દિલ્હી બ્લાસ્ટ: CCTV ફૂટેજમાં દેખાતી વ્યક્તિ આતંકવાદી ડૉ. ઉમર:દાવો- ફરીદાબાદ ટેરર મોડ્યૂલ બાદ ઉતાવળમાં હતો, ધરપકડ ટાળવા માટે બ્લાસ્ટ કર્યો
જમ્મુ અને કાશ્મીર પોલીસને ફરીદાબાદ મોડ્યૂલમાં સામેલ ચાર ડોક્ટરો વિશે માહિતી મળી હતી. સોમવાર સુધીમાં ઉત્તરપ્રદેશ અને હરિયાણામાંથી એક મહિલા ડોક્ટર સહિત ત્રણ ડોક્ટરની ધરપકડ કરવામાં આવી હતી. પોલીસે તેમનાં ઠેકાણાંમાંથી 2,900 કિલો વિસ્ફોટકો પણ જપ્ત કર્યા હતા. ડોક્ટર ઉમર ચોથા ડોક્ટર હતો, જેને પોલીસ શોધી રહી હતી.
પોલીસસૂત્રોના જણાવ્યા અનુસાર, આ ધરપકડો પછી ડૉ. ઉમર કાં તો પોતાની પાસે રહેલા વિસ્ફોટકોને સલામત સ્થળે લઈ જવાનો પ્રયાસ કરી રહ્યો હતો અથવા ધરપકડના ડરથી તેણે દિલ્હીમાં આત્મઘાતી હુમલો કર્યો હતો.
દિલ્હી વિસ્ફોટોમાં અત્યારસુધીમાં નવ લોકોનાં મોત થયાં છે અને 24 લોકો ઘાયલ થયા છે. પોલીસ મૃતકોના ડીએનએ ટેસ્ટ કરાવી રહી છે, જેથી નક્કી કરી શકાય કે ડૉક્ટર ઉમર એમાં સામેલ હતો કે નહીં.
ઉમર અઢી કલાક સુધી ગાડીમાં બેઠો રહ્યો, એક ક્ષણ માટે પણ ગાડીમાંથી ઊતર્યો નહીં
દિલ્હી પોલીસ સ્પેશિયલ સેલનાં સૂત્રોના જણાવ્યા અનુસાર, ડૉ. ઉમર વિસ્ફોટ પહેલાં લગભગ અઢીથી ત્રણ કલાક સુધી પાર્કિંગમાં પાર્ક કરેલી તેની i-20 કારમાં બેઠો રહ્યો હતો. તેઓ એક ક્ષણ માટે પણ કાર છોડીને બહાર નીકળ્યો નહોતો. પોલીસસૂત્રોના જણાવ્યા અનુસાર, ડૉ. ઉમર પાર્કિંગમાં કોઈની રાહ જોઈ રહ્યો હતો અથવા સૂચનાની રાહ જોઈ રહ્યો હતો. લાલ કિલ્લા પાસે થયેલા વિસ્ફોટના સંદર્ભમાં દિલ્હી પોલીસે ગેરકાયદે પ્રવૃત્તિઓ (નિવારણ) અધિનિયમ (UAPA) હેઠળ FIR નોંધી છે
રવિવાર અને સોમવારે, જમ્મુ અને કાશ્મીર પોલીસે હરિયાણાના ફરીદાબાદ અને ઉત્તરપ્રદેશના લખનઉથી 2,900 કિલો વિસ્ફોટકો જપ્ત કર્યા. આ કાર્યવાહીમાં ફરીદાબાદના ડોક્ટર ડૉ. મુઝમ્મિલ શકીલ અને લખનઉની મહિલા ડોક્ટર શાહીન શાહિદની ધરપકડ કરવામાં આવી હતી.
મુઝમ્મિલ શકીલના રૂમમાંથી 360 કિલો વિસ્ફોટકો અને એક એસોલ્ટ રાઇફલ મળી હતી. આ દરમિયાન કાશ્મીરમાં એક મહિલા ડૉક્ટર શાહીનની કારમાંથી એક AK-47 રાઇફલ અને જીવંત દારૂગોળો મળ્યો હતો. ડૉ. મુઝમ્મિલ ફરીદાબાદની અલ ફલાહ યુનિવર્સિટીમાં ભણાવતો હતો. તે પુલવામાના કોઇલનો રહેવાસી છે.
ડૉ. શાહીન તેની ગર્લફ્રેન્ડ છે. મુઝમ્મિલ ડૉ. શાહીનની કારનો ઉપયોગ કરતો હતો. તેણે ત્રણ મહિના પહેલાં ફરીદાબાદના ધૌજ ગામમાં એક રૂમ ભાડે લીધો હતો, જોકે તેના મકાનમાલિકે જણાવ્યું હતું કે મુઝમ્મિલ ત્યાં રહેતો નથી અને તેણે ફક્ત પોતાનો સામાન રાખવા માટે રૂમ ભાડે રાખ્યો હતો.
અગાઉ 7 નવેમ્બરના રોજ જમ્મુ અને કાશ્મીર પોલીસે ઉત્તરપ્રદેશના સહારનપુરથી ડૉ. આદિલ અહેમદની ધરપકડ કરી હતી. તે અનંતનાગનો રહેવાસી છે. આદિલ અનંતનાગની સરકારી મેડિકલ કોલેજ (GMC) માં પ્રેક્ટિસ કરતો હતો. તેણે 2024માં ત્યાંથી રાજીનામું આપ્યું અને ત્યાર બાદ સહારનપુરમાં પ્રેક્ટિસ શરૂ કરી
Image Gallery
