જેલમાંથી છૂટ્યો અને બની ગયો માસ્ટરમાઈન્ડ:BSc ગ્રેજ્યુએટે 3 કંપનીઓ બનાવી 1200 નિર્દોષ લોકોને ડેટા એન્ટ્રીના નામે છેતર્યા; લૂંટ્યા 9 કરોડ
પગાર મહિને 65,000 રૂપિયા હોય અને કંપનીમાં 20% હિસ્સેદારી સુરત સાયબર ક્રાઈમ સેલે તાજેતરમાં એક એવા હાઈ-પ્રોફાઈલ કૌભાંડનો પર્દાફાશ કર્યો છે, જેની મોડસ ઓપરેન્ડી જાણીને પોલીસ પણ ચોંકી ઉઠી છે. જે વ્યક્તિ પુણેની એક કંપનીમાં ચીફ ફાઇનાન્સ ઓફિસર જેવી જવાબદાર પોસ્ટ પર હોય, જેનો પગાર મહિને 65,000 રૂપિયા હોય અને કંપનીમાં 20% હિસ્સેદારી હોય, તે વ્યક્તિ 1200થી વધુ લોકો સાથે છેતરપિંડી કરી છે. સમગ્ર કેસમાં માસ્ટરમાઈન્ડ નિતેશ ગોવાણી છે.
1200થી વધુ નિર્દોષ લોકોને લૂંટીને 9 કરોડ ખંખેર્યા શું એક વ્યક્તિ જે બી.એસ.સી. મેથેમેટિક્સ ભણ્યો હોય, પુણેની પ્રતિષ્ઠિત કંપનીમાં ચીફ ફાઇનાન્સ ઓફિસર જેવી ઉચ્ચ પોસ્ટ પર હોય, અને મહિને 65,000 રૂપિયાનો વ્હાઈટ-કોલર પગાર મેળવતો હોય, તે ગુનેગાર હોઈ શકે? સુરત સાયબર સેલે એક એવા શતિર ભેજાબાજનો પર્દાફાશ કર્યો છે જેણે પોતાની ડિગ્રી અને કોર્પોરેટ અનુભવનો ઉપયોગ કોઈ કંપનીના વિકાસ માટે નહીં, પરંતુ 1200થી વધુ નિર્દોષ લોકોને લૂંટવા માટે કર્યો હતો. આંકડો નાનો નથી, આ વ્હાઈટ કોલર ઠગે લોકોને નોકરી અને લોનની લાલચ આપીને 9 કરોડથી વધુ રકમ ખંખેરી લીધી છે.
કોણ છે આ માસ્ટરમાઈન્ડ નિતેશ? નિતેશ ગોવાણીનું પ્રોફાઈલ જોઈને કોઈને પણ ઈર્ષ્યા આવી શકે. તેણે BSc Mathematics સુધીનો અભ્યાસ કર્યો છે. ગણિત અને આંકડાઓ પર તેની મજબૂત પકડ હતી. આ જ આવડતના જોરે તે પુણેની એક નામાંકિત પ્રાઈવેટ કંપનીમાં CFO તરીકે નોકરી કરતો હતો. માત્ર નોકરી જ નહીં, તેણે તે કંપનીમાં 20% શેર પણ ખરીદી લીધા હતા. દર મહિને તેના ખાતામાં 65,000 રૂપિયાનો પગાર જમા થતો હતો. સમાજની નજરમાં તે એક સફળ અને સુશિક્ષિત વ્યક્તિ હતો, પરંતુ તેના દિમાગમાં ગણતરીઓ કંઈક અલગ જ ચાલી રહી હતી. તેને 65 હજાર ઓછા પડતા હતા, કારણ કે તેને ટૂંકા ગાળામાં કરોડો કમાવવાની લાલસા હતી.
ડેટા એન્ટ્રીનું કામ આપવાની લાલચ આપીને ફસાવતો નિતેશનો ગુનાખોરી સાથેનો આ પહેલો પરિચય નહોતો. વર્ષ 2021માં અમદાવાદમાં ડેટા એન્ટ્રીના નામે લોકો સાથે છેતરપિંડી કરવા બદલ તેની ધરપકડ થઈ હતી. તે સમયે તે લોકોને ઘરે બેઠા ડેટા એન્ટ્રીનું કામ આપવાની લાલચ આપીને ફસાવતો અને કામમાં ભૂલ કાઢીને લીગલ નોટિસના ડર બતાવીને ખંડણી વસૂલતો. આ ગુનામાં તેણે 6 મહિના અમદાવાદની સાબરમતી જેલમાં વિતાવ્યા હતા.
