ભારતની સૈન્ય શક્તિમાં ધરખમ વધારો કરવા માટે રશિયા દ્વારા વધુ એક મોટું પગલું ભરવામાં આવ્યું છે. S-400 ટ્રાયમ્ફના સફળ કરાર બાદ હવે રશિયાએ ભારતને પોતાનું અત્યંત ઘાતક મધ્યમ અંતરનું એર ડિફેન્સ સિસ્ટમ S-350 Vityaz ઓફર કર્યું છે. આ ઓફરની સૌથી મહત્વની બાબત એ છે કે, રશિયા આ સિસ્ટમ ટેકનોલોજી ટ્રાન્સફર (ToT) સાથે આપવા તૈયાર છે, જેનો અર્થ છે કે, તેનું ઉત્પાદન ભારતમાં જ થઈ શકશે.
S-350 Vityaz એ S-400નું પૂરક ગણાય છે. જ્યાં S-400 લાંબા અંતરના જોખમોને જુએ છે, ત્યાં S-350 મધ્યમ અને ટૂંકા અંતરના હુમલાઓને નિષ્ફળ બનાવે છે. S-350 Vityazની રેન્જની વાત કરવામાં આવે તો તે 120 કિમી દૂરથી ફાઈટર જેટ્સ અને 30 કિમી દૂરથી બેલેસ્ટિક મિસાઈલોને તોડી પાડી શકે છે.
પાકિસ્તાન તરફથી આવતી 'બાબર' જેવી લો-અલ્ટીટ્યુડ ક્રૂઝ મિસાઈલો હોય કે ચીનના અત્યાધુનિક ડ્રોન ફ્લીટ, S-350 ભારતની સરહદોને અભેદ્ય કિલ્લામાં ફેરવી દેશે. લદ્દાખ અને અરૂણાચલ જેવા પહાડી વિસ્તારોમાં, જ્યાં ઊંચાઈ પરથી થતા હુમલાઓનું જોખમ વધુ હોય છે, ત્યાં આ સિસ્ટમ ક્વિક રિએક્શન ટાઈમ સાથે ભારતને સુરક્ષા પૂરી પાડશે.
ભારત પાસે પહેલેથી જ આકાશ અને બરાક-8 જેવી સિસ્ટમ છે, પરંતુ S-350ના ઉમેરાથી ભારતની 'મલ્ટી-લેયર્ડ એર ડિફેન્સ' વ્યૂહરચના પૂર્ણ થશે. જો આ કરાર સફળ રહેશે, તો ભારત આકાશમાં દુશ્મનના કોઈપણ દુસાહસને જડબાતોડ જવાબ આપવા માટે સક્ષમ બનશે.
