાખાના કેસમાં અડિયાલા જેલમાં બંધ હતા.
50 અબજનો સ્કેમ છે અલ-કાદિર ટ્રસ્ટ કેસ
- પાકિસ્તાની મીડિયા રિપોર્ટ્સ અનુસાર, આ કેસમાં 4 મુખ્ય પાત્રો છે: ઇમરાન ખાન અને પત્ની બુશરા બીબી, અબજોપતિ લેન્ડ માફિયા મલિક રિયાઝ અને બુશરાની મિત્ર ફરહ ગોગી.
- પાકિસ્તાન સરકારનો આરોપ છે કે ખાન જ્યારે વડાપ્રધાન બન્યા ત્યારે તેમણે મલિક રિયાઝને મની લોન્ડરિંગ કેસમાં ફસાવ્યા. બ્રિટનમાં રિયાઝની અબજો રૂપિયાની સંપત્તિ જપ્ત કરાવી દીધી. તેના એક સાગરીતને પણ લંડનમાં ધરપકડ કરાવી દીધી, જેમાંથી 40 અબજ પાકિસ્તાની રૂપિયા જપ્ત થયા.
- આરોપ છે કે આ કેસ પછી બે ડીલ થઈ, જે અંતર્ગત બ્રિટન સરકારે રિયાઝના સાગરીત પાસેથી જપ્ત કરાયેલા પૈસા પાકિસ્તાન સરકારને પરત કર્યા.
- આરોપ છે કે ઇમરાને કેબિનેટને આ પૈસાની જાણકારી આપી ન હતી, પરંતુ અલ કાદિર નામનું એક ટ્રસ્ટ બનાવીને ધાર્મિક શિક્ષણ આપવા માટે એક યુનિવર્સિટી શરૂ કરી. તેના બોર્ડ ઓફ ડિરેક્ટર્સમાં 3 સભ્યો હતા: ઇમરાન ખાન, બુશરા બીબી અને ફરહ ગોગી.
- આ કેસની FIRમાં કહેવામાં આવ્યું છે કે આ માટે અબજો રૂપિયાની જમીન મલિક રિયાઝે આપી. બુશરા બીબીને ડાયમંડ રિંગ પણ ભેટમાં આપી. બદલામાં રિયાઝના તમામ કેસ ખતમ કરી દેવામાં આવ્યા.
- પાકિસ્તાનના ગૃહમંત્રી રાણા સનાઉલ્લાહે ઇમરાનની ધરપકડ બાદ કહ્યું- આ પાકિસ્તાનના ઇતિહાસનું સૌથી મોટું કૌભાંડ છે. સરકારી તિજોરીને ઓછામાં ઓછા 50 અબજ રૂપિયાનો ચૂનો લાગ્યો. તેમ છતાં 13 મહિનામાં એકપણ વાર ઇમરાન કે બુશરા પૂછપરછ માટે આવ્યાં નથી. 3 વર્ષમાં આ યુનિવર્સિટીમાં માત્ર 32 વિદ્યાર્થીએ જ પ્રવેશ લીધો.
- જિયો ન્યૂઝ અનુસાર, સમગ્ર મામલાને જોતાં ઇમરાન ખાન અને તેમની પત્ની પર 1 હજાર 955 કરોડ રૂપિયાની લાંચ લેવાનો આરોપ નોંધવામાં આવ્યો.
Image Gallery
