રાષ્ટ્રપતિ દ્રૌપદી મુર્મુએ ઉપરાષ્ટ્રપતિ જગદીપ ધનખરનું રાજીનામું મંજૂર કર્યું છે. તેમનું રાજીનામું આગળની કાર્યવાહી માટે ગૃહ મંત્રાલયને મોકલવામાં આવ્યું છે.

મંગળવારે ઉપરાષ્ટ્રપતિ જગદીપ ધનખરે રાજ્યસભાની કાર્યવાહીમાં હાજરી આપી નહોતી. જેડીયુના સાંસદ હરિવંશે સવારે 11 વાગ્યે ઉપલા ગૃહની કાર્યવાહી શરૂ કરી. મીડિયા રિપોર્ટ્સ અનુસાર, એવું કહેવામાં આવી રહ્યું છે કે જગદીપ ઉપરાષ્ટ્રપતિપદ પરથી રાજીનામું પાછું ખેંચશે નહીં તેમજ તેઓ વિદાય સમારંભમાં પણ હાજરી આપશે નહીં.

દેશના 14મા ઉપરાષ્ટ્રપતિ જગદીપ ધનખરે 21 જુલાઈની રાત્રે અચાનક પોતાના પદ પરથી રાજીનામું આપી દીધું. 74 વર્ષીય ધનખરનો કાર્યકાળ 10 ઓગસ્ટ, 2027 સુધીનો હતો. તેમણે 10 જુલાઈના રોજ એક કાર્યક્રમમાં કહ્યું હતું કે 'જો ભગવાન આશીર્વાદ આપશે તો હું ઓગસ્ટ 2027માં નિવૃત્ત થઈશ.'

PM જગદીપ ધનખરને વિચાર બદલવાનું કહે: જયરામે કહ્યું- ઉપરાષ્ટ્રપતિના રાજીનામાનું કારણ કંઈક બીજું, વિપક્ષ 2024માં મહાભિયોગ લાવ્યો હતો

વિપક્ષ જગદીશ ધનખરના ઉપરાષ્ટ્રપતિપદ પરથી અચાનક રાજીનામા પર સવાલ ઉઠાવી રહ્યો છે. કોંગ્રેસના મહાસચિવ જયરામ રમેશે એક પોસ્ટમાં કહ્યું, આ અણધાર્યા રાજીનામામાં દેખીતી વાત કરતાં ઘણું બધું છે. પીએમ મોદીએ ધનખરને પોતાનો વિચાર બદલવા માટે મનાવવા જોઈએ. આ રાષ્ટ્રીય હિતમાં રહેશે. ખાસ કરીને ખેડૂત સમુદાયને ઘણી રાહત મળશે.

શિવસેના (UBT)ના નેતા આનંદ દુબેએ કહ્યું, સ્વાસ્થ્યના કારણસર ઉપરાષ્ટ્રપતિના રાજીનામાના સમાચાર ચિંતાજનક છે. અમે તેમને શુભેચ્છા પાઠવીએ છીએ. ચોમાસુ સત્રનો પહેલો દિવસ હતો અને એ જ દિવસે તેમનું રાજીનામું આશ્ચર્યજનક છે. આ સરકારમાં શું ચાલી રહ્યું છે? જો સ્વાસ્થ્ય ચિંતાનો વિષય હોત તો રાજીનામું સત્રના થોડા દિવસ પહેલાં અથવા પછી આપી શકાયું હોત.

ઉપરાષ્ટ્રપતિના રાજીનામાના 2 સિદ્ધાંતો

પહેલું: રાષ્ટ્રપતિને લખેલા રાજીનામા પત્રમાં, પદ છોડવાનું કારણ સ્વાસ્થ્ય જણાવ્યું હતું.

બીજું: વિપક્ષ રાજીનામા પર સવાલ ઉઠાવી રહ્યા છે. કોંગ્રેસના નેતા જયરામ રમેશે મંગળવારે કહ્યું, '21 જુલાઈના રોજ બપોરે 12:30 વાગ્યે, શ્રી જગદીપ ધનખડે રાજ્યસભાની કાર્ય મંત્રણા સમિતિ (BAC) ની અધ્યક્ષતા કરી હતી. આ બેઠકમાં ગૃહના નેતા જેપી નડ્ડા અને સંસદીય બાબતોના મંત્રી કિરણ રિજિજુ સહિત મોટાભાગના સભ્યો હાજર હતા. ટૂંકી ચર્ચા બાદ, સમિતિની આગામી બેઠક ફરીથી 4:30 વાગ્યે યોજવાનો નિર્ણય લેવામાં આવ્યો.

