ચાલુ BRTSમાં એક મોડલ જેવી છોકરી ડીજે વગાડી રહી છે. યુવકો હાથમાં ડ્રિંકસ લઈને નાચી રહ્યા છે. આ હાઇફાઇ નજારો જોશો તો તમને લાગશે કે આ કોઈ વિદેશની બસ છે. પણ તમે જાણીને ચોંકી જશો કે આ કોઈ વિદેશની બસનો નહીં પણ સુરતની BRTS બસનો નજારો છે. જોયું ને તમે પણ ગોથે ચડી ગયા ને...જી...હા રવિવારના દિવસે જ્યારે લોકો મોજના મૂડમાં હોય ત્યારે સુરતની BRTS બસમાં આ જલસો થઈ ગયો.

લાલ કલરના બોયકટ વાળ, ટ્રેન્ડી એસસરીઝ, વેસ્ટર્ન કપડાં, ગળામાં હેડફોન ને બસમાં ડીચક...ડીચક...ડીચક...આ છોકરી કોઈ બીજુ નહીં પરંતુ મુંબઈની પ્રખ્યાત મહિલા ડીજે કીબો હતી. તેને BRTS બસમાં ગોવાની બીચ પાર્ટીની ફીલ લાવી દીધી હતી. એક તરફ બસની બહાર વાહનોનો ઘોંઘાટ હતો તો બીજી તરફ બસમાં કીબોના કીબોર્ડની કમાલ હતી.

પાર્ટી વેર, કાળા ગોગલ્સ અને ઇમ્પ્રેસિવ ડાન્સ મૂવ કરતી ગર્લ્સ, હાથમાં ડ્રિન્ક ને ડાન્સ કરતા બોયઝ, આંખે ગોગલ્સ ચડાવી બસમાં પાર્ટીને એન્જોય કરતા મુસાફરોનો આ નજારો કોઈ વિદેશની પાર્ટીને પણ ઝાંખો પાડે એવો હતો.

ગોવાની ડાન્સિંગ બોટને પણ પાણી પીવડાવતી આ BRTS બસ પાર્ટીના વીડિયો જ્યારે સોશિયલ મીડિયામાં વાઇરલ થયા ત્યારે આયોજકોથી માંડીને મંજૂરી આપનારા લોકો જેમ લોકો બસમાં ચઢવા કેમ ઉતાવળ કરે તેમ ઉતાવળે પોતાની જવાબદારીમાંથી છટકી ગયા.

ચાલુ BRTSમાં ડીજે પાર્ટી કરી. યુવકો છાકટા બની 18 KM નાચ્યા. સુરતનો રોડ 3 કલાક બાનમાં લીધો અને જ્યારે જવાબદારી લેવાની વાત આવી ત્યારે બધાએ હાથ ખંખેરી લીધા.

સામાન્ય રીતે BRTS બસમાં તમે ધક્કામુકી અને ભીડ જોઈ હશે. પરંતુ તે દિવસે માહોલ કઇંક ઔર હતો. BRTS બસમાં ડીજેનું સેટઅપ હતું. મુંબઈની પ્રખ્યાત ડીજે કીબો પોતાના સંગીતે મુસાફરોને ડોલાવી રહી હતી. યુવક-યુવતીઓ કાળા ગોગલ્સ ચડાવી ડીજેના તાલે હાથમાં ડ્રિક્સ લઈ છાકટા બન્યા હતા. 18 કિમીના રૂટ પર એક તરફ બસ ચાલી રહી હતી તો બીજી તરફ ચાલુ બસે યુવાઓ ડાન્સ કરી રહ્યા હતા, એન્જોય કરી રહ્યા હતા. અને બહાર રોડ પર વાહનચાલકો આવતા જતા આ તમાશો જોઈ રહ્યા હતા.

મનપાની જાણ બહાર ડીજે પાર્ટી કરાઈ હોવાનો દાવો 

હાલમાં સોશિયલ મીડિયામાં એક વીડિયો વાયરલ થયો છે, જેમાં સુરત શહેરની 'કિડ લોકલ' નામની સંસ્થા દ્વારા તા.9મી ઓગસ્ટે BRTS બસમાં ભારે તામજામ સાથે ડીજે વગાડાયું હતું. ચાલુ બસમાં જ ડી.જે વગાડીને વીડિયોગ્રાફી કરાઈ હતી અને બાદમાં તેનો વીડિયો સોશિયલ મીડિયા પર રીલ્સ સ્વરૂપે પોસ્ટ કરવામાં આવ્યો હતો. મનપાના અધિકારીઓને આ અંગે જાણ પણ કરાઈ ન હોવાનો દાવો છે. જ્યારે આયોજક કહે છે કે પરમિશન લીધી હતી. જ્યારે પરિવહન ચેરમેન કહે છે કે આ બાબતે અધિકારીએ તેમને પણ કોઈ જાણ કરી ન હતી. મનપાની બસોમાં મનપાની જાણ વિના આવી પ્રવૃત્તિ થતાં હવે વિવાદ થયો છે.

સંબંધિત સંસ્થાઓ પાસેથી મંજૂરી લીધી હોવાનો કિડ લોકલ સંસ્થાનો દાવો 

સમગ્ર મામલે કિડ લોકલ સંસ્થા દ્વારા જણાવવામાં આવી રહ્યું છે કે, સુરત મહાનગરપાલિકા પાસેથી અને અન્ય સંબંધિત સંસ્થા પાસેથી તમામ પરમિશનો લેવામાં આવી હતી. સિટીલિંક પાસેથી પરવાનગી લેવાઈ હોવાનો દાવો પણ કર્યો હતો. પરંતુ હકીકતમાં મનપા તરફથી શરતો આધીન પરવાનગી અપાઈ નથી તેમ વિભાગીય વડાએ જણાવ્યું હતું.

કિડ લોકલ સામે કાર્યવાહી કરવાની પ્રક્રિયા શરૂ 

BRTS બસ જેવી જાહેર વાહન વ્યવહાર સેવામાં કોઈપણ પ્રકારની પરવાનગી વિના આ પ્રકારનું આયોજન કરવું કાયદેસર નથી. પરિણામે કિડ લોકલ સંસ્થા સામે યોગ્ય કાર્યવાહી હાથ ધરવાની પ્રક્રિયા શરૂ કરવામાં આવી છે.

સિટીલિંકના મેનેજરે બારોબાર મંજૂરી આપતા વિવાદ 

સિટીલિંકના મેજેનર પ્રવીણ પ્રસાદે આ અંગે શાસકો કે વિભાગીય વડાને પણ જાણ કરી નહોતી. સિટી બસની સ્કૂલ પ્રવાસ કે અન્ય જરૂરિયાત માટે ભાડે આપવા માટેની જોગવાઈ છે પરંતુ BRTSની બસ સરકારી કાર્યક્રમો સિવાય અન્ય કોઈ જગ્યાએ ફાળવવા કે ભાડે આપવા કોઈ ઠરાવ થયો નથી, તેમ છતાં સિટીલિંકના મેનેજરે બારોબાર આ રીતે મંજૂરી આપતા વિવાદ થયો છે.