દ. ગુજરાત-સૌરાષ્ટ્રમાં વરસાદના સંકેત, 7 દિવસની આગાહી:ભાવનગર બીજા દિવસ પણ સૌથી ગરમ; ચોમાસું 48થી 72 કલાકમાં MP પહોંચશે, યુપીમાં વાવાઝોડાનું એલર્ટ
ગત 24 કલાક દરમિયાન રાજ્યમાં પ્રી-મોન્સૂન એક્ટિવિટી વચ્ચે વાતાવરણ સૂકું રહ્યું છે. મહત્તમ તાપમાનમાં કોઈ મોટો ફેરફાર જોવા મળ્યો નથી. સમગ્ર રાજ્યમાં સૌથી ઊંચુ મહત્તમ તાપમાન સતત બીજા દિવસે ભાવનગરમાં 41.4°C નોંધાયું. રાજ્યના તાપમાનમાં 1.3 ડિગ્રી સેલ્સિયસનો ઘટાડો નોંધાયો છે.
હવામાન વિભાગના જણાવ્યાં અનુસાર, હાલમાં નૈઋત્યનું ચોમાસું મહારાષ્ટ્ર, કર્ણાટક અને તેલંગાણાના વધુ ભાગો તરફ આગળ વધવા માટે સાનુકૂળ પરિસ્થિતિ ધરાવે છે. જોકે, ગુજરાતમાં આગામી 7 દિવસ દરમિયાન તાપમાનમાં કોઈ મોટો ફેરફાર થવાની સંભાવના નથી. રાહતના સમાચાર એ છે કે, આગામી દિવસોમાં દક્ષિણ ગુજરાત અને સૌરાષ્ટ્રના કેટલાક જિલ્લાઓમાં હળવા વરસાદની શક્યતા છે.
અમદાવાદમાં વાદળછાયું વાતાવરણ રહેશે, પારો 41 ડિગ્રીને આંબી શકે રાજ્યના પાટનગર અને મુખ્ય શહેરોની વાત કરીએ તો અમદાવાદમાં આગામી દિવસોમાં સામાન્ય રીતે વાદળછાયું આકાશ રહેવાની સંભાવના છે. અમદાવાદમાં મહત્તમ તાપમાન 41 ડિગ્રી સેલ્સિયસ આસપાસ નોંધાઈ શકે છે, જેથી બપોરના સમયે સામાન્ય અકળામણ અને ગરમીનો અહેસાસ થશે. રવિવારે (14 જૂન) અમદાવાદનું મહત્તમ તાપમાન 40.6 ડિગ્રી સેલ્સિયસ નોંધાયું હતું, જે સામાન્ય કરતાં 0.9 ડિગ્રી વધુ હતું. જ્યારે લઘુત્તમ તાપમાન 29.0 ડિગ્રી સેલ્સિયસ રહ્યું હતું.
હાલના તબક્કે હવામાન વિભાગ દ્વારા માછીમારો માટે કે દરિયાકાંઠાના વિસ્તારો માટે આગામી 7 દિવસ સુધી કોઈ 'વેધર વોર્નિંગ' જાહેર કરવામાં આવી નથી. પરંતુ સૌરાષ્ટ્ર અને દક્ષિણ ગુજરાતના વિસ્તારોમાં પ્રિ-મોન્સૂનની ગતિવિધિઓ જૂન મહિનાના આ અઠવાડિયામાં વેગ પકડશે તેવા મજબૂત સંકેતો મળી રહ્યા છે.
7 દિવસની આગાહી, 3 દિવસ દ. ગુજરાત, ત્યારબાદ સૌરાષ્ટ્રમાં વરસાદની એન્ટ્રી
- 15થી 17 જૂન: દક્ષિણ ગુજરાતના કેટલાક જિલ્લાઓ જેવા કે સુરત, ડાંગ, તાપી, નવસારી, વલસાડ તેમજ દમણ અને દાદરા નગર હવેલીમાં છૂટાછવાયા સ્થળોએ હળવોથી મધ્યમ વરસાદ અથવા ગાજવીજ સાથે ઝાપટાં પડી શકે છે. ઉત્તર ગુજરાત અને સૌરાષ્ટ્ર-કચ્છના તમામ જિલ્લાઓમાં હવામાન સંપૂર્ણપણે સૂકું રહેશે.
