હાથમાં આરતીની થાળી, આંખમાં આંસુ, મોદીને જોઈને મહિલા રડી પડી:અમદાવાદમાં PMના રોડ શોમાં ભાવુક દૃશ્ય
PM મોદીને 25 ઓગસ્ટે ગુજરાતમાં ભારે ઉમળકા સાથે આવકાર મળ્યો હતો. અમદાવાદના નિકોલમાં પહેલા રોડ અને પછી સભામાં હકડેઠઠ માનવમેદની ઊમટી પડી હતી. PM મોદીની એક ઝલક મેળવવા માટે લોકોએ રીતસરની પડાપડી કરી હતી. PM મોદીની લોકચાહનાની એક તસવીરે સૌકોઈનું ધ્યાન ખેંચ્યું છે, જેમાં એક મહિલા મોદીની સામે તેમની આરતી ઉતારતાં ઉતારતાં ભાવુક થઈને રડી પડી હતી. આ હૃદયસ્પર્શી ઘટનાએ સૌનાં દિલ જીતી લીધાં હતાં. PM મોદીના સોશિયલ મીડિયા હેન્ડલ્સ પર પણ આ તસવીર પોસ્ટ કરવામાં આવી છે.
આ મહિલાનું નામ વિલાસબા ભૂપેન્દ્રસિંહ સિસોદિયા છે. અમદાવાદના નિકોલમાં પતિ અને દીકરા-દીકરી સાથે રહેતાં વિલાસબા મોદીના મોટા ફેન છે. PM મોદી જ્યારે નિકોલમાં રોડ શો કરી રહ્યા હતા ત્યારે વિલાસબા આરતીની થાળી લઈને ગયાં હતાં અને જ્યારે મોદી તેમની સામેથી પસાર થયા ત્યારે તેમણે ભાવુક થઈને તેમની આરતી ઉતારી હતી. આ જોઈને PM મોદીએ પણ તેમની સામે હાથ જોડીને નમસ્કાર કર્યા હતા.
