રાજ્યમાં 16 જૂને થયેલી ચોમાસાની એન્ટ્રી બાદ અત્યાસુધી મેઘરાજાએ સમગ્ર ગુજરાતને કવર કરી લીધું છે. શરૂઆતમાં ધમાકેદાર બેટિંગ કર્યા બાદ મેઘરાજાએ વચ્ચે થોડો બ્રેક લીધો હતો. જોકે, છેલ્લા બે દિવસથી ફરી વરસાદી માહોલ જામ્યો છે. શનિવારથી ઉત્તર ગુજરાત અને મધ્ય ગુજરાતના કેટલાક ભાગોમાં ધોધમાર વરસાદ પડી રહ્યો છે.

વહેલી સવારથી અમદાવાદમાં વરસાદી માહોલ 

અમદાવાદ શહેરમાં મોડી રાતથી વિવિધ વિસ્તારમાં છૂટો છવાયો વરસાદ પડ્યો છે. શહેરના રાણીપ, ગોતા, ચાંદલોડિયા, ન્યુ રાણીપ, ચાંદખેડા, મોટેરા, જગતપુર, એસજી હાઇવે સહિતના વિસ્તારોમાં અડધો ઇંચથી ઓછો વરસાદ પડ્યો છે. વહેલી સવારે પણ શહેરના કેટલાક વિસ્તારોમાં સામાન્ય વરસાદ પડ્યો હતો. જ્યારે વહેલી સવારથી પ્રહલાદનગર, આનંદનગર, એસજી હાઇવે, થલતેજ, શીલજ, બોપલ, સરદાર પટેલ રિંગ રોડ, ઇસનપુર, સીટીએમ, જશોદાનગર, ઘોડાસર સહિતના વિસ્તારોમાં પણ વરસાદ પડી રહ્યો છે.

26 જુલાઈ સુધી સાર્વત્રિક વરસાદની આગાહી 

હવામાન વિભાગ દ્વારા 26 જુલાઈ સુધી રાજ્યમાં સાર્વત્રિક રીતે છૂટાછવાયા સ્થળોએ હળવાથી મધ્યમ વરસાદની આગાહી કરવામાં આવી છે. ગઈકાલનું ઉત્તર પશ્ચિમ રાજસ્થાન પરનું ડિપ્રેશન પશ્ચિમ રાજસ્થાન તરફ આગળ વધીને વેલમાર્ક લો પ્રેસરમાં બદલાયુ છે. મોનસુન ટ્રફ પાકિસ્તાન, રાજસ્થાન, ઉત્તર ભારતમાં થઈને બંગાળ સુધી વિસ્તરેલ છે.