બે મહિનાના લગ્ન, બે દિવસના ગાળામાં આત્મહત્યા:પત્નીએ બેંગલુરુમાં, પતિએ નાગપુરમાં આવીને આત્મહત્યા કરી; શ્રીલંકાથી હનીમૂન છોડીને પાછા ફર્યા હતા
લગ્ન પહેલાં રિલેશનશિપને લઈને વિવાદ હતો
પોલીસના જણાવ્યા અનુસાર, સૂરજ બેંગલુરુના વિદ્યારણ્યપુરા વિસ્તારનો રહેવાસી હતો. તે એક ઓનલાઈન ડિલિવરી સર્વિસની ફ્રેન્ચાઈઝીનો માલિક હતો. ગણવી MBA ગ્રેજ્યુએટ હતી. બંનેના 29 ઓક્ટોબરે બેંગલુરુમાં ધામધૂમથી લગ્ન થયા હતા. લગ્ન પછી બંને થોડા દિવસ બેંગલુરુમાં સાથે રહ્યા હતા.
પછી બંને 10 દિવસના હનીમૂન પર શ્રીલંકા ગયા. શ્રીલંકામાં સૂરજને ગણવીના લગ્ન પહેલાંના એક રિલેશનશિપની જાણકારી મળી, જેને લઈને કપલ વચ્ચે વિવાદ શરૂ થયો. પછી બંને પાંચ દિવસમાં જ હનીમૂન છોડીને બેંગલુરુ પાછા ફર્યા.
ગણવીએ પિયર જઈને આત્મહત્યા કરી
મીડિયા રિપોર્ટ્સ અનુસાર, હનીમૂનથી પાછા ફર્યા બાદ બંને પરિવારોએ સમાધાન કરવાનો પ્રયાસ કર્યો, પરંતુ વાત બની નહીં. મહિલાના પરિવારનો આરોપ છે કે ગણવીને સાસરીમાં સતત મહેણાં-ટોણાં અને અપમાન સહન કરવું પડતું હતું. પરિવારના સન્માનને કારણે તે છૂટાછેડા માટે પણ તૈયાર નહોતી.
ગણવીના માતા-પિતા તેને 25 ડિસેમ્બરે પોતાની સાથે ઘરે લઈ ગયા. થોડા કલાકો પછી ગણવીએ ત્યાં ફાંસી લગાવી લીધી. તેને હોસ્પિટલમાં દાખલ કરવામાં આવી, જ્યાં સારવાર દરમિયાન તેનું મૃત્યુ થયું. ગણવીના પરિવારે સૂરજ અને તેના પરિવારજનો વિરુદ્ધ FIR નોંધાવી.
પોલીસના જણાવ્યા અનુસાર, કેસ નોંધાયા બાદ સૂરજ તેની માતા જયંતિ અને ભાઈ સંજય સાથે બેંગલુરુથી નીકળી ગયો. ત્રણેય પહેલા હૈદરાબાદ ગયા અને પછી 26 ડિસેમ્બરે નાગપુર પહોંચ્યા. રાત્રે લગભગ 9:30 વાગ્યે તેમણે એક હોટલમાં બે રૂમ બુક કર્યા.
પુત્રને ફાંસી પર લટકતો જોઈ માતાએ આત્મહત્યાનો પ્રયાસ કર્યો
રાત્રે લગભગ 12:30 વાગ્યે જયંતિ સૂરજના રૂમમાં આવી ત્યારે તેણે પુત્રને ફાંસી પર લટકતો જોયો. પુત્રને મૃત જોઈને તેણે પણ ફાંસી લગાવવાનો પ્રયાસ કર્યો. જોકે, ફંદો તૂટી ગયો અને તેની ચીસો સાંભળીને હોટલના કર્મચારીઓ ઘટનાસ્થળે એકઠા થઈ ગયા. ત્યાં જયંતિ બેભાન અવસ્થામાં મળી આવી.
જ્યારે, સૂરજને એઈમ્સ નાગપુર લઈ જવામાં આવ્યો, જ્યાં ડોકટરોએ તેને મૃત જાહેર કર્યો. પોલીસે સૂરજના મૃતદેહને પોસ્ટમોર્ટમ માટે મોકલીને તેના ભાઈ સંજયનું નિવેદન નોંધ્યું. સંજયે દહેજના આરોપોનો ઇનકાર કર્યો અને કહ્યું- ગણવીના પરિવારે અમને જાનથી મારી નાખવાની ધમકી આપી હતી. મારો ભાઈ ડરી ગયો હતો અને તેણે માફી પણ માંગી હતી.
Image Gallery
