શાતિર ચોર ગેંગની નવી મોડસ ઓપરેન્ડીનો પર્દાફાશ, CCTV:ATM મશીનના કેશ ડિસ્પેન્શનમાં ડબલ ગમ પટ્ટી લગાવતા, ગ્રાહકને કેશ ઊપડવા જતાં પૈસા ન મળતા; ચારની ધરપકડ
ગ્રાહક ATMમાં પૈસા ઉપાડવા આવે ત્યારે મશીનમાં પૈસા બહાર ન આવતા પોલીસ સૂત્રો પાસેથી મળતી માહિતી મુજબ, આરોપીઓની આ ગેંગ યુકો બેંકના ATM મશીનમાં કેશ ડિસ્પેન્શન (પૈસા બહાર આવવાનો) સ્લોટ પર ડબલ ગમ પટ્ટી લગાવી દેતી હતી. જ્યારે કોઈ ગ્રાહક ATMમાંથી પૈસા ઉપાડવાનો પ્રયત્ન કરતો ત્યારે મશીનમાંથી બહાર આવતી નોટો આ ગમ પટ્ટીમાં ફસાઈ જતી હતી. ગ્રાહકને લાગતું કે મશીનમાં કોઈ ટેક્નિકલ ખામી છે અથવા તો પૈસા બહાર આવ્યા નથી. નિરાશ થઈને ગ્રાહક ખાલી હાથે ATM કેબિનમાંથી નીકળી જાય ત્યાર બાદ તરત જ આ ગઠિયાઓ ત્યાં આવીને ગમ પટ્ટી સાથે ફસાયેલી નોટો કાઢીને ચોરી કરીને ફરાર થઈ જતાં હતા.
બેંક મેનેજરને ATM કેબિનના ડસ્ટબિનમાં ડબલ ગમ પટ્ટી મળી આ ચોરીની ઘટનાઓ છેલ્લા બે દિવસથી સતત થઈ રહી હોવાની શંકા યુકો બેંકના મેનેજરને થઈ હતી. ATMમાં થતી ગડબડને કારણે તેઓ નિયમિત તપાસ માટે ATM કેબિનમાં પહોંચ્યા હતા. નિયમિત નિરીક્ષણ દરમિયાન તેમને ડસ્ટબીનમાંથી ડબલ ગમ લગાવેલી કાળી પટ્ટી મળી આવી હતી. જેણે ચોરીની પદ્ધતિ તરફ ઇશારો કર્યો હતો. મેનેજરે તાત્કાલિક સચિન પોલીસ સ્ટેશનમાં લેખિત ફરિયાદ નોંધાવી હતી. જેના આધારે પોલીસે તાત્કાલિક તપાસના ચક્રો ગતિમાન કર્યા હતા.
સીસીટીવી ફૂટેજ ચેક કરતા પોલીસને શંકાસ્પદ ગતિવિધી દેખાઈ પોલીસે સૌપ્રથમ ATM કેબિનના સીસીટીવી ફૂટેજ ચેક કર્યા. ફૂટેજમાં સ્પષ્ટ જોઈ શકાયું હતું કે, એક અજાણ્યો શખસ ATM મશીનના કેશ ડિસ્પેન્શન પાસે શંકાસ્પદ હરકતો કરી રહ્યો છે. આ ઉપરાંત, બીજા જ દિવસે વહેલી સવારે પણ અન્ય એક વ્યક્તિ એ જ રીતે મશીન સાથે છેડછાડ કરતી નજરે પડતાં પોલીસે મામલાની ગંભીરતા સમજીને આરોપીઓને ઝડપી પાડવા માટે જાળ બિછાવી હતી. સીસીટીવી ફૂટેજ અને અન્ય ટેક્નિકલ સર્વેલન્સના આધારે સચિન પોલીસને આ ગેંગને પકડવામાં મોટી સફળતા મળી છે. પોલીસે ચોરીના ગુનામાં સંડોવાયેલા ચાર શખસોની ધરપકડ કરી છે. તેમની પાસેથી પોલીસે ચોરી કરેલી આશરે રૂપિયા 30 હજાર જેટલી રોકડ રકમ પણ જપ્ત કરી છે.
પોલીસે ચારેય આરોપીની ધરપકડ કરી ઝડપાયેલા આરોપીઓ વિક્કીકુમાર ઉર્ફે રવિકુમાર ગુપ્તા, છોટુકુમાર પાસ્વાન, ક્રિશકુમાર ઉર્ફે રજત ઠાકુર અને ક્રિષ્ણકુમાર ઉર્ફે બબુઆ શર્મા હોવાનું જણાવ્યું છે. સચિન પોલીસે ચારેય આરોપીઓ સામે કાયદેસરની કાર્યવાહી હાથ ધરીને વધુ તપાસ શરૂ કરી છે. આ ગેંગે અન્ય કોઈ ATMમાં આવી ઘટનાને અંજામ આપ્યો છે કે કેમ તે અંગેની પૂછપરછ ચાલી રહી છે. પોલીસે ગ્રાહકોને પણ ATMમાંથી પૈસા ઉપાડતી વખતે આસપાસની ગતિવિધિઓ પર ધ્યાન રાખવા માટે અપીલ કરી છે.
Image Gallery
