હાર્દિક વિધાનસભામાં સવાલ પૂછતા હતા ને ધરપકડ વોરંટના સમાચાર આવ્યા
ભાજપના ધારાસભ્ય હાર્દિક પટેલ સામે અમદાવાદ ગ્રામ્ય કોર્ટે 2018ના એક કેસમાં ધરપકડ વોરંટ ઈસ્યુ કર્યું છે. 2018માં અમદાવાદના નિકોલ વિસ્તારમાં PAASના આંદોલન સમયે હાર્દિક પટેલ સહિતના પાસ આગેવાનો સામે ગુનો નોંધવામાં આવ્યો હતો. એ કેસની કોર્ટ મુદતોમાં હાર્દિક પટેલ વારંવાર ગેરહાજર રહેતાં કોર્ટે ધરપકડ વોરંટ ઈસ્યુ કર્યું છે, જોકે આ સમાચાર આવ્યા ત્યારે હાર્કિદ પટેલ વિધાનસભામાં પ્રશ્નોત્તરીકાળમાં સવાલ પૂછી રહ્યા હતા.
2018માં પાટીદાર આંદોલન સમયે હાર્દિક સહિતના પાસ આગેવાનો સામે ગુનો નોંધાયો હતો
વર્ષ 2018માં પાટીદાર અનામત આંદોલન સમયે નિકોલ પોલીસ મથકે પાટીદાર નેતા અને વર્તમાન વિરમગામ ધારાસભ્ય હાર્દિક પટેલ સહિતના આરોપીઓ સામે IPCની કલમ 143, 147, 149, 353, 188, 186, 120, 294, 34 અને 506 મુજબ ગુનો નોંધાયો હતો. એ સંદર્ભનો કેસ અમદાવાદ ગ્રામ્ય કોર્ટમાં દાખલ થયો હતો. એમાં કેસ અત્યારે આરોપી પર ચાર્જ ફ્રેમના સ્ટેજ પર છે, પરંતુ આરોપી હાજર ન રહેતાં વર્તમાન વિરમગામ ધારાસભ્ય હાર્દિક પટેલ સામે કોર્ટે ધરપકડ વોરંટ જાહેર કર્યું છે.
ઉલ્લેખનીય છે કે પાટીદાર અનામત આંદોલન સમયે હાર્દિક પટેલ સહિતના પાટીદાર નેતાઓ પાટીદારોને અનામત આપવાની માગણી અને ખેડૂતોનાં દેવાં માફીની માગણી સાથે નિકોલમાં પ્રતીક ઉપવાસનું આયોજન કર્યું હતું. એમાં ફરિયાદ મુજબ આરોપીઓએ વગર પરવાનગી, પूર્વ આયોજિત કાવતરું કરીને રેલી કાઢીને નિકોલના મ્યુનિસિપલ ગ્રાઉન્ડ ખાતે પ્રતીક ઉપવાસ કરવાનું નક્કી કર્યું હતું. રેલીને અટકાવવામાં આવતાં તેઓ ઉશ્કેરાયા હતા. આરોપીઓએ પોલીસને અપશબ્દો કહીને ઝપાઝપી કરી હતી અને ધમકી આપી હતી તેમજ શહેર પોલીસ કમિશનરના જાહેરનામાનો ભંગ કર્યો હતો. ઉલ્લેખનીય છે કે વર્તમાનમાં વિધાનસભા ચાલુ હોવાથી ધારાસભ્ય હાર્દિક પટેલ ત્યાં હાજર હશે. તેઓ એ કારણ કોર્ટ સમક્ષ આગળ ધરી શકે છે.
Image Gallery