સાંજે 4:30 વાગ્યે, સમિતિના સભ્યો ધનખરજીની અધ્યક્ષતામાં ફરી એક બેઠક માટે ભેગા થયા. બધા નડ્ડા અને રિજિજુની રાહ જોતા હતા, પરંતુ તેઓ આવ્યા નહીં. સૌથી આશ્ચર્યજનક વાત એ હતી કે ધનખરજીને વ્યક્તિગત રીતે જાણ કરવામાં આવી ન હતી કે બંને મંત્રીઓ બેઠકમાં હાજરી આપશે નહીં. સ્વાભાવિક રીતે, તેમને આ વાતનું ખરાબ લાગ્યું અને તેમણે બીએસીની આગામી બેઠક આજે બપોરે 1 વાગ્યા સુધી મુલતવી રાખી.

એ સ્પષ્ટ છે કે ગઈકાલે બપોરે 1 વાગ્યાથી 4:30 વાગ્યાની વચ્ચે કંઈક ગંભીર ઘટના બની હશે, જેના કારણે જેપી નડ્ડા અને કિરણ રિજિજુ જાણી જોઈને સાંજની બેઠકમાં હાજર રહ્યા ન હતા.

હવે ખૂબ જ ચોંકાવનારુ પગલું ભરતા, શ્રી જગદીપ ધનખડે પોતાના પદ પરથી રાજીનામું આપી દીધું છે. તેમણે આનું કારણ પોતાનિં નાદુરસ્ત તબિયતને ગણાવ્યું છે. આપણે આનું સન્માન કરવું જોઈએ. પરંતુ સત્ય એ છે કે આની પાછળ કેટલાક મોટા કારણો છે.

ધનખરજીએ 2014 પછી હંમેશા ભારતની પ્રશંસા કરી, પરંતુ તે જ સમયે તેમણે ખેડૂતોના હિત માટે ખુલ્લેઆમ અવાજ ઉઠાવ્યો. તેમણે જાહેર જીવનમાં વધતા 'અહંકાર'ની ટીકા કરી અને ન્યાયતંત્રની જવાબદારી અને સંયમની જરૂરિયાત પર ભાર મૂક્યો. વર્તમાન 'G2' સરકાર દરમિયાન પણ, તેમણે વિપક્ષને શક્ય તેટલી જગ્યા આપવાનો પ્રયાસ કર્યો.

તેઓ નિયમો, પ્રક્રિયાઓ અને શિષ્ટાચારના ચુસ્ત પાલન કરતા હતા. પરંતુ તેમને લાગતું હતું કે તેમની ભૂમિકામાં આ બાબતોની સતત અવગણના કરવામાં આવી રહી છે.

શ્રી જગદીપ ધનખડનું રાજીનામું તેમના વિશે ઘણું બધું કહી જાય છે. તેમજ, તે તેમને ઉપરાષ્ટ્રપતિ પદ સુધી પહોંચાડનારાઓના ઇરાદાઓ પર પણ ગંભીર સવાલો ઉભા કરે છે.

સીપીઆઈ સાંસદ પી. સંધોષ કુમારે કહ્યું- આ ઘટનાક્રમ સંપૂર્ણપણે અણધાર્યો છે અને તેની પાછળના કારણો શું છે તે અમને ખબર નથી. મને નથી લાગતું કે ભારતના રાષ્ટ્રપતિ તેને સ્વીકારશે. ધનખર તરફથી શરૂઆતની પ્રતિક્રિયા હોઈ શકે છે. તેઓ કેટલીક ઘટનાઓથી નાખુશ હોઈ શકે છે.

રમેશે કહ્યું, ધનખરને મોટી જાહેરાતો કરવાની હતી

જયરામ રમેશે કહ્યું- આજે (21 જુલાઈ) સાંજે લગભગ 5 વાગ્યા સુધી હું તેમની સાથે ઘણા અન્ય સાંસદો સાથે હતો. મેં સાંજે 7.30 વાગ્યે તેમની સાથે ફોન પર વાત કરી. એ સ્પષ્ટ છે કે તેમના રાજીનામા પાછળ દેખીતી વાત કરતાં કંઈક વિશેષ છે. જોકે, આ અટકળોનો સમય નથી.

રમેશે કહ્યું કે ધનખરે સરકાર અને વિપક્ષ બંનેને સમાન રીતે આડે હાથ લીધા છે. તેમણે મંગળવારે બપોરે 1 વાગ્યે બિઝનેસ એડવાઇઝરી કમિટીની બેઠકનું આયોજન કર્યું હતું. ન્યાયતંત્રને લગતી કેટલીક મોટી જાહેરાતો પણ થવાની હતી.

કપિલ સિબ્બલે કહ્યું- ધનખર એક રાષ્ટ્રવાદી અને દેશભક્ત