સાયબર ફ્રોડનું એપી સેન્ટર બન્યું સુરત:270 દિવસમાં 2600 કરોડથી વધુનું ફ્રોડ
સુરત ટેક્સટાઇલ અને ડાયમંડ સિટી સુરત હવે આંતરરાષ્ટ્રીય સાયબર ફ્રોડ કરનારા માફિયાઓ માટે 'હબ' બની રહ્યું હોવાનું સામે આવ્યું છે. કારણ કે, છેલ્લા 9 મહિનામાં જ સુરત પોલીસે મસમોટા સાયબર રેકેટનો પર્દાફાશ કર્યો છે. જેમાં 2600 કરોડથી વધુના ટ્રાન્જેકશન જે 2007 બેંક ખાતામાં થયા હતા તેમાંના 70 ટકા બેંક ખાતા સુરતના હોવાનું સામે આવ્યું છે. આમ 1,405 એકાઉન્ટ સુરતના છે. આ એકાઉન્ટ્સમાં
વિદેશમાં બેસેલા સાયબર માફિયાઓ સુરતના લોકોની મદદ લઈ આ બેંક ખાતાનો સાયબર ક્રાઈમ માટે ઉપયોગ કરી રહ્યા છે ત્યારે હવે તેને અટકાવવા સુરત પોલીસે બેંકો સાથે મળી SOP તૈયાર કરવાનો નિર્ણય કર્યો છે.
સાયબર ફ્રોડના રેકેટની તપાસમાં સુરત પોલીસને કેટલીક ચોંકાવનારી માહિતી મળી છે. સુરતના જે બેંક એકાઉન્ટનો ઉપયોગ થયો છે તેમાં કેટલાક એકાઉન્ટ હોલ્ડરોએ તો કમિશન પર એકાઉન્ટ આપ્યા હતા. જ્યારે કેટલાક એકાઉન્ટ હોલ્ડરની જાણ બહાર જ તેના નામે ખાતા ખોલી સાયબર ક્રાઈમ માટે તેનો ઉપયોગ કરાયો હોવાનું સામે આવ્યું છે.
કરોડોના થતા સાયબર ફ્રોડમાં સુરતમાં ખૂલતા બેંક ખાતાનો મહત્વનો રોલ ચાઈનીઝ ગેંગ દ્વારા દેશભરમાં સાયબર ફ્રોડની ઘટનાઓને અંજામ આપવામાં આવી રહ્યો છે. જેમાં સૌથી મહત્વનો રોલ સુરતમાં ખોલવામાં આવી રહેલા બેંક એકાઉન્ટનો છે. સુરત ઔદ્યોગિક શહેર છે. અહીં અન્ય રાજ્યોમાંથી લોકો રોજગારી માટે આવતા હોય છે અને મોટી સંખ્યામાં રોજગાર માટે આવેલા શ્રમિકો એટલા ભણેલા હોતા નથી કે તેઓને ખબર પડી શકે કે, તેમના બેંક એકાઉન્ટનો ઉપયોગ કઈ રીતે થવાનો છે. આ જ કારણ છે કે સાયબર માફિયાઓ સુરતમાં સૌથી મોટી સંખ્યામાં બેંક એકાઉન્ટ અલગ-અલગ લોકોના નામે ખોલાવતા હોય છે. બેંક એકાઉન્ટ ખોલવાના નામે તેમને 5,000 થી 10,000 રૂપિયા આપવામાં આવે છે અને ઘણા કિસ્સાઓમાં તો પોલીસ તપાસમાં એ પણ સામે આવ્યું છે કે લોકો પૈસાની લાલચમાં પણ બેંક એકાઉન્ટ ભાડેથી આપતા હોય છે.
