અકસ્માત કરનાર પોલીસકર્મીની કારમાંથી બિયરની બોટલ મળી:અમદાવાદમાં કારની ટક્કરે રિક્ષા પલટતાં ચાલક બેભાન
અમદાવાદના વિશાલા સર્કલ પાસે 17 સપ્ટેમ્બરની મોડીરાતે કાર અને રિક્ષા વચ્ચે અકસ્માત સર્જાયો હતો. કારચાલકે પૂરપાટ ઝડપે આવીને રિક્ષાને ટક્કર મારી હતી, જેના કારણે રિક્ષા પલટી જતા ચાલક બેભાન થયો હતો. અકસ્માત બાદ લોકોનું ટોળું ભેગું થયું હતું અને રિક્ષાચાલકને સારવારમાં ખસેડી કારચાલકને ઝડપીને પોલીસને સોપ્યો હતો.
આ અકસ્માતમાં કારચાલક પોલીસકર્મી હોવાનું સામે આવ્યું છે. સાથે જ તેની કારમાંથી બિયરની બોટલ, વર્ધી અને કારની નંબરપ્લેટ પણ મળી આવી હતી. પોલીસકર્મી નશાની હાલમાં હોવાનો આક્ષેપ સ્થળ પર હાજર લોકોએ કર્યો છે. સમગ્ર મામલે એમ ડિવિઝન ટ્રાફિક પોલીસે ગુનો નોંધી તપાસ હાથ ધરી છે.
લોકોએ પોલીસકર્મીને પકડી પોલીસને સોંપ્યો
શહેરના વિશાલા સર્કલ પાસે સિટીગેટ બિલ્ડિંગની સામે બરફની ફેક્ટરી પાસે એક કારચાલકે પૂર ઝડપે આવીને રિક્ષાચાલકને ટક્કર મારી હતી. આ ટક્કર એટલી જોરદાર હતી કે, રિક્ષા પલટી ખાઈને પડી ગઈ હતી. આ ઘટનામાં રિક્ષાચાલક ઈજાગ્રસ્ત થઈને બેભાન થઈ ગયો હતો. બાદમાં આસપાસના લોકોએ ભેગા થઈને રિક્ષાચાલકને 108 દ્વારા સારવાર માટે સિવિલ હોસ્પિટલ મોકલ્યો હતો, જ્યારે કારચાલકને પકડીને પોલીસને સોંપવામાં આવ્યો હતો.
કારમાંથી બિયરની બોટલ, વર્દી અને નંબરપ્લેટ મળી
પોલીસ દ્વારા સ્થળ પર પહોંચીને તપાસ કરવામાં આવી હતી. તપાસ દરમિયાન અકસ્માત કરનાર પોલીસકર્મચારી પ્રકાશ રબારી હોવાનું સામે આવ્યું હતું, જે વટવા પોલીસ સ્ટેશનમાં ફરજ બજાવે છે. અકસ્માત કરનાર પોલીસકર્મચારીની ગાડીમાંથી પોલીસની વર્ધી, બિયરની બોટલ અને નંબર પ્લેટ મળી આવી હતી. પોલીસ કર્મચારી દારૂ પીધેલી હાલતમાં હોવાનું આસપાસના લોકોએ આક્ષેપ કર્યો હતો.
પોલીસકર્મી નશામાં હતો કે કેમ? એ રિપોર્ટ બાદ ખબર પડશે
હાલમાં એમ ડિવિઝન ટ્રાફિક પોલીસે સમગ્ર મામલે અકસ્માત કરનાર પોલીસકર્મચારી વિરુદ્ધ ગુનો નોંધ્યો છે. પોલીસ કર્મચારી દારૂ પીધેલી હાલતમાં હતો કે કેમ? તે મામલે પણ પોલીસ કર્મચારીનો બ્લડ રિપોર્ટ લઈને તપાસ કરવામાં આવી રહી છે. બીજી તરફ અમદાવાદમાં વધતા ગુનોઓ અને લોકોની સુરક્ષા સામે સવાલો ઊભા થયા છે, ત્યારે પોલીસકર્મીઓ નશાની હાલતમાં ઝડપાતા હોય ત્યારે કાયદો અને વ્યવસ્થા સામે અનેક સવાલો ઊઠી રહ્યાં છે.
