મોરબીના લેવીસ સિરામિક ગ્રૂપ સહિત 40 સ્થળો પર ITની રેડ:250થી વધુ અધિકારીઓ જોડાયા
દિવાળી પહેલા રાજકોટ ઇન્કમટેક્સ વિભાગ દ્વારા મોટા પાયે સર્ચ ઓપરેશન હાથ ધરવામાં આવ્યું છે, જેમાં 250થી વધુ અધિકારીઓની ટીમ આજે વહેલી સવારથી મોરબીના મોટા ગજાના જમીનના ધંધાર્થી પરેશ પટેલ, બિલ્ડર રાજુભાઈ ફેસ ગ્રુપ અને લેવીસ સીરામીકના જીતુભાઈ રોજવાડીયા ગ્રૂપ સહિત ભાગીદારો મળી 40 જેટલા સ્થળો પર દરોડા માટે ત્રાટકી છે.
જ્યારે સુરતથી આવતી ટીમનો મોડી રાત્રે અમદાવાદ હાઇવે પર અકસ્માત સર્જાયો હતો. જેમાં 4 અધિકારીઓ અને કર્મચારીઓને નાની-નોટી ઇજા પહોંચી હતી. ટાઇલ્સ બનાવતા લેવિસ ગ્રુપ પર દરોડાથી સિરામિક ઉદ્યોગકારોમાં ફફડાટ ફેલાયો છે. આ સર્ચ ઓપરેશનમાં સાંજ સુધીમાં મોટા પાયે બિન હિસાબી વ્યવહારો બહાર આવે તેવી શક્યતાઓ છે.
લેવીસ ગ્રૂપ સહિત ભાગીદારોના 40 સ્થળો પર દરોડા
દિવાળી પહેલા રાજકોટ આવકવેરા વિભાગ દ્વારા મેગા સર્ચ ઓપરેશન હાથ ધરવામાં આવતા કરચોરોમાં ફફડાટ ફેલાય ગયો છે. મોરબીમાં લેવિસ સીરામીક ગ્રુપ સહિત તેની સંકળાયેલા તેના ભાગીદારો મળી 40 જેટલા સ્થળોએ આજ સવારથી દરોડાની કામગીરી શરૂ થઈ છે. રાજકોટ ઇન્કમટેક્ષ વિભાગની ટીમ ગઈકાલ સાંજથી ગ્રાઉન્ડ પર ઉતરી ગઈ હતી. મોરબીનાં આ સીરામીક ગ્રુપને ત્યાં વહેલી સવારે સર્ચ ઓપરેશન હાથ ઘરીને તેમને ઉંઘતા ઝડપી પાડ્યા હતા. ફેક્ટરી, ઘર, ઓફિસ સહિતની પ્રીમાઇસીસ પર તપાસ ચાલી રહી છે. આજે પ્રથમ દિવસે સિરામિક ગ્રૂપના હિસાબો અને ડેટા શોધી રહ્યું છે. તપાસના અંતે બિનહિસાબી વ્યવહારો ઝડપાઇ તેવી સંભાવના છે.
સુરતથી આવતી ટીમનો અકસ્માત સર્જાયો
મોરબીમાં ઇન્કમટેક્સ વિભાગના દરોડા માટે સુરતથી આવતી ટીમને મોડી રાત્રે અમદાવાદ-મોરબી હાઇવે પર અકસ્માત નડ્યો હતો. સદનસીબે, આ અકસ્માતમાં કોઈ મોટી જાનહાનિ થઈ નથી, પરંતુ કારમાં સવાર ચાર અધિકારીઓ અને કર્મચારીઓને નાની-મોટી ઇજાઓ પહોંચી હતી. તેમને તાત્કાલિક સારવાર આપી સુરત પરત મોકલી દેવામાં આવ્યા હતા.
