વધુ એક હેડ કોન્સ્ટેબલ દારૂના નશામાં ઝડપાયો:લોકોએ વીડિયો ઉતાર્યો તો મોબાઇલ છીનવવાનો પ્રયાસ કર્યો
ગુજરાતમાં દારૂબંધીના પોલીસકર્મીએ જ લીરેલીરા ઉડાવ્યા હોવાનો બનાવ ફરી વડોદરાથી સામે આવ્યો છે. વડોદરા શહેરના ચાપાનેર પોલીસચોકી પાસે ગઈકાલે રાત્રે વધુ એક પોલીસકર્મી નશામાં ધુત ઝડપાયો હતો. પૂર્વ વડોદરામાં ટ્રાફિક શાખામાં ફરજ બજાવતા એક હેડ કોન્સ્ટેબલ સંજયસિંહ પ્રતાપસિંહ રાઠોડ લોકો સાથે દલીલ કરી ગંદી ગાળો ભાંડતો હોવાનો સ્થાનિકોએ આક્ષેપ કર્યો હતો. એ બાદ દારૂડિયા પોલીસકર્મીને પકડી પોલીસને સોંપ્યો હતો.
ઉલ્લેખનીય છે કે અગાઉ થોડા દિવસ પહેલાં પણ વરણામા પોલીસ સ્ટેશનના હેડ કોન્સ્ટેબલ અમિત પરમાર (ઉંમર 37)નશાની હાલતમાં ઝડપાયો હતા. પોતાની જ સોસાયટીમાં નોકરી પૂરી કર્યા બાદ દારૂ પીધેલી હાલતમાં આવી સ્થાનિકો સાથે ગાળાગાળી કરી ઝઘડો કરવા લાગ્યો હતો, જેનો વીડિયો કોઈ સ્થાનિકે બનાવી સોશિયલ મીડિયામાં વાઇરલ કર્યો હતો.
પોલીસકર્મી નાગરિક સાથે બોલાચાલી અને ઝઘડો કરતાં ઝડપાયો
વડોદરા શહેરમાં ગત મોડીરાત્રે ચાપાનેર પોલીસચોકી નજીક પેટ્રોલિંગ દરમિયાન સિટી વન મોબાઈલ ઓપરેટર અને ડ્રાઈવર અન્નુભાઈ ઉસ્માનભાઈએ હેડ કોન્સ્ટેબલ સંજયસિંહ પ્રતાપસિંહ રાઠોડને નશાની હાલતમાં એક નાગરિક સાથે બોલાચાલી અને ઝઘડો કરતાં જોયો હતો. પોલીસકર્મચારીને તાત્કાલિક પોલીસ સ્ટેશન લઈ જવામાં આવ્યો હતો, જોકે નાગરિકોનું કહેવું છે કે પોલીસની વેન પાસે જ હતી.
અભદ્ર વ્યવહાર કરીને ગંદી ગાળો ભાંડતો હોવાનો આક્ષેપ
તપાસ દરમિયાન જાણવા મળ્યું કે સંજયસિંહની ડ્યૂટી ગત રોજ સવારથી સાંજ સુધી હતી. ડ્યૂટી પૂર્ણ કર્યા બાદ તેઓ ચાપાનેર દરવાજા પાસે નાસ્તો લેવા આવ્યા હતા, જ્યાં તેમણે નાગરિક સાથે ઝઘડો શરૂ કર્યો હતો. સ્થાનિકોનું કહેવું છે કે આ પોલીસકર્મીએ અભદ્ર વ્યવહાર કરીને ગંદી ગાળો ભાંડતો હતો. જ્યારે લોકોએ તેને આ હાલતમાં પકડી પાડ્યો તો લોકોને કહેવા લાગ્યો હતો કે 'મેં નશો નથી કર્યો, ચાલો હું આવું છું તમારી સાથે પોલીસ સ્ટેશન.'
તપાસમાં પોલીસકર્મીએ નશો કર્યો હોવાનું ખૂલ્યું
બે સ્થાનિક પંચો, સાહિદખાન નિઝામખાન પઠાણ અને શેખ અસલમભાઈ મલંગમિયાની હાજરીમાં તપાસ કરવામાં આવી હતી. પોલીસે સંજયસિંહનું મોઢું સૂંઘી તપાસ કરતાં દારૂની તીવ્ર વાસ આવતી હતી. તેમની આંખો લાલ અને નશાથી ઘેરાયેલી હતી અને તેઓ શારીરિક સંતુલન જાળવી શકતા નહોતા. આ દરમિયાન સંજયસિંહે દારૂ પીવા માટેનું કોઈ પરમિટ પણ ન હોવાનું જણાવ્યું હતું. તેમની અંગઝડતી કરતાં કોઈ કીમતી વસ્તુ મળી નહોતી.
