સૌરાષ્ટ્રના 6 જિલ્લામાં 9 નવા સબ ડિવિઝન મંજૂર થતા હવે અઢી લાખ ગ્રાહકોને ત્યાં લાઈટ જશે તો ઝડપથી આવી જશે. સૌરાષ્ટ્ર-કચ્છમાં 12 જિલ્લાના 61 લાખ જેટલા ગ્રાહકોને વીજપુરવઠો પૂરો પાડતા PGVCLની કચેરી હેઠળ હાલ 46 જેટલાં ડિવિઝનમાં 281 સબ ડિવિઝન આવેલા છે. અંદાજે પાંચથી છ મહિનામાં રાજકોટ રૂરલમાં 2, સુરેન્દ્રનગરમાં 2, જામનગરમાં 2 ઉપરાંત જૂનાગઢ, ભાવનગર અને પોરબંદરમાં 1-1 નવા સબ ડિવિઝન નિર્માણ પામશે. એને લીધે ત્યાંના ગ્રાહકોને ત્યાં લાઈટ જશે તો તેનો વીજ ફોલ્ટ શોધવા અને રિપેરિંગ કરવામાં 20 ટકા ઝડપ આવશે. અહીં ગૂલ થયેલી લાઈટ ઝડપથી આવતા 2.50 ગ્રાહકોને ફાયદો થશે.

નવી સબ ડિવિઝન કચેરીમાં 40 લોકોના સ્ટાફની ફાળવણી 

PGVCLના મેનેજિંગ ડિરેક્ટર કેતન જોશી પાસેથી મળેલી માહિતી મૂજબ, નવી સબ ડિવિઝન કચેરી બનતા તેમાં અધિકારી સહિત 40 વ્યક્તિના નવા સ્ટાફની ફાળવણી કરવામાં આવે છે. જેમાં 1 ડેપ્યુટી એન્જિનિયર, 2 જુનિયર એન્જિનિયર, એકાઉન્ટ સાઈડમાં 1 ડેપ્યુટી સિનિયર આસિસ્ટન્ટ, 6 જુનિયર આસિસ્ટન્ટ, લાઈટ ઇન્સ્પેક્ટર, લાઈનમેન, આસિસ્ટન્ટ લાઇનમેન અને હેલ્પરનો સમાવેશ થાય છે.

નવુ સબ ડિવિઝન બનતા ગ્રાહકોના ઘરે અથવા દુકાન કે કારખાનામાં લાઈટ ડૂલ થઈ જાય તો વીજ ફોલ્ટનું તાત્કાલિક રિપેરિંગ થશે અને વીજ પુરવઠો ઝડપથી પૂરો પાડી શકાશે. નવા સબ ડિવિઝન જ્યાં નિર્માણ પામવાના છે, તેનો ગ્રાહકોને સૌથી વધુ લાભ ચોમાસામાં મળશે, કારણ કે, વરસાદમાં વારંવાર લાઈટ ડૂલ થઈ જાય છે અને કલાકો સુધી લોકોને હેરાનગતિ ભોગવી પડે છે, પરંતુ નવા સબ ડિવિઝનથી સ્ટાફમાં વધારો થતાં વીજ ફોલ્ટ રિપેરિંગ તાત્કાલિક થશે અને ઓછો સમય લાઇટ વિના વિતાવવો પડશે.

નવા સબ ડિવિઝનથી કયા-કયા ફાયદા?