‘હું માત્ર વન ડે જ રમીશ’:કોહલીએ પોતાની ઇનિંગ્સ પર કહ્યું- હું ગેમનો આનંદ માણવા ઇચ્છતો હતો, વર્લ્ડ કપના સવાલ પર કોચે કહ્યું- આવા સવાલની જરૂર શું છે?
હું માનસિક રીતે મજબૂત- કોહલી મેચ પછી વિરાટ કોહલીએ કહ્યું કે તેની તૈયારી સંપૂર્ણપણે માનસિક હોય છે. તેણે જણાવ્યું કે જ્યાં સુધી શરીરની સ્થિતિ બરાબર રહે છે અને તે માનસિક રીતે શાર્પ અનુભવે છે, ત્યાં સુધી તેને પોતાના પર વિશ્વાસ છે. કોહલીએ કહ્યું કે તે મેચ પહેલા એક દિવસનો બ્રેક લે છે, કારણ કે હવે 37 વર્ષની ઉંમરે રિકવરી માટે સમયની પણ જરૂર હોય છે.
તેણે કહ્યું- મને ખબર છે ક્યારે આરામ કરવો છે અને ક્યારે રમવું છે. તે 300થી વધુ વનડે રમી ચૂક્યો છે. કોહલીના મતે, જો તમે ગેમના ટચમાં છો અને નેટ્સ પર એક-બે કલાક બેટિંગ કરી શકો છો, તો તમે જાણો છો કે તમે યોગ્ય સ્થિતિમાં છો.
વિરાટના ભવિષ્ય પર સવાલ કરવાની જરૂર નથી- બેટિંગ કોચ ટીમ ઈન્ડિયાના બેટિંગ કોચ સિતાંશુ કોટકે કહ્યું- વિરાટ કોહલીની ફિટનેસ અને ફોર્મ જોઈને તેમના ભવિષ્ય પર સવાલ ઉઠાવવાનું કોઈ કારણ નથી.
વર્લ્ડ કપ 2027માં કોહલીના રમવા અંગે જ્યારે સવાલ પૂછવામાં આવ્યો, ત્યારે કોટકે કહ્યું, મને સમજાતું નથી કે આના પર ચર્ચા કરવાની જરૂર કેમ છે. તે ખૂબ સારી બેટિંગ કરી રહ્યો છે. મને નથી લાગતું કે આપણે તેના ભવિષ્ય પર વાત કરવાની જરૂર છે. તે જે રીતે રમી રહ્યો છે અને જે રીતે પોતાની ફિટનેસ જાળવી રાખે છે, તેમાં કોઈ પણ પ્રકારનો સવાલ ઊભો થઈ જ ન શકે.
કોટકે એમ પણ કહ્યું કે ટીમ મેનેજમેન્ટ ભવિષ્યની ચર્ચામાં નથી ફસાઈ રહ્યું અને હાલમાં વર્તમાન પર ધ્યાન કેન્દ્રિત કરી રહ્યું છે. તેના મતે રોહિત અને વિરાટ બંને ટીમના મહત્ત્વના ખેલાડીઓ છે અને મેદાન પર અનુભવ શેર કરીને યુવા ખેલાડીઓને સતત માર્ગદર્શન આપી રહ્યા છે.
BCCI અધ્યક્ષે પણ વિરાટ-રોહિતની પ્રશંસા કરી BCCI અધ્યક્ષ મિથુન મન્હાસે રાંચીમાં દક્ષિણ આફ્રિકા સામેની પ્રથમ વનડેમાં ભારતની 17 રનની રોમાંચક જીતની પ્રશંસા કરી. તેમણે વિરાટ કોહલીની ઇનિંગ્સ સાથે રોહિત શર્મા, કેએલ રાહુલ અને કુલદીપ યાદવના પ્રદર્શનની પણ પ્રશંસા કરી.
મન્હાસે X પર લખ્યું કે વિરાટની શાનદાર બેટિંગ અને રોહિત-રાહુલનો મજબૂત સહયોગ ટીમને સારી સ્થિતિમાં લઈ ગયો. કુલદીપ અને હર્ષિત રાણાના મહત્વપૂર્ણ યોગદાનથી ભારતે સિરીઝમાં 1-0ની લીડ મેળવી.
ભારત સિરીઝમાં 1-0થી આગળ ભારતે સાઉથ આફ્રિકાને 17 રનથી હરાવીને ત્રણ મેચની સિરીઝમાં 1-0ની લીડ મેળવી લીધી. વિરાટ કોહલીની 135 રનની સદીની ઇનિંગ્સ બાદ ફાસ્ટ બોલર કુલદીપ યાદવની ચાર અને હર્ષિત રાણાની ત્રણ વિકેટે ભારતની જીત સુનિશ્ચિત કરી દીધી.
કોહલીએ 120 બોલમાં 11 ચોગ્ગા અને 7 છગ્ગા ફટકાર્યા. રોહિત શર્મા સાથે બીજી વિકેટ માટે 136 રનની ભાગીદારીએ ટીમને મજબૂત શરૂઆત આપી. JSCA સ્ટેડિયમની બેટિંગ-ફ્રેન્ડલી પિચ પર ભારતે 8 વિકેટે 349 રન બનાવ્યા.
કાર્યકારી કેપ્ટન કેએલ રાહુલે 56 બોલમાં 60 રન જોડ્યા, જ્યારે રવીન્દ્ર જાડેજાએ છેલ્લા ઓવરોમાં 20 બોલમાં 32 રન બનાવીને સ્કોરને મજબૂત કરવામાં મહત્વપૂર્ણ યોગદાન આપ્યું.
