હવામાન વિભાગે આગામી ત્રણ કલાક માટે મુંબઈમાં વરસાદ માટે રેડ એલર્ટ જારી કર્યું છે. આ દરમિયાન, 40 કિમી પ્રતિ કલાકની ઝડપે પવન ફૂંકવાની સાથે ભારે વરસાદ પડી શકે છે. વિભાગે આગામી 3 દિવસ સુધી પૂર્વોત્તર રાજ્યો અને મહારાષ્ટ્રમાં ભારે વરસાદની આગાહી કરી છે.

ઉન્નાવમાં ગંગા કિનારે આવેલા 80 ગામો પૂરની ઝપેટમાં છે. રસ્તાઓ પર હોડીઓ દોડી રહી છે. મણિપુરમાં ભારે વરસાદને કારણે રવિવારે અનેક જિલ્લાઓમાં પૂર અને ભૂસ્ખલનની ઘટનાઓ બની હતી. તેલંગાણા અને ઉત્તરાખંડમાં ભારે વરસાદ પડ્યો હતો.

હિમાચલ પ્રદેશમાં ભારે વરસાદ અને ભૂસ્ખલનને કારણે જૂનથી અત્યાર સુધીમાં 404 લોકોના મોત થયા છે. પંજાબમાં વરસાદ અને પૂરને કારણે અત્યાર સુધીમાં 14000 કરોડ રૂપિયાનું નુકસાન થયું છે.

હવામાન વિભાગના જણાવ્યા અનુસાર, પશ્ચિમ રાજસ્થાનથી ચોમાસાની વિદાય રવિવારે નિર્ધારિત સમય કરતાં 3 દિવસ વહેલા શરૂ થઈ ગઈ છે. ચોમાસું રાજસ્થાનના શ્રી ગંગાનગર, નાગૌર, જોધપુર અને બિકાનેરથી વિદાય લઈ ચૂક્યું છે.

આગામી બે-ત્રણ દિવસમાં, પંજાબ અને ગુજરાતના કેટલાક ભાગોમાંથી ચોમાસુ વિદાય લેવાનું શરૂ કરશે. જ્યારે, મધ્યપ્રદેશમાં ચોમાસુ વધુ બે અઠવાડિયા સુધી રહેશે.

15 ઓક્ટોબર સુધીમાં દેશના મોટાભાગના ભાગોમાંથી ચોમાસુ સંપૂર્ણપણે વિદાય લેશે. જ્યારે દક્ષિણ કર્ણાટક, આંધ્રપ્રદેશ, કેરળ, તમિલનાડુ અને પુડુચેરીમાં વરસાદ ચાલુ રહી શકે છે.