ગુજરાતની હીરા નગરી દુનિયમાં ચમકી.. સુરતના કટ ડાયમંડ્સને મળ્યો GI ટેગ
ગુજરાતના સુરત શહેરના કટ ડાયમંડ્સને ભૌગોલિક સંકેત (GI) પ્રમાણપત્ર મળવું રાજ્ય અને દેશ માટે ગૌરવની વાત છે. શહેર સ્થિત આંત્રપ્રિન્યોરશિપ ડેવલપમેન્ટ ઇન્સ્ટિટ્યૂટ ઓફ ઇન્ડિયા (EDII) ની પહેલના કારણે સુરતના હીરા ઉદ્યોગને વૈશ્વિક સ્તરે વધુ મજબૂત ઓળખ મળી રહી છે.
ભારત સરકારના ઉદ્યોગ અને આંતરિક વેપાર પ્રોત્સાહન વિભાગના પેટન્ટ, ડિઝાઇન અને ટ્રેડમાર્ક્સના કંટ્રોલર જનરલ ડૉ. ઉન્નત પંડિતે બે દિવસીય IP યાત્રા કાર્યક્રમ અંતર્ગત EDII કેમ્પસમાં યોજાયેલી GI પ્રાદેશિક બેઠક દરમિયાન આ પ્રમાણપત્ર સોંપ્યું હતું.
આ પ્રસંગે સુરત ડાયમંડ એસોસિએશનના પ્રમુખ જગદીશ ખુંટ અને અન્ય સભ્યોએ આ પ્રમાણપત્ર સ્વીકાર્યું હતું. વૈશ્વિક હીરા ઉદ્યોગમાં સુરતનું યોગદાન અત્યંત મહત્વપૂર્ણ રહ્યું છે.
અંદાજે ભારતના લગભગ 90 ટકા પોલિશ્ડ હીરા સુરતમાં તૈયાર થાય છે, જેના કારણે આ GI પ્રમાણપત્ર સુરતની કટ ડાયમંડ કારીગરીને સત્તાવાર માન્યતા આપે છે.
EDII દ્વારા અત્યાર સુધીમાં ગુજરાતના પાંચ મહત્વપૂર્ણ હસ્તકલા ઉત્પાદનોને GI ટેગ મેળવવામાં સહાય કરવામાં આવી છે, જ્યારે 15 અન્ય ઉત્પાદનો માટેની પ્રક્રિયા હાલમાં ચાલુ છે. સાથે સાથે, સંસ્થા દ્વારા સ્થાપિત GI સુવિધા કેન્દ્ર કારીગરોને બજાર સાથે સીધો સંપર્ક સ્થાપિત કરવામાં મહત્વપૂર્ણ ભૂમિકા ભજવી રહ્યું છે.
આ પ્રસંગે ડૉ. ઉન્નત પંડિતે જણાવ્યું હતું કે ભારત એક એવો દેશ છે જ્યાં વિવિધ ક્ષેત્રોમાં વર્ષો સુધીના અનુભવ અને પરંપરાગત જ્ઞાનનો સમૃદ્ધ વારસો છે. આ જ્ઞાન અને કૌશલ્યને સાચવવું અને યોગ્ય સમયે પ્રોત્સાહન આપવું અત્યંત જરૂરી છે. GI ટેગ દ્વારા ઉત્પાદકો અને કારીગરોના સામાજિક તથા આર્થિક વિકાસને વેગ મળે છે અને તેમને વૈશ્વિક સ્તરે ઓળખ મેળવવામાં મદદ મળે છે.
Image Gallery
