ભારત કોકિંગ કોલનો IPO આજથી ખુલ્યો:50% પ્રીમિયમના સંકેતો, પ્રાઇસ બેન્ડ ₹21 થી ₹23 પ્રતિ શેર; રોકાણ કરતા પહેલા જાણો જરૂરી વિગતો
પ્રાઇસ બેન્ડ ₹21-23 નક્કી, કોલ ઇન્ડિયા શેર વેચશે
આ આખો IPO 'ઓફર ફોર સેલ' (OFS) છે, એટલે કે તેના દ્વારા મળેલા પૈસા સીધા પ્રમોટર કંપની કોલ ઇન્ડિયા પાસે જશે. કંપનીએ તેનો પ્રાઇસ બેન્ડ ₹21 થી ₹23 પ્રતિ શેર નક્કી કર્યો છે. રોકાણકારો ઓછામાં ઓછા 600 શેરના એક લોટ માટે બોલી લગાવી શકે છે, જેના માટે ઉપલા સ્તરે ₹13,800 નું રોકાણ કરવું પડશે. આ ઇશ્યૂ 13 જાન્યુઆરી સુધી ખુલ્લો રહેશે.
IPO સબસ્ક્રિપ્શનની રીત
જો તમે ફોનપે, ગૂગલ-પે કે પેટીએમનો ઉપયોગ કરો છો અને તમારી પાસે પહેલાથી ઝીરોધા, ગ્રો જેવા બ્રોકર પાસે ડિમેટ એકાઉન્ટ છે તો આ સરળતાથી થઈ જશે. એપમાં જાઓ અને 'BCCL IPO' સર્ચ કરો. ડિટેલ્સ ભરો અને UPI ID નાખીને પેમેન્ટ એપ્રુવ કરી દો.
IPOમાં શેરનું એલોટમેન્ટ કમ્પ્યુટરાઇઝ્ડ ડ્રો દ્વારા થાય છે, જેમાં અરજી કરનારા તમામ રોકાણકારોના નામ રેન્ડમ રીતે પસંદ કરવામાં આવે છે. જો IPO ઓવરસબસ્ક્રાઇબ થાય છે, તો બધાને શેર મળવા શક્ય નથી હોતું. તેથી અમુક જ લોકોને શેર એલોટ થાય છે.
સરકારી કંપની હોવા છતાં પણ કેટલાક જોખમ
- આ 'ઓફર ફોર સેલ' છે. એટલે કે તમે જે પૈસા રોકશો, તે કોલ ઇન્ડિયા પાસે જશે, કંપની પાસે બિઝનેસ વધારવા માટે નહીં. જ્યારે સરકારી કંપનીઓનું પ્રદર્શન સરકારી નીતિઓ અને વૈશ્વિક બજારમાં કોલસાની કિંમતો પર નિર્ભર કરે છે.
- કંપનીનું કામકાજ કેટલાક ખાસ ભૌગોલિક ક્ષેત્રો (ઝરિયા અને રાણીગંજ) સુધી જ સીમિત છે. આવા સંજોગોમાં ત્યાં કોઈપણ પ્રકારની પર્યાવરણીય કે રેગ્યુલેટરી અડચણ આવતા ઉત્પાદન પર સીધો પ્રભાવ પડી શકે છે. આની કંપની પર નકારાત્મક અસર થઈ શકે છે.
-
ગ્રે માર્કેટમાં 50% પ્રીમિયમ, મોટા નફાની અપેક્ષા
માર્કેટ એક્સપર્ટ્સ અનુસાર અનઓફિશિયલ માર્કેટ (ગ્રે માર્કેટ) માં શેર ₹11-12 ના પ્રીમિયમ પર ચાલી રહ્યો છે. જો આ ટ્રેન્ડ જળવાઈ રહે છે, તો રોકાણકારોને લિસ્ટિંગના દિવસે જ લગભગ 50% નો નફો થઈ શકે છે. જોકે, જાણકારોનું કહેવું છે કે GMP ફક્ત બજારની ધારણા દર્શાવે છે અને તે ગ્લોબલ માર્કેટની સ્થિતિઓ અનુસાર બદલાઈ પણ શકે છે. લિસ્ટિંગ પછી આ કંપનીમાં કોલ ઇન્ડિયાની ભાગીદારી ઘટીને 90% રહી જશે.
લિસ્ટિંગ ગેઇન માટે રોકાણકારો પૈસા લગાવી શકે છે
આનંદ રાઠી રિસર્ચે આ IPOને 'સબસ્ક્રાઇબ' રેટિંગ આપ્યું છે. બ્રોકરેજનું માનવું છે કે કંપનીની બજારમાં મજબૂત પકડ અને સ્ટીલ ઇન્ડસ્ટ્રીમાં તેની ઉપયોગિતાને જોતાં લિસ્ટિંગ પર સારા નફાની સંભાવના છે. જોકે, લાંબા ગાળે રોકાણકારોએ થોડું સાવચેત રહેવું જોઈએ કારણ કે કોકિંગ કોલની કિંમતો ગ્લોબલ માર્કેટના ઉતાર-ચઢાવ પર નિર્ભર કરે છે.
કંપનીનો ટ્રેક રેકોર્ડ સારો, દેવામુક્ત છે બેલેન્સ શીટ
નાણાકીય મોરચે કંપનીનું પ્રદર્શન સ્થિર રહ્યું છે. નાણાકીય વર્ષ 2025માં કંપનીની આવક આશરે ₹13,803 કરોડ અને નફો ₹1,564 કરોડ રહ્યો. કંપનીની સૌથી મોટી તાકાત એ છે કે તે સંપૂર્ણપણે દેવામુક્ત (Debt-Free) છે અને તેની પાસે ભારે રોકડ પ્રવાહ છે.
-
દેશનો 58% કોકિંગ કોલ એકલા BCCL બનાવે છે
નાણાકીય વર્ષ 2025ના આંકડા મુજબ BCCLનો ઘરેલું ઉત્પાદનમાં હિસ્સો 58.50% છે. 1 એપ્રિલ 2024 સુધીમાં કંપની પાસે આશરે 7,910 મિલિયન ટન કોલસાનો ભંડાર હતો. કંપની મુખ્યત્વે સ્ટીલ અને પાવર સેક્ટર માટે કોલસો તૈયાર કરે છે.
કંપનીએ 2021 થી 'હેવી અર્થ મૂવિંગ મશીનરી' (HEMM) નો ઉપયોગ વધારીને તેની ક્ષમતામાં વધારો કર્યો છે. વર્તમાનમાં કંપની 34 ખાણોનું સંચાલન કરી રહી છે. કંપની ઝરિયા અને રાણીગંજ કોલફિલ્ડના કુલ 288.31 ચોરસ કિલોમીટરના લીઝ એરિયામાં ફેલાયેલી છે.
શું હોય છે કોકિંગ કોલ અને શા માટે છે તેની માગ?
સામાન્ય કોલસાનો ઉપયોગ મોટાભાગે વીજળી બનાવવા માટે થાય છે, પરંતુ કોકિંગ કોલનો ઉપયોગ સ્ટીલ બનાવવાની ભઠ્ઠીઓમાં કરવામાં આવે છે. ભારત તેની જરૂરિયાતનો ઘણો કોકિંગ કોલ આયાત કરે છે, આવી સ્થિતિમાં BCCL જેવી સ્થાનિક કંપનીની ભૂમિકા ખૂબ જ મહત્વપૂર્ણ બની જાય છે.
Image Gallery
