PMના માતાનું અપમાન મામલે NDAનું બિહાર બંધ:સમસ્તીપુર, બેગુસરાય, છપરા, હાજીપુરમાં નેશનલ હાઈવે જામ
વડાપ્રધાન નરેન્દ્ર મોદીના માતાનું અપમાન મામલે NDA દ્વારા આજે ગુરુવારે બિહાર બંધનું એલાન આપવામાં આવ્યું છે. તેની અસર પટના, ગયાજી, મુંગેર સહિત ઘણા જિલ્લાઓમાં જોવા મળી રહી છે. સમસ્તીપુર, બેગુસરાય, છપરા, હાજીપુરમાં નેશનલ હાઈવે બ્લોક કરવામાં આવ્યા છે. અહીં વાહનોની લાંબી કતાર લાગી ગઈ છે.
પટનાના સગુણા મોર ખાતે આગચંપી કરવામાં આવી છે. બિહતામાં ભાજપના નેતાઓએ રસ્તો બ્લોક કરી દીધો છે. વિદ્યાર્થીઓને લઈ જતી સ્કૂલ બસને પાછી વાળવામાં આવી છે. કાર્યકરોએ ડાકબુંગલા ક્રોસિંગને બ્લોક કરી દીધું છે.
દરભંગામાં , પાર્ટીના મહિલા મોરચાએ કમાન સંભાળી લીધી છે. ચાર રસ્તાઓ પર વિરોધ પ્રદર્શન થઈ રહ્યા છે. રસ્તાઓ જામ છે. પાર્ટીના કાર્યકરોએ જામમાં ફસાયેલા પોલીસ, એમ્બ્યુલન્સ અને વાયુસેનાના વાહનોને પસાર થવા દીધા.
બેગુસરાયમાં બંધને સફળ બનાવવા માટે મંત્રી સુરેન્દ્ર મહેતા પોતે રસ્તાઓ પર ઉતરી આવ્યા હતા. રસ્તાઓ અને દુકાનો બંધ રહી હતી.
મુંગેરમાં પણ ભાજપના કાર્યકરો રસ્તા પર ઉતરી આવ્યા છે. બંધ શાંતિપૂર્ણ રીતે ચાલી રહ્યો છે.
બંધને કારણે કોંગ્રેસ અને જેડીયુ કાર્યાલયોની સુરક્ષા વધારી દેવામાં આવી છે. પટનામાં 2000થી વધુ પોલીસ કર્મચારીઓને તહેનાત કરવામાં આવ્યા છે.
27 ઓગસ્ટના રોજ, દરભંગામાં વોટર અધિકાર યાત્રા દરમિયાન, રાહુલ-તેજસ્વીના મંચ પરથી પીએમ મોદીના માતાને અપશબ્દો કહેવામાં આવ્યા હતા. ત્યારથી, ભાજપ સતત વિરોધ કરી રહ્યું છે.
