એમ્બ્યુલન્સમાં આગ લાગતાં નવજાત સહિત 4 ભડથું, CCTV:મોડાસાથી સારવાર અર્થે એક દિવસના બાળકને અમદાવાદ લાવતાં અકસ્માત નડ્યો, પિતા-ડોક્ટર-નર્સનાં મોત
પ્રસૂતિ બાદ બાળકને અમદાવાદ લઈ જવાતું હતું પ્રાપ્ત પોલીસસૂત્રોની માહિતી મુજબ મહીસાગર જિલ્લાના લુણાવાડાના રહેવાસી જિજ્ઞેશભાઈ મહેશભાઈ મોચીના તાજા જન્મેલા બાળકને વધુ સારવાર માટે મોડાસાની રિચ હોસ્પિટલથી અમદાવાદની ઓરેન્જ હોસ્પિટલ ખાતે લઈ જતાં હતાં, ત્યારે આ ગોઝારી ઘટના બની હતી. એમાં એમ્બ્યુલન્સના પાછળના ભાગમાં બેઠેલા ચાર લોકો સળગી જતાં મૃત્યુ પામ્યા હતા. જ્યારે આગળની સીટમાં બેઠેલા દર્દીના કાકા અને દાદી તથા એમ્બ્યુલન્સના ડ્રાઈવર દાઝી ગયાં હતાં.
મધરાતે ચારનાં મોત, ફાયર ટીમ દોડી ગઈ પાલિકાના ફાયર અધિકારી હેમરાજ વાઘેલાએ જણાવ્યું હતું કે, રાતના 1.40 કલાકે 101 નંબર પર કોલ આવ્યો હતો કે, રાણાસૈયદ પાસે એક એમ્બ્યુલન્સમાં આગ લાગેલી છે, મોડાસા નગરપાલિકાની ફાયર વિભાગની ટીમ તાત્કાલિક ઘટનાસ્થળે પહોંચી હતી અને આગ પર કાબૂ મેળવ્યો હતો. એમાં 3 લોકોનાં મૃત્યુ થયાં હતાં, જેમાં એક ભાઈ, એક બહેન અને એક બાળક હતાં. એમ્બ્યુલન્સ ઓરેન્જ હોસ્પિટલ અમદાવાદની હોવાનું માલૂમ પડ્યું છે. જોકે ફાયર અધિકારીના નિવેદનના ગણતરીના કલાકો બાદ મૃતક નવજાત બાળકનો પિતાનું પણ મોત થયાનું સામે આવ્યું હતું.
અમદાવાદ જવા નીકળ્યાં ને વચ્ચે દુર્ઘટના બની ગોઝારી આગમાં ભાઈ અને ભત્રીજાને ગુમાવનાર અને દાઝી ગયેલા ગૌરાંગ મોચીએ જણાવ્યું હતું કે, મોડાસાથી અમે નીકળ્યા તો ઓરેન્જ હોસ્પિટલનું એડ્રેસ આપેલું હતું. અમદાવાદથી ઓરેન્જ હોસ્પિટલે એમ્બ્યુલન્સ મોકલી હતી. જેમાં અમે અહીં(મોડાસા)થી નીકળ્યાં હતાં. એ વચ્ચે આવો આગ લાગવાનો બનાવ બન્યો છે.
ઘટના અંગે વિગતે વાત કરતાં ગૌરાંગ મોચીએ કહ્યું કે, લુણાવાડાથી અમે મોડાસા જવા નીકળ્યા હતા, ત્યાંના ડોક્ટરે અમને મોડાસાનું એડ્રેસ આપ્યું કે રિય હોસ્પિટલ મોડાસા જતાં રહો, અહીં દવાખાનામાં સારવાર કરી, રિપોર્ટ કરાવ્યાં અને સાહેબે અમને એવું કહ્યું કે અમદાવાદ લઈ જાવ. અમદાવાદની ઓરેન્જ હોસ્પિટલથી ગાડી (એમ્બ્યુલન્સ) મોકલી હતી. અમે તેમાં બેસીને મોડાસાથી નીકળ્યાં હતાં રસ્તામાં આગ લાગી. તેમાં મારો ભાઈ, ડોક્ટર, નર્સ અને નાનું બાળક દાઝી ગયાં. મારી મમ્મી, ડ્રાઈવર અને હું ગાડીમાંથી નીકળી ગયાં. અમે આગળની સીટમાં બેઠેલા હતાં.
આગમાં મૃત્યુ પામેલા ચાર લોકોનાં નામ
- જિજ્ઞેશભાઈ મહેશભાઈ મોચી: (ઉં.વ. 38, રહે. લુણાવાડા, મહીસાગર) – નવજાત શિશુના પિતા.
- જિજ્ઞેશભાઈનું તાજું જન્મેલું બાળક: (ઉં.વ. 1 દિવસ).
- રાજકરણ શાંતિલાલ રેટિયા: (ઉં.વ. 30, રહે. ચાંદખેડા, અમદાવાદ) – ડોક્ટર.
- ભૂરીબેન ડો/ઓ રમણભાઈ મનાત: (ઉં.વ. 23, રહે. ઓઢા ભડવચ, અરવલ્લી) – નર્સ./
- પોલીસે ઘટનાનું પંચનામું કર્યુ નાયબ પોલીસ અધિક્ષક આર ડી ડાભીએ ઘટનાસ્થળે પહોંચતાં હતાં. તેમણે ઘટના અંગે જણાવ્યું હતું કે, ગઈકાલે રાત્રે એક વાગ્યાના સુમારે મોડાસા શહેર પાસેના રાણાસૈયદ ચોકડી નજીક પેટ્રોલપંપ સામે મોડાસાથી અમદાવાદ તરફ જતી એક એમ્બ્યુલન્સમાં અચાનક આગ લાગવાનો બનાવ બન્યો હતો. જેમાં બાળક, તેના પિતા, ડોક્ટર અને નર્સનું સ્થળ પર મોત થયું હતું. જ્યારે આગળની સાઈડમાં બેસેલા ડ્રાઈવર તથા મૃતકના ભાઈ અને માતા ગાડીમાંથી ઉતરી ગયાં હતાં અને ત્રણેયને વત્તા ઓછાઅંશે દાઝી ગયાં છે. આ ઘટનાનો મેસેજ મળતાં ડિઝાસ્ટર કંટ્રોલમાંથી પોલીસ, એમ્બ્યુલન્સ અને 108, ફાયર બ્રિગેડની ટીમો સ્થળ પર પહોંચી ગઈ હતી. આગ ઓલવવાનો પ્રયત્ન કર્યો હતો અને ઈજાગ્રસ્તોને સારવાર માટે મોકલ્યા હતાં. કમનસીબ ઘટનામાં મોતને ભેટેલાઓનું સ્થળ પર ડોક્ટર બોલાવી પીએમ કરવાની તજવીજ ચાલી રહી છે. પંચનામું કરવામાં આવ્યું છે. FSLની ટીમ બોલાવી છે, આગનું ચોક્કસ કારણ તપાસના અંતે જાણવા મળશે. ત્રણ લોકો દાઝ્યા, સારવાર હેઠળ એમ્બ્યુલન્સમાં આગ લાગતાં ડ્રાઈવરે વાહન ઊભું રાખ્યું હતું. આગળના ભાગમાં બેઠેલા ત્રણ લોકો શરીરે વત્તા-ઓછા પ્રમાણમાં દાઝી ગયા હતા, જેમને તાત્કાલિક સારવાર માટે ખસેડાયા છે. ઈજાગ્રસ્તોમાં એ ત્રણેયનો સમાવેશ થાય છે.
Image Gallery
