રતલામમાં આજે શુક્રવારના રોજ રીજનલ ઇન્ડસ્ટ્રી, સ્કિલ એન્ડ એમ્પ્લોયમેન્ટ કોન્ક્લેવ-એમપી રાઇઝ 2025 યોજાવા જઈ રહ્યું છે. સીએમના કાફલા માટે ઇન્દોરથી આવેલી 19 ઇનોવા કાર ગુરુવારે રાતે પેટ્રોલ પંપથી ડીઝલ ભરાવ્યા બાદ એક પછી એક આગળ જઈને બંધ થઈ ગઈ, જેથી હોબાળો મચી ગયો. જ્યારે વાહનોની ટાંકી ખોલીને તપાસ કરવામાં આવી ત્યારે એમાં ડીઝલની સાથે પાણી પણ મળ્યું હતું. અધિકારીઓ રાત્રે ઘટનાસ્થળે પહોંચ્યા. પેટ્રોલ પંપ સીલ કરવામાં આવ્યો. ત્યાર બાદ ઇન્દોરથી અન્ય વાહનોની વ્યવસ્થા કરવામાં આવી.

હકીકતમાં મુખ્યમંત્રી ઉપરાંત ઘણા VIP લોકો પણ આજે કોન્ક્લેવમાં હાજરી આપશે. જિલ્લા વહીવટીતંત્રના અધિકારીઓ ગુરુવારે દિવસભર આની તૈયારીમાં વ્યસ્ત રહ્યા હતા. આને ધ્યાનમાં રાખીને પોલીસે મુખ્યમંત્રીના કાફલાની ટ્રાયલ પણ હાથ ધરી હતી.

રાત્રે લગભગ 10 વાગ્યે સીએમ કારકેડની 19 ઇનોવા કાર શહેરની હદના દોસીગાંવ સ્થિત ભારત પેટ્રોલિયમના શક્તિ ફ્યૂઅલ્સ પેટ્રોલ પંપ પર ડીઝલ ભરવા માટે પહોંચી. ડીઝલ ભર્યા પછી કાર આગળ વધી, પરંતુ થોડે દૂર ગયા પછી અટકી ગઈ. કારને ધક્કો મારીને રસ્તાની બાજુમાં પાર્ક કરવી પડી.

અધિકારીઓ પહોંચ્યા, વાહનોની ટાંકી ખોલાવડાવી 

એકસાથે 19 ઇનોવા કારને નુકસાન થયું હોવાની માહિતી મળતાં જ નાયબ તહસીલદાર આશિષ ઉપાધ્યાય, ખાદ્ય અને પુરવઠા અધિકારી આનંદ ગોર અને અન્ય અધિકારીઓ ઘટનાસ્થળે પહોંચી ગયા હતા. વાહનોની ડીઝલ ટાંકી ખોલવામાં આવી હતી. જાણવા મળ્યું હતું કે જ્યારે વાહનમાં 20 લિટર ડીઝલ ભરવામાં આવ્યું ત્યારે એમાંથી 10 લિટર પાણી નીકળ્યું હતું. આ સ્થિતિ તમામ વાહનોમાં જોવા મળી હતી.

આ સમય દરમિયાન એક ટ્રકમાં લગભગ 200 લિટર ડીઝલ પણ ભરાયું હતું. એ પણ થોડીવાર ચાલ્યા પછી બંધ થઈ ગયું. ત્યાર બાદ અધિકારીઓએ ભારત પેટ્રોલિયમના એરિયા મેનેજર શ્રીધરને ફોન કર્યો. તેમણે વરસાદને કારણે ડીઝલ ટાંકીમાં પાણી લીકેજ થવાની શંકા વ્યક્ત કરી.

આ પેટ્રોલ પંપ ઇન્દોરના રહેવાસી એચઆર બુંદેલાના પતિ શક્તિના નામે છે.

વહીવટી અધિકારીઓ લગભગ 1 વાગ્યા સુધી પેટ્રોલ પંપ પર હાજર રહ્યા. વાહનોની ડીઝલ ટેન્કમાં પાણી મળતાં ખાદ્ય અને પુરવઠા વિભાગે રાત્રે જ પેટ્રોલ પંપને સીલ કરી દીધો હતો. ત્યાર બાદ ઇન્દોરથી અન્ય વાહનોની વ્યવસ્થા કરીને રતલામ મોકલવામાં આવ્યા હતા.