જામનગર : ધગધગતા અંગારા પર ખેલૈયાઓએ બોલાવી રાસ-ગરબાની રમઝટ, આગની જ્વાળાઓ વચ્ચે યુવાનોએ મશાલરાસ કર્યો રજૂ, આગ સાથે આદ્યશક્તિની આરાધના જોઈ લોકો મંત્રમુગ્ધ થયા
જામનગરમાં આજે પણ વિવિધ વિસ્તારોમાં પ્રાચીન-અર્વાચીન ગરબીઓ દ્વારા ર્માં આદ્યશક્તિની આરાધનાનું મહાપર્વ નવરાત્રિની ભક્તિભાવ સાથે ઉજવણી કરવામાં આવી રહી છે. ધગધગતા અંગારા પર ખુલ્લા પગે રાસ લેતા જામનગરના યુવાનો આકર્ષણનું કેન્દ્ર બન્યા છે. 72 વર્ષથી શ્રી પટેલ યુવક ગરબી મંડળ આ પરંપરા નિભાવી રહ્યું છે. આગની જ્વાળાઓ વચ્ચે યુવાનોએ મશાલરાસ રજૂ કર્યો હતો. આગ સાથે આદ્યશક્તિની આરાધના જોઈ લોકો મંત્રમુગ્ધ થયા હતા.
60 ખેલૈયાઓ ત્રણ ગ્રુપમાં રજૂ કરે છે અલગ અલગ કૃતિઓ
જામનગરમાં રણજીતનગર પટેલ યુવક મંડળ દ્વારા યોજાતી ગરબીમાં ખેલૈયાઓ દ્વારા રમવામાં આવતો અંગારા રાસ આ ગરબીની ઓળખ છે. પટેલ યુવક ગરબી મંડળ છેલ્લા સાત દાયકાથી કાર્યરત છે. જેમાં 60 ખેલૈયાઓ ત્રણ ગ્રુપમાં અલગ અલગ કૃતિઓ રજૂ કરે છે. જેમાનો આકર્ષણનુ કેન્દ્ર ધરાવતો મશાલ રાસ છેલ્લા 15 વર્ષથી યોજાઈ છે. જ્યારે 20 વર્ષથી તલવાર રાસ પણ ખેલૈયાઓ દ્વારા રજૂ કરવામાં આવે છે. બહોળી સંખ્યામાં લોકો આ રાસ નિહાળવા ઉમટી પડે છે. આ વર્ષે મસાલરાસ તેઓ સ્વાસ્તિક સાથે ત્રિશુલના આકાર પણ ગોઠવાઈ ગરબે ઘૂમી માતાજીની આરાધના કરે છે.
યુવાનો દાંતરડા, મશાલ અને તલવારથી રાસ રમે છે
જામનગરના રણજીતનગરમાં લેઉવા પટેલ સમાજના ચોકમાં છેલ્લા 72 વર્ષથી પટેલ યુવક ગરબી મંડળ દ્વારા નવરાત્રિ પર્વની ઉજવણી કરવામાં આવે છે. પટેલ યુવક ગરબી મંડળમાં યુવાનો દાંતરડા, મશાલ અને તલવારથી રાસ રમે છે. જેમાં યુવકો દ્વારા રજૂ થતો મશાલ રાસ આકર્ષણનું કેન્દ્ર બન્યો છે. આ રાસ નિહાળવો લોકોને ખૂબ પસંદ પડે એવો છે.
ગરબે ઘુમતા ખેલૈયાઓએ સૌનું મન મોહી લીધું
પટેલ યુવક ગરબી મંડળમાં યુવાનો દાંતરડા, મશાલ અને તલવારથી રાસ રમે છે. હાથમાં ખુલ્લી તલવાર સાથે શકિત અને શૌર્યના પ્રતીક સાથે ગરબે ઘુમતા ખેલૈયાઓ સૌનું મન મોહી લેતા હોય છે. 'શિવાજીના હાલરડાં' અને 'ઘડવૈયા મારે ઠાકોરજી નથી થાવું" ના ગીતો સાથે યુવાનો જોમથી તલવાર રાસ રજૂ કરતાં હોય છે. દાંતરડા, મશાલ અને તલવારથી ખેલૈયાઓ કઈ રીતે ખુમારી સાથે રમે છે રાસ તે જોવાનો રોમાંચ જ કંઈક અલગ હોય છે.
Image Gallery
