હવામાન વિભાગ દ્વારા આગામી 7 દિવસ એટલે કે, 5 સપ્ટેમ્બર સુધી રાજ્યમાં હળવાથી મધ્યમ વરસાદની આગાહી કરવામાં આવી છે. રાજ્યના કેટલાક વિસ્તારોમાં ભારે વરસાદ પણ પડી શકે છે. આગામી 5 દિવસ દરમિયાન ગાજવીજ સાથે 30થી 40 કિલોમીટર પ્રતિ કલાકની ઝડપે પવન ફૂંકાઈ શકે છે. મોન્સૂન ટ્રફની સાથે 2 સાયક્લોનિક સર્ક્યુલેશન સક્રિય થવાથી વરસાદી માહોલ જોવા મળશે. આગામી દિવસોમાં માછીમારોને દરિયો ન ખેડવાની સૂચના આપવામાં આવી છે.

હવામાન વિભાગના વૈજ્ઞાનિક રામાશ્રય યાદવ દ્વારા આપવામાં આવેલી માહિતી અનુસાર, આજે આણંદ, ખેડા, પંચમહાલ અને દાહોદમાં અતિ ભારે વરસાદને લઈને ઓરેન્જ એલર્ટ આપવામાં આવ્યું છે. જ્યારે બનાસકાંઠા, પાટણ, મહેસાણા, સાબરકાંઠા, અરવલ્લી, મહીસાગર, અમદાવાદ, સુરેન્દ્રનગર, રાજકોટ, બોટાદ, ભાવનગર, અમરેલી, જુનાગઢ, ગીર સોમનાથ, દીવ, ભરૂચ, છોટાઉદેપુર, નર્મદા, સુરત, તાપી, નવસારી, ડાંગ, વલસાડ, દમણ અને દાદરા નગરહવેલીમાં છૂટાછવાયા સ્થળોએ સામાન્ય વરસાદને લઈને યલો એલર્ટ આપવામાં આવ્યું છે.

આવતીકાલે એટલે કે, 31 ઓગસ્ટના રોજ સાબરકાંઠા, મહેસાણા, ગાંધીનગર, અમદાવાદ, અરવલ્લી, ખેડા, મહીસાગર, આણંદ, પંચમહાલ, દાહોદ, વડોદરા, છોટાઉદેપુર, ભરૂચ, નર્મદા, સુરત, તાપી, નવસારી, ડાંગ, વલસાડ, દમણ અને દાદરા નગર હવેલીમાં છુટા-છવાયા સ્થળોએ ભારે વરસાદને લઈને યલો એલર્ટ આપવામાં આવ્યું છે. આજે અમદાવાદ અને આસપાસના વિસ્તારોમાં ગાજવીજ સાથે મધ્યમથી ભારે વરસાદ થવાની શક્યતા છે.

આજે સવારના 6 વાગ્યાથી 10 વાગ્યા સુધીમાં રાજ્યના 58 તાલુકામાં વરસાદ નોંધાયો છે. પંચમહાલના હાલોલમાં આભ ફાટ્યું છે. ચાર કલાકમાં 8.35 ઈંચ વરસાદ ખાબકતા પૂરની સ્થિતિનું નિર્માણ થયું છે. સવારના 6થી 10 વાગ્યા સુધીમાં સૌથી વધુ હાલોલમાં 8.35 ઈંચ વરસાદ વરસ્યો છે. જ્યારે સૌથી ઓછો બારડોલીમાં 1 મિમી વરસાદ નોંધાયો છે.

Image Gallery