બ્રિટિશ PM સ્ટારમર આજે મળશે મોદીને: મુંબઈમાં ફિનટેક કાર્યક્રમમાં પણ આપશે હાજરી
આજે બ્રિટિશ વડાપ્રધાન કીર સ્ટારમરની બે દિવસની ભારત મુલાકાતનો છેલ્લો દિવસ છે. તેઓ આજે સવારે લગભગ 10 વાગ્યે પીએમ મોદી સાથે મુલાકાત કરશે અને મુક્ત વેપાર કરાર (FTA) ના વહેલીતકે અમલીકરણ અંગે ચર્ચા કરશે.પીએમ મોદી સાથેની દ્વિપક્ષીય વાતચીતમાં વેપાર, સુરક્ષા, ટેકનોલોજી અને શિક્ષણ જેવા મુદ્દાઓ પણ આવરી લેવામાં આવશે. બંને નેતાઓ "વિઝન 2030" હેઠળ ભારત-યુકે સંબંધોને મજબૂત બનાવવા પર ભાર મૂકશે.
ત્યારબાદ મોદી અને સ્ટારમર જિયો વર્લ્ડ સેન્ટર જશે જ્યાં તેઓ વિશ્વના સૌથી મોટા ફિનટેક ઇવેન્ટ ગ્લોબલ ફિનટેક ફેસ્ટ 2025માં ભાગ લેશે.આ કાર્યક્રમમાં ફિનટેક કંપનીઓ, નીતિ નિર્માતાઓ, બેંકરો અને ઈનોવેટર્સ સાથે બેઠકો યોજાશે. સ્ટારમર અને મોદી ડિજિટલ પેમેન્ટ, ટેકનોલોજી અને વ્યવસાયના ભવિષ્ય અંગે ચર્ચા કરશે.
મોદી-સ્ટાર્મર બેઠકમાં 4 મહત્વપૂર્ણ મુદ્દાઓ...
- વેપાર અને રોકાણ: બંને દેશોએ હાલમાં એક મુખ્ય વેપાર કરાર (CETA) પર હસ્તાક્ષર કર્યા છે. આના પર વેપારને વધુ વિસ્તૃત કરવા માટે ચર્ચા કરવામાં આવશે, જેનાથી દુકાનો, બિઝનેસ અને નોકરીઓમાં વધારો થશે.
- ટેકનોલોજી અને ઈનોવેશન: બંને દેશો ફિનટેક (ડિજિટલ મની ટ્રાન્ઝેક્શન), આર્ટિફિશિયલ ઇન્ટેલિજન્સ (AI), ક્વોન્ટમ કોમ્પ્યુટિંગ (નવા પ્રકારના સુપરફાસ્ટ કોમ્પ્યુટર્સ) અને સાયબર સુરક્ષા (ઓનલાઇન સુરક્ષા) જેવાં ક્ષેત્રોમાં સાથે મળીને કામ કરશે.
- સંરક્ષણ અને સુરક્ષા: આતંકવાદ અટકાવવા, ખાલિસ્તાની પ્રવૃત્તિઓ પર નજર રાખવા અને આર્થિક ગુનેગારોને પકડવા અંગે ચર્ચા થશે.
- જળવાયુ, ઊર્જા, આરોગ્ય, શિક્ષણ અને પરસ્પર સંબંધો: બંને દેશો પર્યાવરણનું રક્ષણ, સ્વચ્છ ઊર્જા, સારી આરોગ્યસંભાળ, શિક્ષણ અને લોકો વચ્ચે મિત્રતા વધારવા પર પણ ધ્યાન કેન્દ્રિત કરશે.
જુલાઈમાં ભારત-યુકે વચ્ચે FTA પર હસ્તાક્ષર થયા હતા
ભારત અને યુકેએ આ વર્ષે જુલાઈમાં મુક્ત વેપાર કરાર (FTA) પર હસ્તાક્ષર કર્યા હતા. આ કરારનો ઉદ્દેશ્ય 2030 સુધીમાં દ્વિપક્ષીય વેપારને બમણો કરીને $120 બિલિયન કરવાનો છે.
FTA યુકેમાં કાપડ, ચામડું અને કૃષિ ઉત્પાદનો જેવા ભારતીય ઉત્પાદનોનું વેચાણ સરળ બનાવશે. સ્ટાર્મરની મુલાકાત બંને દેશો વચ્ચેના વ્યાપારી સંબંધોને આગળ વધારવા માટે મહત્વપૂર્ણ માનવામાં આવે છે.
બેંગલુરુમાં રોકાણ અને ટેકનોલોજી વિશે વાત કરશે
મુંબઈ પછી કીર સ્ટાર્મર ભારતના ટેક્નોલોજી હબ બેંગલુરુ જશે, જ્યાં તેઓ રોકાણ અને ટેકનોલોજી અંગે ચર્ચા કરશે.તેમનો ઉદ્દેશ ભારત-યુકે ટેક્નોલોજી સુરક્ષા પહેલ (TSI)ને વેગ આપવાનો છે. આમાં AI, ક્વોન્ટમ કોમ્પ્યુટિંગ અને બાયોટેક જેવાં ક્ષેત્રોનો સમાવેશ થાય છે. FTA પછી રોકાણ વધારવા પર ખાસ ધ્યાન કેન્દ્રિત કરવામાં આવશે.
Image Gallery
