સાસરીયાના ત્રાસથી દીકરાની નજર સામે માતાએ ગળા ફાંસો ખાધો
દીકરાની નજર સામે માતાએ ગળા ફાંસો ખાધો વર્ષ-2021માં પૂજા પાટીલ (ઉંમર.26)ના લગ્ન જલગાવના પ્રમોદ ગોપાલભાઈ પાટીલ સાથે થયા હતા. હાલ દંપતી નોકરી અર્થે વડોદરાના ગોરવા વિસ્તારમાં રહેતું હતું. આ દરમિયાન સાસરીયા પરિણીતા પાસે દહેજની સતત માંગણીઓ કરતા હતા અને ત્રાસના કારણે પૂજા પાટીલે પોતાના ઘરમાં દીકરાની હાજરીમાં ગળા ફાંસો ખાઈને આપઘાત કર્યો હતો. ઘટનાની જાણ થતાં જ ગોરવા પોલીસે તાત્કાલિક સ્થળ પર પહોંચીને કાયદેસરની કાર્યવાહી હાથ ધરી છે અને મૃતદેહને પંચનામા બાદ પોસ્ટમોર્ટમ અર્થે ગોત્રી હોસ્પિટલ ખાતેના પોસ્ટમોર્ટમ રૂમમાં ખસેડવામાં આવ્યો છે.
'સાસરીયાઓ ઘર લેવા 10 લાખ રૂપિયાની માંગણી કરતા' મૃતક યુવતીના કાકા સતિષ પાટીલે રડતા રડતા જણાવ્યું હતું કે, હાઉસિંગ સોસાયટીમાં મારી ભત્રીજીએ સુસાઇડ કરતા તેનું મોત થયું છે. તે જલગાવની રહેવાસી છે અને મારી ભત્રીજી છેલ્લા એક વર્ષથી તેના પતિ સાથે રહેતી હતી. 5 વર્ષ પહેલા લગ્ન થયા હતા. બે-ત્રણ મહિનાથી દહેજ માટે ત્રાસ આપતા હતા અને ઘર લેવા માટે 10 લાખ રૂપિયાની માંગણી કરતા હતા.
'સાસુ-સસરા અને બે નણંદ ફોન પર ત્રાસ આપતા' તેઓએ વધુમાં જણાવ્યું હતું કે, મારી ભત્રીજી કહેતી હતી કે, પૈસા આપો નહીં તો હું સાસરીમાં જાઉં. અમે તેને સમજાવીને વડોદરા મોકલી હતી અને આગલા મહિને પૈસા આપવાની વાત કરી હતી. અમે તેને પતિ સાથે વડોદરા મોકલ્યાના 5 દિવસમાં આ ઘટના બની છે. એના સાસુ-સસરા અને બે નણંદ ફોન પર ત્રાસ આપતા હતા.
'અમારી દીકરીને ન્યાય આપો' તેઓએ ઉમેર્યુ હતું કે, મારી ભત્રીજીને 3 વર્ષનો બાળક છે, તેને કેવી રીતે રાખશે. એ કોની સાથે રહેશે. મારી ભત્રીજીને દિવાળીના સમયમાં ખૂબ ટોર્ચર કરતા હતા. એ લોકોને જનમટીપની સજા થાય એવી અમારી માંગણી છે. ગુજરાત સરકારને એટલી જ માંગણી છે કે, અમારી દીકરીને ન્યાય આપો.
Image Gallery
