હવામાન વિભાગ દ્વારા 14 જુલાઈ સુધી રાજ્યમાં વરસાદને લઈને આગાહી કરી છે.જેમાં આજે અને આવતીકાલે બે દિવસ છૂટોછવાયો વરસાદ રહેશે. હાલ રાજ્યમાં વરસાદનું જોર ઘટ્યું છે. આજે 6 જિલ્લામાં યલો એલર્ટ અપાયું છે. દક્ષિણ ગુજરાતમાં ભારે વરસાદની શક્યતા છે. અન્ય ઝોનમાં વરસાદની કોઈ આગાહી અપાઈ નથી. જ્યારે 10 જુલાઈના રોજ માત્ર નવસારી અને વલસાડમાં જ વરસાદની આગાહી કરાઈ છે. જ્યારે હવામાન વિભાગ દ્વારા આગામી એક વાગ્યા સુધી નવસારી, ડાંગ અને વલસાડમાં ઓરેન્જ એલર્ટ આપવામાં આવ્યું છે.

સૌથી વધુ કુકરમુંડામાં ખાબક્યો 

છેલ્લા 24 કલાકમાં એટલે કે મંગળવાર સવારે 6 વાગ્યાથી બુધવારે સવારે 6 વાગ્યા સુધી રાજ્યના 126 તાલુકાઓમાં વરસાદ નોંધાયો છે. જેમાં સૌથી વધુ તાપીના કુકરમુંડામાં 5.40 ઇંચ, નિઝરમાં 2.5 ઇંચ અને સુરતના ઉમરપાડામાં 1.57 ઇંચ વરસાદ નોંધાયો છે.

હવામાન વિભાગ દ્વારા આગામી 3 દિવસ માછીમારોને દરિયો ન ખેડવા સૂચના આપવામાં આવી છે. જ્યારે 40થી 50 કિ.મી પ્રતિ કલાકની ઝડપે પવન ફૂંકાવાની શક્યતા દર્શાવવામાં આવી છે.

રાજ્યમાં જૂન મહિનામાં 110 મિમીની જરૂરિયાત સામે 288 મિમી વરસાદ 

સામાન્ય રીતે ગુજરાતમાં જૂન મહિનામાં સરેરાશ 110.8 મિમી (4.43 ઇંચ) વરસાદની જરૂરિયાત હોય છે. એની સામે 288.7 મિમી (11.55 ઇંચ) વરસાદ મળ્યો છે. જરૂરિયાત કરતાં 161% વધુ વરસાદે 44 વર્ષનો રેકોર્ડ તોડ્યો છે. 125 વર્ષના ઇતિહાસમાં જૂન મહિનામાં સૌથી વધુ 298.3 મિમી (11.93 ઇંચ) વરસાદ 1980 માં નોંધાયો હતો, એટલે કે આ વખતે 44 વર્ષ બાદ સૌથી વધુ વરસાદ સાથે 125 વર્ષનો બીજો સૌથી વધુ વરસાદનો રેકોર્ડ બન્યો છે. 2024માં જૂનમાં રાજ્યમાં મેઘરાજાની 9 દિવસની હાજરી સામે ચાલુ સિઝનમાં જૂનના 16 દિવસની હાજરી આપી છે. રાજ્યના 5 ઝોનમાં દક્ષિણ ગુજરાતમાં સૌથી વધુ 19 દિવસ અને કચ્છમાં સૌથી ઓછા 8 દિવસ મેઘરાજા વરસ્યા છે. ઉલ્લેખનીય છે કે સામાન્ય રીતે જે દિવસે 2.5 મિમી કે તેથી વધુ વરસાદ વરસે એને વરસાદનો 1 દિવસ ગણવામાં આવે છે.

રાજ્યના 5 ઝોનમાં સિઝનના વરસાદની સ્થિતિ

ગુજરાતમાં જુલાઈમાં પણ સામાન્યથી વધુ વરસાદની શક્યતા 

ભારતીય હવામાન વિભાગે સોમવારે રજૂ કરેલા જુલાઇ મહિનાના પૂર્વાનુમાન મુજબ, દેશમાં 106%થી વધુ વરસાદની શક્યતા છે. ગુજરાતમાં જુલાઇનું પૂર્વાનુમાન જોઇ રાજ્યના બાકીના વિસ્તારોમાં સામાન્યથી વધુ વરસાદની શક્યતા છે, એટલે કે મોટા ભાગના વિસ્તારોમાં સારા વરસાદના સંકેતો છે.