નવરાત્રિમાં કિંજલ દવે ચાર-ચાર બંગડીવાળું ગીત નહીં ગાઈ શકે:ગીત ગાવા પરથી પ્રતિબંધ હટ્યો
ગુજરાતીઓના પ્રિય ચાર-ચાર બંગડીવાળું ગીતના કોપીરાઇટનો મામલો હાઇકોર્ટમાં છે. નીચલી કોર્ટના ચુકાદા સામે રેડ રિબને હાઇકોર્ટમાં અપીલ કરી હતી. જેની સુનાવણી દરમિયાન હાઇકોર્ટે કિંજલ દવેના આ ગીતને જાહેર મંચ પરથી ગાવા મુદ્દે સ્ટે યથાવત્ રાખ્યો હતો. જોકે છેલ્લી સુનાવણીમાં આ સ્ટેને હટાવી લેવામાં આવ્યો હતો.
પરંતુ રેડ રિબન દ્વારા અપીલમાં જવાની તૈયારી બતાવાતા હાઈકોર્ટ સમક્ષ 8 અઠવાડિયા સુધીના સ્ટે લંબાવવાની માગ કરવામાં આવી હતી. જેથી હાઇકોર્ટે પોતાના ઓર્ડરના પર સ્ટે આપ્યો છે. જે 7 ડિસેમ્બર સુધી યથાવત્ રહેશે. આ કેસની ફાઇનલ સુનાવણી ડિસેમ્બર મહિનામાં યોજાવવાની શકયતાઓ છે. ત્યારે આગામી નવરાત્રિમાં કિંજલ દવેને કોર્ટમાંથી રાહત ના મળે ત્યાં સુધી તો આ ગીત ગાવાની શકયતાઓ નહિવત છે.
કાર્તિક પટેલનો દાવો ચાર ચાર બંગડીવાળું ગીત તેને બનાવ્યું છે
કેસને વિગતે જોતા વર્ષ 2019માં રેડ રીબન એન્ટરટેનમેન્ટ દ્વારા અમદાવાદની સિવિલ કોર્ટમાં કિંજલ દવે, RDC મીડિયા અને સરસ્વતી સ્ટુડિયો સામે સિવિલ દાવો દાખલ કરાયો હતો. આ દાવો કોપીરાઇટ એક્ટ 1957ની કલમ 55 મુજબ દાખલ કરવામાં આવ્યો હતો. કાર્તિક પટેલ મ્યુઝિક કમ્પોઝર અને ગુજરાતી વીડિયો બનાવનાર વ્યક્તિ છે. તેનો દાવો હતો કે ચાર ચાર બંગડીવાળુ ગીત તેને બનાવ્યું છે. બાદમાં કિંજલ દવેએ આ ગીત યુ ટ્યુબ ઉપર રિલીઝ કર્યું હતું. કિંજલ દવે આ ગીતની કોપી કરી હતી.
રેડ રિબને કિંજલ દવે સહિત મીડિયા કંપનીઓને આ ગીત સંબંધી તમામ પ્રવૃત્તિઓ અટકાવવા માગ કરી
અરજદાર રેડ રિબને આ કેસમાં કિંજલ દવે સહિત મીડિયા કંપનીઓને આ ગીત સંબંધી તમામ પ્રવૃત્તિઓ અટકાવવા માગ કરી હતી. તેમજ આ કેસ ફાઈલ થઈ અત્યાર સુધી કરેલી કમાણી પર 18 ટકા વ્યાજ સાથે રકમ ચૂકવવા માગ કરી હતી. કિંજલ દવે 200 સ્ટેજ પરફોર્મન્સમાં આ ગીત ગાઈ ચૂકી છે. જેથી અરજદારે થયેલ નુકસાનીની પણ માગ કરી હતી.
સિટી સિવિલ કોર્ટે 30 જાન્યુઆરી, 2024એ ગીતના કોપીરાઇટ મામલે કિંજલ દવે તરફે ચુકાદો આપ્યો હતો
જો કે અરજદાર કેસ સાબિત કરવામાં કોર્ટમાં નિષ્ફળ ગયા હતા. જેથી સિટી સિવિલ કોર્ટે 30 જાન્યુઆરી, 2024ના રોજ ગીતના કોપીરાઇટ મામલે કિંજલ દવે તરફે ચુકાદો આપ્યો હતો. પરંતુ 15 દિવસ સુધી ઓર્ડરના અમલીકરણ પર રોક લગાવી હતી. કારણ કે અરજદારે અપીલ કરવા માટે રજૂઆત કરી હતી. એટલે 14 ફેબ્રુઆરી, 2024 સુધી કિંજલ દવે આ ગીત જાહેર મંચ ઉપર ગાઈ શકી નહોતી.
