ઓપરેશન સિંધુ- ઈરાનથી વધુ 285 નાગરિકો ભારત પહોંચ્યા:17,13 ભારતીયો પરત ફર્યા
ઈરાન-ઈઝરાયલ યુદ્ધ વચ્ચે ઓપરેશન સિંધુ હેઠળ અત્યાર સુધીમાં કુલ 1,713 ભારતીયોને બહાર કાઢવામાં આવ્યા છે. મશહદથી બીજું વિમાન રવિવારે રાત્રે 11.30 વાગ્યે 285 નાગરિકોને લઈને નવી દિલ્હી પહોંચ્યું.
આ પહેલા, 21 જૂને 600 ભારતીયો, 20 જૂને 407 અને 19 જૂને 110 ભારતીયો દિલ્હી પહોંચ્યા હતા.
ઈરાનથી દિલ્હી પહોંચેલા આ મુસાફરોએ એરપોર્ટ પર 'વંદે માતરમ' અને 'ભારત માતા કી જય'ના નારા લગાવ્યા હતા. કેટલાક લોકો ભાવુક પણ થઈ ગયા હતા. તેમની આંખોમાં આંસુ આવી ગયા હતા. કેટલાકે જમીન પર માથું ટેકવ્યું હતું.
બીજી તરફ, રવિવારે ઇઝરાયલથી 160 ભારતીયોના ગ્રુપને બહાર કાઢવામાં આવ્યું હતું અને તે જોર્ડન પહોંચી ગયું છે. આ જૂથ આજે દિલ્હી પહોંચશે.
ઇઝરાયલમાં લગભગ 40,000 ભારતીય નાગરિકો છે, જેમાં વિદ્યાર્થીઓ અને મજૂરોનો સમાવેશ થાય છે.
ભારત પાછા ફરેલા લોકોએ શું કહ્યું...
- તહમીના- અમે સુરક્ષિત વાપસી માટે પ્રાર્થના કરી હતી, સરકારે તે ઈચ્છા પૂરી કરી. આ સમય દરમિયાન અમને સારી સુવિધાઓ મળી.
- માર્શલ- ભારત પાછા ફર્યા પછી મને જે લાગ્યું તે હું શબ્દોમાં વર્ણવી શકતો નથી. તેહરાનમાં ભારતીય દૂતાવાસ અને વિદેશ મંત્રાલયનો આભાર.
- મોહમ્મદ અશફાક- મારા દેશમાં પાછા ફરવાનું સારું લાગે છે. ત્યાંના ભારતીય દૂતાવાસે અમારી સારી સંભાળ રાખી, હું તેમનો આભારી છું.
- ઉસ્તાક- હું કાશ્મીરથી છું. ઈરાનમાં પરિસ્થિતિ સારી નથી. અમે ભારત સરકાર, કાશ્મીર વહીવટીતંત્ર અને દૂતાવાસના ખૂબ આભારી છીએ.
- સૈયદ નિહાલ હૈદર- ભારતમાં પાછા આવીને ખૂબ સારું લાગે છે. જ્યારે અમે ત્યાં હતા, ત્યારે અમને એવું લાગ્યું કે અમે ફસાઈ ગયા છીએ. પરંતુ ભારત સરકારે અમારા માટે ખૂબ સારી વ્યવસ્થા કરી હતી.
- ફાતિમા- હું વડાપ્રધાન મોદીનો ખૂબ આભારી છું. હવે મારા દેશમાં પાછા ફર્યા પછી મને શાંતિનો અનુભવ થાય છે. મારા દેશમાં પાછા ફરવું ખૂબ જ ખુશીની વાત છે.
- એલિયા બાતૂલ- મારો પરિવાર ખૂબ જ ચિંતિત હતો. અહીં આવ્યા પછી અમને રાહત થઈ. ભારત સરકારનો ખૂબ ખૂબ આભાર. અમારા દૂતાવાસે અમને ખૂબ ટેકો આપ્યો હોવાથી અમને ત્યાં કોઈ સમસ્યાનો સામનો કરવો પડ્યો નહીં.
- સૈયદ મન્સૂર હુસૈન - બધાએ ભારત માતા પાસે આવીને પ્રણામ કર્યા. ભારત સરકારનો ખૂબ ખૂબ આભાર. મને ભારત ખૂબ ગમે છે.
ઈરાને એરસ્પેસ ખોલી, 1000થી વધુ ભારતીયોને બહાર કાઢ્યા
ઈરાને એરસ્પેસ પર લાદવામાં આવેલા પ્રતિબંધો હટાવીને લગભગ 1000 ભારતીય નાગરિકોને બહાર કાઢવાની મંજૂરી આપી હતી. તેમાંના મોટાભાગના વિદ્યાર્થીઓ છે, જેમને તેહરાનથી ઈરાનની રાજધાની મશહદ લાવવામાં આવ્યા હતા. હવે તેમને ત્રણ ચાર્ટર ફ્લાઇટ્સ દ્વારા ભારત લાવવામાં આવ્યા છે. આ ફ્લાઇટ્સ ઈરાની એરલાઇન માહાન દ્વારા સંચાલિત હતી.
આ વ્યવસ્થા ભારત સરકારે ઓપરેશન સિંધુ હેઠળ કરી હતી. ઈરાની દૂતાવાસના ડેપ્યુટી ચીફ ઓફ મિશન મોહમ્મદ જવાદ હુસૈનીએ જણાવ્યું હતું કે જો જરૂર પડે તો આગામી દિવસોમાં વધુ ફ્લાઇટ્સ ચલાવી શકાય છે.