કઈ રીતે ચાલે છે રેકેટ? સુરત પોલીસે અત્યાર સુધીમાં જેટલા પણ સાયબર ફ્રોડની ઘટનાઓમાં પર્દાફાશ કર્યા છે, તેમાં તમામનું આંતરરાષ્ટ્રીય કનેક્શન બહાર આવ્યું છે, ખાસ કરીને દુબઈ, ક્યુબા, થાઈલેન્ડ, સિંગાપોર, પાકિસ્તાન, મ્યાનમારનો સમાવેશ થાય છે. આ તમામ સાયબર ફ્રોડની ઘટનાઓ ચાઈનીઝ ગેંગ દ્વારા ચલાવવામાં આવે છે અને આ ફ્રોડને ચલાવવા માટે ભારત અને ખાસ કરીને સુરતના લોકોના બેંક એકાઉન્ટનો ઉપયોગ થઈ રહ્યો છે.
દેશભરમાં જે પણ સાયબર ફ્રોડની ઘટનાઓ અત્યાર સુધી સામે આવી છે તેમાં સાયબર ફ્રોડથી મેળવેલા કરોડો રૂપિયાના ટ્રાન્ઝેક્શન આજ ભાડેથી લીધેલા બેંક એકાઉન્ટમાં થતા હોય છે. સુરત પોલીસે અત્યારે સાયબર ફ્રોડ સામે મુહિમ શરૂ કરી છે, જેમાં ચારથી વધુ આવા મોટા કેસ સામે આવ્યા છે, જેમાં 100 કરોડથી લઈને 2050 કરોડ રૂપિયા સુધીના સાયબર ફ્રોડના ટ્રાન્ઝેક્શન થયા છે. અલગ અલગ ગેંગના લોકો અહીં લોકોને કમિશન આપીને બેંક એકાઉન્ટની વિગતો મેળવી લેતા હોય છે. ત્યારબાદ લોગીન અને પાસવર્ડ બનાવી વિદેશમાં બેસેલા માસ્ટરમાઈન્ડને આપી દેતા હોય છે. ત્યારબાદ સાયબર ક્રાઈમની શરૂઆત થતી હોય છે.
છેલ્લા નવ મહિનામાં સુરતમાં નોંધાયેલા સૌથી મોટા ચાર કેસ
- ઓક્ટોબર 2024 માસમાં સાયબર પોલીસે સૌથી પહેલા આંતરરાષ્ટ્રીય રેકેટ તરીકે સાયબર ફ્રોડની ઘટનાનો પર્દાફાશ કર્યો હતો. જેમાં મિલન દરજી સહિતની ધરપકડ કરવામાં આવી હતી. તેમની પાસેથી કુલ 1039 બેંક એકાઉન્ટ મળી આવ્યા હતા, જેના થકી તેઓએ 200 કરોડથી પણ વધુ સાયબર ફ્રોડની ઘટનાઓને અંજામ આપ્યો હતો. ખાસ કરીને દુબઈમાં બેસેલી ચાઈનીઝ ગેંગ માટે તે કાર્યરત હતો. આ તમામ બેંક એકાઉન્ટ મારફતે થયેલ સાયબર ફ્રોડની કુલ 1898 અરજીઓ સરકારી પોર્ટલ (NCCR) પર નોંધાયેલી છે.
- નવેમ્બર 2024માં ફરી એક વખત સુરત સાયબર સેલને ફરિયાદ મળી હતી કે, બેંક એકાઉન્ટ ખોટી રીતે ખોલાવવામાં આવે છે. આ ફરિયાદના આધારે પોલીસે રેડ કરી હતી અને નરેશ ધડુક સહિતની ગેંગને ઝડપી પાડી હતી. તપાસ દરમિયાન પોલીસને જાણવા મળ્યું હતું કે, આરોપીઓ પાસે 611 જેટલા બેંક એકાઉન્ટ છે, જેમાંથી 477 એવા બેંક એકાઉન્ટ છે જેની ઉપર NCCRમાં ફરિયાદ નોંધાવેલી છે. કુલ 222 કરોડના સાયબર ફ્રોડના પૈસા આ એકાઉન્ટમાંથી ટ્રાન્ઝેક્શન કરવામાં આવ્યા હતા અને આ ઓપરેશન દુબઈથી ચાલતું હતું.
