વડોદરા નેશનલ હાઈવે ફરી રક્તરંજિત થયો, આઈસરની ટક્કરથી સાઇકલચાલકનું મોત
વડોદરા જિલ્લામાંથી પસાર થતો નેશનલ હાઈવે 48 ફરી એકવાર રક્તરંજિત બન્યો છે. વડોદરા નજીક તરસાલી બાયપાસથી જાંબુઆ બ્રિજ તરફ જતા માર્ગ પર બાલાજી પેટ્રોલ પંપની સામે અકસ્માતની ઘટના બની છે. અહીં સાઇકલ સવાર 27 વર્ષીય યુવાનને પૂરપાટ ઝડપે જઈ રહેલા આઇશર ટેમ્પોના ચાલકે અડફેટે લેતા યુવાનનું ઘટના સ્થળે જ મોત નીપજ્યું હતું. આ ઘટના બાલાજી પેટ્રોલ પંપના સીસીટીવી કેમેરામાં કેદ થઈ ગઈ છે. અકસ્માતની આ ઘટનામાં લોકોની માનવતા પણ મરી પરવારી હોવાનું સામે આવ્યું છે. અકસ્માતગ્રસ્ત યુવક રસ્તા પર તડફડતો રહ્યો હોવા છતાં એકપણ વાહનચાલક તેની મદદે ન આવ્યો હોવાનું સામે આવ્યું છે.
મજૂરી કામ કરી ગુજરાન ચલાવતા યુવકનું મોત
મૃતક યુવાનનું નામ હસમુખ અને તે મજૂરી કામ કરીને પોતાનું ગુજરાન ચલાવતો હતો. તે મૂળ અરવલ્લી જિલ્લાના ખેડબ્રહ્મા તાલુકાના ઇન્દિરા નગરનો રહેવાસી હતો. છેલ્લા છ મહિનાથી તે વડોદરા શહેરમાં આવીને મજૂરી કરી રહ્યો હતો અને પરિવારનું ભરણપોષણ કરતો હતો. અકસ્માત સમયે તે સાઇકલ પર જઈ રહ્યો હતો ત્યારે પાછળથી આવતા આઇશર ટેમ્પોના ચાલકે તેને જોરદાર ટક્કર મારી હતી. આ અકસ્માતમાં યુવાનને માથા અને હાથના ભાગે ગંભીર ઇજાઓ થઈ હતી, જેના કારણે તેનું તત્કાળ મોત થયું હતું.
અનેક લોકો મદદ કરવાના બદલે જોઈને જતા રહ્યા
આ ઘટના વધુ દુખદ ત્યારે બની જ્યારે અકસ્માત પછી અડધો કલાક સુધી યુવાન જીવન અને મરણ વચ્ચે ઝઝૂમી રહ્યો હતો. આસપાસના વાહનચાલકો અને રાહદારીઓએ તેને મદદ કરવાને બદલે માત્ર જોતા રહ્યા, જે વડોદરા શહેરની માનવતાને પ્રશ્નાર્થ કરે છે. આ ઘટના માનવતા મરી પરવરી હોય તેવા દ્રશ્યોને ઉજાગર કરે છે, જ્યાં લોકો અકસ્માતના ભોગ બનેલા વ્યક્તિને તત્કાળ મદદ પહોંચાડવાને બદલે અવગણના કરી રહ્યા હતા. જોકે, ઘટનાની જાણ થતાં જ વડોદરા પોલીસનો સ્ટાફ અને 108 એમ્બ્યુલન્સની ટીમ તાત્કાલિક ઘટના સ્થળે પહોંચી ગઈ હતી. તેમણે યુવાનના મૃતદેહને પોસ્ટમોર્ટમ માટે સયાજી હોસ્પિટલમાં ખસેડ્યો હતો.
અકસ્માત સર્જનાર આઈસરચાલકની કરાઈ ધરપકડ
આ અકસ્માતમાં આરોપી ટેમ્પો ચાલકનું નામ વનરાજસિંહ પ્રતાપસિંહ ચૌહાણ છે. જે અહિમા ગામ, તાલુકો ઉમરેઠ, જિલ્લો આણંદનો રહેવાસી છે. કપૂરાઈ પોલીસે તેની ધરપકડ કરી છે. મૃતક હસમુખની બહેને આ મામલે કપૂરાઈ પોલીસ સ્ટેશનમાં આરોપી ચાલક વિરુદ્ધ ફરિયાદ નોંધાવી છે. પોલીસે અકસ્માતની તપાસ શરૂ કરી દીધી છે અને સીસીટીવી ફૂટેજને આધારે વધુ વિગતો એકત્રિત કરી રહી છે.
Image Gallery
