પાકિસ્તાની વાયુસેનાએ પોતાના જ લોકો પર ફેંક્યા બોમ્બ
પાકિસ્તાની વાયુસેનાએ રવિવારે રાત્રે 2 વાગ્યે ચીની J-17 વિમાનોમાંથી આઠ લેસર-ગાઇડેડ બોમ્બ પોતાના જ નાગરિકો પર ફેંક્યા. આ હુમલામાં ખૈબર પખ્તુનખ્વા પ્રાંતના તિરાહ ખીણના એક ગામને નિશાન બનાવવામાં આવ્યું હતું. મીડિયા અહેવાલો અનુસાર, હવાઈ હુમલામાં મહિલાઓ અને બાળકો સહિત આશરે 30 લોકો માર્યા ગયા હતા.
સૈન્યનું કહેવું છે કે આ હુમલો તહરીક-એ-તાલિબાન પાકિસ્તાન (TTP)ના બોમ્બ બનાવવાના પ્લાન્ટને નિશાન બનાવ્યો હતો. સ્થાનિક પોલીસે મીડિયાને જણાવ્યું હતું કે, બે TTP કમાન્ડર, અમન ગુલ અને મસૂદ ખાન, બોમ્બ બનાવી રહ્યા હતા અને તેમને મસ્જિદોમાં છુપાવી રહ્યા હતા. હુમલાના કેટલાક વીડિયો સોશિયલ મીડિયા પર ફરતા થઈ રહ્યા છે, પરંતુ તેની ચકાસણી કરવામાં આવી નથી.
દરમિયાન, વિસ્તારના રહેવાસીઓનું કહેવું છે કે સરકાર અને સૈન્ય યોગ્ય માહિતી વિના હુમલા કરી રહ્યા છે, જેના પરિણામે નાગરિકોના મોત થઈ રહ્યા છે. જૂનમાં ડ્રોન હુમલામાં એક બાળકનું મોત થયા બાદ એમ્નેસ્ટી ઇન્ટરનેશનલે પાકિસ્તાન સરકારની ટીકા કરી હતી. માર્ચમાં ખૈબરના કાટલંગમાં પણ 10 નાગરિકો માર્યા ગયા હતા.
તહરીક-એ-તાલિબાન પાકિસ્તાન (TTP): પાકિસ્તાની બળવાખોર જૂથ
_ 2001માં જ્યારે અમેરિકાએ અફઘાનિસ્તાન પર હુમલો કર્યો ત્યારે ઘણા લડવૈયાઓ પાકિસ્તાનના આદિવાસી વિસ્તારોમાં છુપાઈ ગયા હતા.
_ 2007માં બૈતુલ્લાહ મહસુદે 13 બળવાખોર જૂથોને એક કરીને તહરીક-એ-તાલિબાન પાકિસ્તાન (TTP)ની રચના કરી.
_ આમાં પાકિસ્તાન આર્મી વિરોધી જૂથના લોકો મોટી સંખ્યામાં સામેલ હતા.
_ તેમની લડાઈ પાકિસ્તાનની સેના અને સરકાર સામે છે.
_ આ સંગઠન સાથે જોડાયેલા ઘણા સમર્થકો પાકિસ્તાની સેનામાં હાજર છે.
_ અમેરિકાએ પાકિસ્તાનને ચેતવણી આપી છે કે TTP પરમાણુ હથિયારો સુધી પહોંચી શકે છે.
TTP 2022થી પાકિસ્તાન પર હુમલાઓ બનાવશે વધુ તીવ્ર
પાકિસ્તાન વારંવાર આરોપ લગાવે છે કે પાકિસ્તાની તાલિબાન આતંકવાદી હુમલાઓ કરવા માટે અફઘાનિસ્તાનની ભૂમિનો ઉપયોગ કરે છે, જે આરોપ અફઘાનિસ્તાન નકારે છે.
2021માં તાલિબાનના અફઘાનિસ્તાનમાં પાછા ફર્યા પછી પાકિસ્તાની તાલિબાન (TTP) વધુ મજબૂત બન્યું છે. TTPએ નવેમ્બર 2022માં પાકિસ્તાન સાથે એકપક્ષીય રીતે યુદ્ધવિરામનો અંત લાવ્યો હતો. આ પછી તેણે પાકિસ્તાનમાં હુમલાઓ તીવ્ર બનાવ્યા છે.
ગ્લોબલ ટેરરિઝમ ઇન્ડેક્સમાં પાકિસ્તાન બીજા ક્રમે
ગ્લોબલ ટેરરિઝમ ઇન્ડેક્સ 2025 મુજબ, પાકિસ્તાન બુર્કિના ફાસો પછી વિશ્વમાં બીજા ક્રમનો સૌથી વધુ આતંકવાદથી પ્રભાવિત દેશ બની ગયો છે, જ્યારે 2024માં તે ચોથા સ્થાને હતો.
- TTP હુમલાઓમાં 90% વધારો થયો છે.
- BLA હુમલાઓમાં 60%નો વધારો થયો છે.
- IS-Kએ હવે પાકિસ્તાની શહેરોને પણ નિશાન બનાવવાનું શરૂ કરી દીધું છે.
રિપોર્ટ અનુસાર, ખૈબર પખ્તુનખ્વા અને બલૂચિસ્તાન પાકિસ્તાનના સૌથી વધુ આતંકવાદથી પ્રભાવિત વિસ્તારો છે, જે દેશમાં થતી તમામ આતંકવાદી ઘટનાઓમાં 90% હિસ્સો ધરાવે છે.
આ અહેવાલમાં સતત બીજા વર્ષે તહરીક-એ-તાલિબાન પાકિસ્તાનને પાકિસ્તાનનું સૌથી ખતરનાક આતંકવાદી સંગઠન તરીકે સ્થાન આપવામાં આવ્યું છે. 2024માં આ જૂથે 482 હુમલા કર્યા હતા, જેમાં 558 લોકોના મોત થયા હતા, જે 2023 કરતા 91% વધુ છે.
સરહદ વિવાદ પર પાકિસ્તાન-તાલિબાન વચ્ચે અથડામણમાં 2,50,000 લોકોને ઘર છોડવાનો આદેશ આપ્યો હતો
Image Gallery