- જૂન 2025 માં ઉધના પોલીસે ગુજરાતનો સૌથી મોટો સાયબર ફ્રોડ રેકેટનો પર્દાફાશ કર્યો હતો. કુલ 2050 કરોડ રૂપિયાના રેકેટમાં આરોપી કિરાત જાદવાણી પોતાના સાગરિતો સાથે મળીને કરંટ બેંક એકાઉન્ટ ખોલાવીને ક્યુબામાં બેસેલા રીચ પે નામના વ્યક્તિને આપતા હતા. અને ત્યાંથી આ એકાઉન્ટમાં સાયબર ફ્રોડથી મળેલા એમાઉન્ટને ટ્રાન્ઝેક્શન કરી તેને USDTમાં કન્વર્ટ કરી દેવામાં આવતા હતા. તમામને એક લાખથી લઈને સાત લાખ સુધીનું કમિશન આપી આ એકાઉન્ટ ખરીદવામાં આવતા હતા. NCCR પોર્ટલમાં આ એકાઉન્ટ વિરુદ્ધ 265 જેટલી ફરિયાદો નોંધાઈ છે. અલગ અલગ બેંકમાં 164 જેટલા કરંટ એકાઉન્ટ ખોલવામાં આવ્યા હતા.
- હાલમાં જ સુરત ક્રાઈમ બ્રાન્ચે પણ બિશ્નોઈ ગેંગના ત્રણ લોકોની ધરપકડ કરી છે, જે ખાસ કરીને સુરતમાં બેંક એકાઉન્ટ ખોલાવવા માટે આવ્યા હતા. આ ગેંગના બે સભ્યો પાસેથી 365 જેટલા સ્ક્રીનશોટ મળી આવ્યા છે, જેમાં પોલીસને જાણ થઈ છે કે આ નેક્સસ મ્યાનમાર અને પાકિસ્તાનથી ચાઈનીઝ ગેંગ દ્વારા ચલાવવામાં આવતું હતું. આ તમામ આરોપીઓ પાસેથી 193 જેટલા બેંક એકાઉન્ટ મળી આવ્યા છે, જેના થકી અત્યાર સુધીમાં આરોપીઓએ 100 કરોડથી પણ વધુ સાયબર ફ્રોડની રકમ ટ્રાન્ઝેક્શન કરી છે. આ બેંક એકાઉન્ટ ઉપર NCCRમાં 508 જેટલી ફરિયાદો નોંધાયેલી છે. સુરત ક્રાઈમ બ્રાંચે ઝડપેલા આરોપીઓ પાસેથી 193 બેંક ખાતા મળી આવ્યા હતા
ચાર કેસમાં NCCRમાં કુલ 3148 જેટલી ફરિયાદો થઈ આંતરરાષ્ટ્રીય સ્તરે ચાલતી સાયબર ફ્રોડની ઘટના ખૂબ જ ચિંતાજનક છે. માત્ર ચાર કેસની વાત કરવામાં આવે તો અત્યાર સુધીમાં 2600 કરોડ રૂપિયા સાયબર ફ્રોડના કુલ 2007 એકાઉન્ટમાં ટ્રાન્ઝેક્શન કરવામાં આવ્યા છે. જેની ઉપર NCCRમાં 3148 જેટલી ફરિયાદો થઈ છે. મોટી સંખ્યામાં, લગભગ 70 ટકા બેંક એકાઉન્ટ સુરતમાં ખોલવામાં આવ્યા હતા. કરંટ અને સેવિંગ એકાઉન્ટ અહીં ખોલીને સાયબર માફિયાઓને આપવામાં આવતા હતા અને ત્યાંથી વિદેશમાં બેસીને આ એકાઉન્ટમાંથી ID અને પાસવર્ડ મારફતે સાયબર ફ્રોડના પૈસા ટ્રાન્ઝેક્શન કરવામાં આવતા હતા.
