અમદાવાદના જમાલપુર પગથિયાં પાસે આજે 7 ઓગસ્ટના રોજ સવારે ડોર-ટુ-ડોર ગાર્બેજ કલેક્શન કરતી મ્યુનિસિપલ કોર્પોરેશનની ગાડીએ એક બાદ એક આઠ જેટલાં વાહનોને અડફેટે લીધાં હતાં, જેમાં 50 વર્ષીય એક્ટિવાચાલક મોહમ્મદભાઈને બેકાબૂ બનેલી ગાડીએ 30 ફૂટ જેટલા ઢસડતાં ગંભીર ઈજા પહોંચતાં ઘટનાસ્થળે જ મોત નીપજ્યું હતું, જ્યારે અન્ય ત્રણ જેટલા લોકોને પણ સામાન્ય ઈજા પહોંચતાં સારવાર અર્થે ખસેડવામાં આવ્યા હતા.

અકસ્માતની ઘટનાને પગલે રોડ પર ભાગદોડ મચી 

મળતી માહિતી મુજબ, સવારના સમયે ડોર-ટુ-ડોર કચરો ઉપાડતી મ્યુનિસિપલ કોર્પોરેશનની બેકાબૂ થયેલી ગાડીએ પાંચથી છ રિક્ષા અને બે જેટલા ટૂ-વ્હીલરોને ટક્કર મારી હતી. આ અકસ્માતમાં ટૂ-વ્હીલર પર રહેલા મોહમ્મદભાઈ નામના 50 વર્ષના આધેડ ગાડીની નીચે આવી ગયા હતા અને 30 ફૂટ જેટલા ઢસડાયા હતા. આ ઘટનામાં મોહમ્મદભાઈને ગંભીર ઈજા પહોંચતાં ઘટનાસ્થળે જ તેમનું મોત નીપજ્યું હતું.

ડ્રાઈવર ભાગવા જતાં લોકોએ પકડી લીધો 

આ ઘટનામાં અન્ય બે લોકોને પણ ઈજા પહોંચતાં સ્થાનિકોએ તાત્કાલિક એમ્બ્યુલન્સને ફોન કરીને બોલાવી સારવાર અર્થે ખસેડ્યા હતા. અકસ્માત બાદ વાહનચાલક રાહુલ પરમાર ભાગવાનો પ્રયાસ કરી રહ્યો હતો, પરંતુ હાજર સ્થાનિકોએ તેને પકડી લીધો હતો.

પોલીસને જાણ થતાં ઘટનાસ્થળે દોડી ગઈ 

ઘટનાની અંગેની જાણ થતાં ઇ ડિવિઝન ટ્રાફિક-પોલીસ ઘટનાસ્થળે પહોંચી હતી. પોલીસે અકસ્માત કરનાર વાન-ડ્રાઇવર રાહુલ પરમારની અટકાયત કરી છે. આ સાથે જ મોહમ્મદભાઈના મૃતદેહને પોસ્ટમોર્ટમ અર્થે હોસ્પિટલ ખસેડી તેમનાં પરિવારજનોને આ વિશે જાણ કરી હતી.

ડ્રાઇવરની પોલીસે અટકાયત કરી 

ટ્રાફિક પીઆઇ વી. કે. દેસાઈએ જણાવ્યું હતું કે અકસ્માતમાં એક વ્યક્તિનું મોત થયું છે, જ્યારે 2 વ્યક્તિને ઇજા થઈ છે. પોલીસ હોસ્પિટલ પહોંચીને ઈજાગ્રસ્ત વ્યક્તિઓનાં નિવેદન નોંધાશે. આરોપીની પણ અટકાયત કરવામાં આવી છે.

અકસ્માત થયો એટલે તરત જ હું દોડીને બહાર ગયો હતો 

જમાલપુર વિસ્તારમાં જ્યાં અકસ્માત સર્જાયો ત્યાં હસનેન પાન પાર્લર નામની દુકાન ધરાવનારા મહંમદ અસગરભાઈએ દિવ્ય ભાસ્કર સાથેની વાતચીતમાં જણાવ્યું હતું કે દવાની દુકાન પાસે એક રિક્ષા ઉભી હતી અને ત્યાં એક ભાઈ નાની છોકરીને લઈને ઉભા હતા. જોરથી ગાડી આવી અને રિક્ષાને ટક્કર મારી એમાં એ ભાઈએ નાની છોકરીને પાછળ સાઈડમાં કરી દીધી અને તેમને વાગ્યું હતું. આગળ બે એક્ટિવા પડ્યા હતા તેમને પણ ટક્કર મારી હતી. અકસ્માત થયો એટલે તરત જ હું દોડીને બહાર ગયો હતો.

ડ્રાઇવરના બંને કાને હેન્ડ્સ ફ્રી ભરાવેલા હતા 

ગાડીનો ડ્રાઇવર હતો તેને પકડ્યો હતો ડ્રાઇવરના બંને કાને હેન્ડ્સ ફ્રી લગાવેલા હતા. ગાડીનો ડ્રાઇવર આગળથી બેથી ત્રણ વાહનોને ટક્કર મારતો મારતો દવાની દુકાન પાસે આવ્યો હતો અને ત્યાં ગાડી ઉભી રહી ગઈ હતી. સ્થાનિક લોકો ત્યાં ભેગા થઈ ગયા હતા અને તેને બે ત્રણ લાફા માર્યા હતા બીજા બેથી ત્રણ વ્યક્તિઓને ઇજા થઈ હતી તેમને સારવાર માટે હોસ્પિટલ ખસેડ્યા હતા.

ડ્રાઇવરને હાલ ફરજ પરથી ઉતારી દેવાયો 

અમદાવાદ મ્યુનિસિપલ કોર્પોરેશન દ્વારા તાત્કાલિક ધોરણે આ મામલે કાર્યવાહી કરવામાં આવી છે. મધ્ય ઝોનના સોલિડ વેસ્ટ મેનેજમેન્ટ વિભાગ દ્વારા. ડોર ટુ ડોર કલેક્શન કરતી ગાડીના કોન્ટ્રાક્ટર કંપની વેસ્ટન ઇમેજનરી ટ્રાન્સકોન પ્રાઇવેટ લિમિટેડને રૂ. 1 લાખનો દંડ કર્યો છે અને ડ્રાઇવરને હાલ ફરજ પરથી ઉતારી દેવામાં આવ્યો છે. આ મામલે તપાસ કરવામાં આવશે કે ગાડીની બ્રેક ફેલ થઈ હતી, અન્ય કોઈ ટેકનીકલ કારણ હતું કે પછી ડ્રાઇવરની ભૂલ હતી.