રાધનપુર નજીક એકસાથે પાંચ વાહનો વચ્ચે ટક્કર, 3નાં મોત:અકસ્માતમાં 15થી વધુ લોકો ઈજાગ્રસ્ત
પાટણના રાધનપુર નજીક ગમખ્વાર અકસ્માત સર્જાયો છે. એક સાથે પાંચ વાહનો વચ્ચે ટક્કર થઈ હતી. આ અકસ્માતની ઘટનામાં ત્રણ લોકોના મોત થયા છે. જ્યારે 15થી વધુ લોકો ઈજાગ્રસ્ત થયા છે. જેથી તેઓને હોસ્પિટલમાં ખસેડવામાં આવ્યાં છે. ઈજાગ્રસ્તો પૈકી 4 લોકોની હાલત ગંભીર છે.
ટ્રેલર, બે બાઈક, જીપ અને બોલેરો પિકઅપ વચ્ચે અકસ્માત
આ ઘટના અંગે મળતી માહિતી મુજબ એક ટ્રેલર, બે બાઈક, એક જીપ અને એક બોલેરો પિકઅપ વચ્ચે અકસ્માત થયો હતો. રાધનપુરના મોટી પીપળી નજીક અકસ્માત સર્જાયો હતો. પોલીસની ટીમ ઘટનાસ્થળે પહોંચી છે. હાલ ઇજાગ્રસ્તોને સારવાર અર્થે હોસ્પિટલ ખસેડી વધુ તપાસ હાથ ધરી છે. આ અકસ્માતની ઘટનાને પગલે મોટી સંખ્યામાં લોકો ઉમટી પડ્યા હતા. તમામ વાહનોમાં પણ ભારે નુકસાન પહોંચ્યું છે.
અકસ્માત અંગે સૂત્રો તરફથી મળતી માહિતી મુજબ એક સાઇડના રસ્તાનું કામ ચાલુ હતું, જેથી રસ્તો બંધ હતો. જેને પગલે એક ટ્રેલર રોંગ સાઈડમાં આવી રહ્યું હતું. આ દરમિયાન સૌ પ્રથમ ટ્રલર અને પિકઅપ ડાલા વચ્ચે ટક્કર થઈ હતી. જે બાદ પાછળ આવતી જીપ અને બે બાઈક પણ અથડાઈ હતી. જેથી ગંભીર અકસ્માત સર્જાયો હતો. જેમાં ત્રણ લોકોના મોત થયા છે. જ્યારે 15થી વધુ લોકો ઘાયલ થયા છે. જેમાંથી 4 લોકોની હાલત ગંભીર હોવાનું જાણવા મળી રહ્યું છે.
અકસ્માત ઈજાગ્રસ્ત થયેલાઓને રાધનપુરની રેફરલ હોસ્પિટલમાં ખસેડવામાં આવ્યાં હતા. જ્યા રાધનપુરના ધારાસભ્ય લવીંગજી ઠાકોર પણ પહોંચ્યા હતા.
