અમેરિકામાં ભારતીય મૂળના એક ડૉક્ટર પર જાતીય શોષણ અને તબીબી છેતરપિંડીનો આરોપ મૂકવામાં આવ્યો છે. અહેવાલો અનુસાર, અમેરિકાના ન્યુ જર્સીના 51 વર્ષીય ડૉ. રિતેશ કાલરા ગેરકાયદેસર દવાઓના બદલામાં ડ્રગ વ્યસનથી પીડાતા દર્દીઓ પાસેથી સેક્સની માંગ કરતો હતો.

કાલરા પોતાનું ફેર લોન ક્લિનિક 'પિલ મિલ' તરીકે ચલાવતો હતો, જ્યાં તેઓ તબીબી પ્રિસ્ક્રિપ્શન વિના ઓક્સીકોડોન જેવા શક્તિશાળી ઓપીઓઇડ્સનું વિતરણ કરતો હતો. ડૉક્ટર સામે પાંચ આરોપો દાખલ કરવામાં આવ્યા છે, જેમાં ગેરકાયદેસર દવા વિતરણ માટે ત્રણ અને છેતરપિંડી માટે બે આરોપોનો સમાવેશ થાય છે.

ગુરુવારે મેજિસ્ટ્રેટ જજ સમક્ષ હાજર થયા બાદ તેોને નજરકેદ કરવામાં આવ્યો છે. કાલરાને ₹86 લાખના બોન્ડ ભરવાની શરતે મુક્ત કરવામાં આવશે. તેમને દવાની પ્રેક્ટિસ કરવા અને દવાઓ લખવા પર પણ પ્રતિબંધ મૂકવામાં આવ્યો છે.

ક્લિનિકની અંદર બળજબરીથી સેક્સ કરવાના આરોપો

ઘણી મહિલા દર્દીઓએ કાલરા વિરુદ્ધ અભદ્ર રીતે સ્પર્શ કરવા અને દવાઓના બદલામાં સેક્સની માંગણી કરવાની ફરિયાદ કરી છે. એવો આરોપ છે કે ડૉક્ટરે એપોઇન્ટમેન્ટ દરમિયાન ક્લિનિકની અંદર એક દર્દી સાથે બળજબરીથી સેક્સ કર્યું હતું.

યુ.એસ. એટર્નીની ઓફિસ અનુસાર, કાલરાએ કોઈપણ તબીબી જરૂરિયાત વિના વ્યસન પેદા કરતી દવાઓ લખી આપી હતી.

6 વર્ષમાં 31 હજાર ગેરકાયદેસર પ્રિસ્ક્રિપ્શન જારી કરવામાં આવ્યા હતા

યુએસ એટર્નીની ઓફિસ અનુસાર, જાન્યુઆરી 2019 અને ફેબ્રુઆરી 2025 વચ્ચે, કાલરાએ 31,000થી વધુ ઓક્સીકોડોન પ્રિસ્ક્રિપ્શન જારી કર્યા, ક્યારેક એક જ દિવસમાં 50થી વધુ પ્રિસ્ક્રિપ્શન લખ્યા.

યુએસ એટર્ની એલિના હબ્બાએ કહ્યું - ડોકટરો પર મોટી જવાબદારી છે, પરંતુ આરોપ મુજબ, ડો. કાલરાએ ડ્રગ વ્યસનને પ્રોત્સાહન આપવા, નબળા દર્દીઓનું જાતીય શોષણ કરવા અને ન્યુ જર્સીના જાહેર આરોગ્ય કાર્યક્રમ સાથે છેતરપિંડી કરવા માટે તેમના પદનો દુરુપયોગ કર્યો.

કાલરા પર નકલી સલાહ અને કાઉન્સેલિંગ માટે બિલિંગ કરવાનો પણ આરોપ છે. કાલરાના બચાવ પક્ષે આ આરોપોને ખોટા ગણાવ્યા છે.

આ કેસ યુ.એસ.માં પ્રિસ્ક્રિપ્શન ડ્રગના દુરુપયોગ પર વ્યાપક કાર્યવાહી વચ્ચે આવ્યો છે, જ્યાં કાલરા જેવા ડોકટરો પર ઓપીઓઇડ કટોકટીનો ઉપયોગ કરવાનો આરોપ મૂકવામાં આવી રહ્યો છે.