એકાઉન્ટ ખોલવા માટે કયા લોકોને ટાર્ગેટ કરવામાં આવે છે? એકાઉન્ટ ખોલવા માટે ખાસ કરીને શ્રમિક વર્ગના લોકો, ગરીબ વર્ગના લોકો અને સુરતમાં ટેક્સટાઇલ અને ડાયમંડ ઇન્ડસ્ટ્રીઝ સાથે સંકળાયેલા લેબર વર્ગના લોકોને સૌથી વધારે ટાર્ગેટ કરવામાં આવતા હતા. અત્યાર સુધીની સાયબર પોલીસની તપાસમાં જાણવા મળ્યું છે કે સૌથી વધારે સુરતના સરથાણા, વરાછા, લસકાણા, પુણાગામ, કાપોદ્રા, રિંગરોડ, લિંબાયત, ગોડાદરા વિસ્તારમાંથી સૌથી વધારે લોકોને ટાર્ગેટ કરીને બેંક એકાઉન્ટ ખોલાવવામાં આવ્યા છે. જે પૈકીના બે લોકો સાથે ભાસ્કરે વાત કરી સાયબર માફીયાઓની મોડસ ઓપરેન્ડી જાણવાનો પ્રયાસ કર્યો.
મંદિરની બહાર ફૂલહાર વેચનાર 22 વર્ષીય યુવતીએ જણાવ્યું હતું કે, તેના કાકાને એક વ્યક્તિએ કહેલું કે,બેંક એકાઉન્ટ ખોલાવવાથી સહાય મળશે અને આ માટે એક એપ્લિકેશન ડાઉનલોડ કરવાની રહેશે. સહાય મળવાના નામે મારા કાકાએ મારા નામથી બેંક એકાઉન્ટ ખોલાવ્યું હતું. પરંતુ હાલમાં આજે લખનઉ સાયબર સેલ દ્વારા મને નોટિસ આપવામાં આવી છે અને જણાવવામાં આવ્યું છે કે, મારા એકાઉન્ટમાંથી સાયબર ફ્રોડના પૈસા ટ્રાન્ઝેક્શન થયા છે, જે અંગે મને કંઈ પણ ખબર નથી. મેં ક્યારેય પણ બેંક ખાતાનો ઉપયોગ પણ કર્યો નથી. હવે નોટિસ આવ્યા બાદ મારે લખનઉ જવું પડશે.
રિક્ષા ચલાવનાર પાસેથી પણ તમામ વિગતો મેળવીને સાયબર ફ્રોડ કરનારા લોકોએ જણાવ્યું હતું કે, બેંક એકાઉન્ટ ખોલાવવાથી તેમને લોન સહેલાઈથી મળી જશે. હાલ તેમની પાસે જે પણ ડોક્યુમેન્ટ છે તેના આધારે તેઓ બેંક એકાઉન્ટ ખોલી આપશે અને ટૂંક સમયમાં લોન મળી જશે. લોન મળશે તો તેઓ ટેક્સી ખરીદી શકશે અને રિક્ષા ચલાવવાનું છોડી શકશે. આ સાંભળીને તેઓએ પોતાના બેંક એકાઉન્ટ ખોલાવવા માટેની તમામ વિગતો આપી હતી, પરંતુ ત્યારબાદ તેમને ખબર પડી કે અચાનક જ બેંક એકાઉન્ટ સીઝ થઈ ગયું છે.
આ આખા રેકેટમાં સૌથી વધારે એવા લોકોને ટાર્ગેટ કરવામાં આવે છે જેમને બેંકની પ્રક્રિયા અંગે ખબર હોતી નથી. લોનના નામે અથવા તો કમિશનના નામે તેમની પાસેથી બેંકની માહિતી લઈ લેવામાં આવે છે અને ત્યારબાદ આ તમામ વિગતો વિદેશમાં બેસેલા સાયબર માફિયાઓને આપી દેવામાં આવે છે અને ત્યારબાદ ડિજિટલ અરેસ્ટ, ગેમિંગ, સહિતના અલગ અલગ સાયબર ફ્રોડની ઘટનામાં આ બેંક એકાઉન્ટને વાપરી તેમાંથી મલ્ટીપલ ટ્રાન્ઝેક્શન કરવામાં આવે છે.