- 18થી 19 જૂન: વરસાદનો વ્યાપ થોડો વધશે. દક્ષિણ ગુજરાતના છોટાઉદેપુર, નર્મદા, સુરત, ડાંગ, તાપી, નવસારી, વલસાડ, દમણ અને દાદરા નગર હવેલી. ઉપરાંત સૌરાષ્ટ્રના દરિયાકાંઠાના વિસ્તારો જેવા કે, અમરેલી, ભાવનગર, ગીર સોમનાથ અને દીવમાં છૂટાછવાયા સ્થળોએ હળવોથી મધ્યમ વરસાદ પડી શકે છે. બાકીના વિસ્તારોમાં હવામાન સૂકું રહેશે.
- 19થી 21 જૂન: દક્ષિણ ગુજરાતના વિસ્તારો (સુરત, ડાંગ, તાપી, નવસારી, વલસાડ) અને સૌરાષ્ટ્રના (અમરેલી, ભાવનગર, ગીર સોમનાથ, દીવ) ભાગોમાં હળવો વરસાદ ચાલુ રહેશે. ઉત્તર ગુજરાત અને કચ્છ પ્રદેશ સૂકો રહેશે.
- ચોમાસાની પ્રગતિ અને પવનની સ્થિતિ નૈઋત્યનું ચોમાસું હાલમાં નિર્ધારિત રેખા પર આગળ વધી રહ્યું છે. ચોમાસાની ઉત્તરીય રેખા (NLM) હાલમાં હરનાઈ, સોલાપુર અને હૈદરાબાદ થઈને પસાર થઈ રહી છે. આગામી 4થી 5 દિવસમાં ચોમાસું મહારાષ્ટ્ર, કર્ણાટક, તેલંગાણા અને આંધ્રપ્રદેશના બાકીના ભાગો તેમજ પશ્ચિમ બંગાળ, ઓડિશા, ઝારખંડ અને બિહારના કેટલાક વિસ્તારોમાં આગળ વધવા માટે પરિસ્થિતિ અત્યંત સાનુકૂળ છે. પશ્ચિમ રાજસ્થાનથી ગંગાના પશ્ચિમ બંગાળ સુધી સર્જાયેલી મોસમી ટ્રફના કારણે આગામી દિવસોમાં દક્ષિણ ગુજરાત અને સૌરાષ્ટ્રના દરિયાકાંઠાના ભાગોમાં હળવો વરસાદ પડી શકે છે.
-
મોનસૂન અત્યાર સુધીમાં 19 રાજ્યોમાં પહોંચી ગયું છે. આગામી 48થી 72 કલાકમાં તેના મધ્ય પ્રદેશમાં પ્રવેશવાની સંભાવના છે. રાજ્યના લગભગ 30 જિલ્લાઓમાં આજે વાવાઝોડા અને વરસાદનું એલર્ટ છે. દેશના ઘણા રાજ્યોમાં પ્રી-મોનસૂન સક્રિય છે. હવામાન વિભાગ મુજબ, આજે 20થી વધુ રાજ્યોમાં વરસાદનું એલર્ટ છે. રાજસ્થાનના 15 જિલ્લાઓમાં આજે વરસાદ પડી શકે છે. રવિવારે ચિત્તોડગઢમાં 1 ઇંચ વરસાદ નોંધાયો હતો.
ઉત્તર પ્રદેશના 32 જિલ્લાઓમાં આજે વરસાદનું એલર્ટ છે. આ દરમિયાન 50 થી 60 કિમી પ્રતિ કલાકની ઝડપે પવનો ફૂંકાઈ શકે છે. 17 થી 20 જૂન વચ્ચે મોનસૂન સોનભદ્ર અને લલિતપુરના રસ્તે ઉત્તર પ્રદેશમાં પ્રવેશી શકે છે.
દિલ્હીમાં રવિવારે મહત્તમ તાપમાન 38.5°C રહ્યું, જે સામાન્ય કરતાં 1.4°C ઓછું છે. સોમવારે હળવા વરસાદ સાથે તેજ પવનો ફૂંકાઈ શકે છે. બિહારના 19 જિલ્લાઓમાં આજે વરસાદ પડી શકે છે. મોનસૂનના પ્રવેશ છતાં ગરમી યથાવત છે. રવિવારે શેખપુરામાં 40°C તાપમાન નોંધાયું હતું.
