સુરત જિલ્લાના મહુવા તાલુકાના એક ગામમાં એક ગંભીર ઘટનાએ તંગદિલી સર્જી છે. 12 વર્ષીય સગીરા સાથે છેડતીના આરોપી પરપ્રાંતિય યુવકને પોલીસે છોડી મૂકતાં સ્થાનિક આદિવાસી સમાજમાં ભારે રોષ ફાટી નીકળ્યો હતો. આક્રોશિત ટોળાએ આરોપીની દુકાનમાં આગ ચાંપી અને પોલીસ પર પથ્થરમારો કર્યો હતો. જોકે, પોલીસે ત્વરિત કાર્યવાહી કરીને આરોપીને વલસાડ પાસેથી ઝડપી પાડ્યો છે.

છાતીના ભાગે અડપલાં કર્યા 

શુક્રવારે સવારે એક 12 વર્ષીય સગીરા રડતી હાલતમાં શાળાએ પહોંચી હતી. તેણે શિક્ષિકાને જણાવ્યું કે, ગામના બજારમાં આવેલી 'રાજ નોવેલ્ટી' દુકાનનો માલિક કિશન તારારામ ચૌધરી (મારવાડી)એ તેના છાતીના ભાગે અડપલાં કરી છેડતી કરી હતી. શિક્ષિકાએ તાત્કાલિક ગામના સરપંચને જાણ હતી.

દુકાનના CCTVમાં આરોપીની કરતૂતો કેદ 

ગામના સરપંચને સગીરાની છેડતી અંગે થતાં જ શાળાના સ્ટાફ સાથે રાજ નોવેલ્ટીમાં જઈ દુકાનના સીસીટીવી ફૂટેજ ચેક કર્યા હતા. જેમાં યુવાન સગીરાનો હાથ પકડી ઊંચો કરતો હોવાનુ નજરે પડતાં જ સરપંચ કેયુર પટેલે પરપ્રાંતિય યુવાનને મેથીપાક આપ્યો હતો. જે બાદ ઘટના અંગે પોલીસને જાણ કરી પરપ્રાંતીય યુવાનને પોલીસ હવાલે કર્યો હતો.

આરોપીને છોડતાં ગામલોકોનો રોષ ફાટ્યો 

પોલીસે આરોપી કિશનને કસ્ટડીમાં લીધો હતો. જોકે, સગીરાના પરિવારે શરૂઆતમાં પોલીસ ફરિયાદ નોંધાવવાનો ઇનકાર કરતાં પોલીસે કિશનને સાંજે છોડી મૂક્યો હતો. આ સમાચાર ગામમાં ફેલાતાં જ સ્થાનિક આદિવાસી સમાજમાં ભારે રોષ ફાટી નીકળ્યો હતો.

આક્રોશિત ટોળાની આગચંપી અને પોલીસ પર હુમલો 

પોલીસે આરોપીને છોડી મૂક્યાના સમાચાર મળતાં જ બે હજારથી વધુ લોકોનું આક્રોશિત ટોળું એકઠું થયું હતું. આ ટોળાએ આરોપી કિશન મારવાડીની દુકાન 'રાજ નોવેલ્ટી' પર પથ્થરમારો કર્યો. કેટલાક લોકોએ દુકાનનો સામાન બહાર કાઢીને આગ લગાવી દીધી હતી.