જેલમાંથી બહાર આવતા તેને નવો પ્લાન બનાવ્યો સામાન્ય રીતે જેલ માણસને સુધારે છે, પરંતુ નિતેશના કિસ્સામાં જેલ તેના માટે 'ક્રાઈમ સ્કૂલ' સાબિત થઈ. જેલમાં બેસીને તેણે વિચાર્યું કે અગાઉની પકડાઈ ગયેલી ટ્રિકમાં શું ખામી હતી? તેને સમજાયું કે ડાયરેક્ટ ફ્રોડ કરવાથી પકડાઈ જવાય છે. તેથી, જેલમાંથી બહાર આવતાની સાથે જ તેણે એક નવી અને ફૂલ-પ્રૂફ યોજના બનાવી - "લીગલ દેખાવું, પણ કામ ઈલીગલ કરવું."
સુરતમાં લોસ મેકિંગ કંપની ખરીદી જેલમાંથી છૂટ્યા બાદ નિતેશે પુણેમાં CFOની નોકરી શરૂ કરી, પરંતુ તેનું મગજ જૂના ફ્રોડમાં મળતા મહિનાના 20-30 લાખ રૂપિયાને યાદ કરી રહ્યું હતું. તેણે પોતાની 'મેથેમેટિકલ' બુદ્ધિ વાપરીને એક જટિલ જાળ બિછાવી. તેને ખબર હતી કે લોકોના ખાતામાંથી પૈસા કાપવા માટે સબસ્ક્રિપ્શન મોડેલ બેસ્ટ છે, પણ તેના માટે બેંક 1 વર્ષ જૂની કંપની માગે છે. આથી તેણે સુરત આવીને સંકેત માંગરોલા નામની વ્યક્તિ પાસેથી ગ્લોબલ ઇન્ડેક્સ નામની એક લોસ મેકિંગ કંપની ખરીદી લીધી.
દુબઈમાં કંપની રજીસ્ટર કરાવી, તપાસ કરતાં તે ફક્ત કાગળ પર જ મળી ત્યારબાદ તેણે 2024માં દુબઈમાં કનેક્ટિંગ ઓલ ઇન્ડિયા નામની કંપની રજીસ્ટર કરાવી. આ કંપનીનું કોઈ અસ્તિત્વ નહોતું, કોઈ ઈન્ફ્રાસ્ટ્રક્ચર નહોતું, તે માત્ર કાગળ પર હતી. ડેટા ભેગો કરવા માટે તેણે ત્રીજી કંપની વ્હાઇટ સોલ્વર બનાવી. આ કંપની લોકોને નોકરીની ઓફર આપતી. ટાર્ગેટ શું હતો? કનેક્ટિંગ ઓલ ઇન્ડિય એપ ડાઉનલોડ કરાવો. દરેક ડાઉનલોડ પર તે 20 રૂપિયા આપતો.
લોકોને લીગલ નોટિસનો ડર બતાવીને રૂપિયા પડાવતો ગ્લોબલ ઇન્ડેક્સ મારફતે તે HR કન્સલ્ટન્સીનું કામ કરતો. નોકરી ઈચ્છુક ઉમેદવારો પાસેથી તે 'ઈ-સિગ્નેચર' કરાવી લેતો અને કરાર કરાવી લેતો. બાદમાં કરાર ભંગના બહાને અથવા કામ પૂરું ન થવાના બહાને લીગલ નોટિસનો ડર બતાવીને તે લોકો પાસેથી રૂપિયા પડાવતો.
પોલીસને થાપ આપવા આરોપીની માસ્ટર સ્ટ્રોક નિતેશ એટલો ચાલાક હતો કે તેણે તમામ દસ્તાવેજો લીગલ રાખ્યા હતા. GST, IT રિટર્ન બધું જ સમયસર ભરતો જેથી કોઈને શંકા ન જાય. સૌથી મોટી વાત એ હતી કે તેણે સુરતની કંપની ગ્લોબલ ઇન્ડેક્સ કાગળ પર સત્યેન્દ્ર પાલ નામના વ્યક્તિને વેચી દીધી હતી, જેથી ક્યારેક તપાસ થાય તો તેનું નામ રેકોર્ડ પર ન આવે. પરંતુ હકીકતમાં, બેંકના લોગિન આઈડી, પાસવર્ડ અને ઓપરેશનનો તમામ દોરીસંચાર નિતેશ પોતે જ સંભાળતો હતો.
ગણિતનો હોશિયાર વિદ્યાર્થી ગુનાની બાદબાકીમાં પકડાયો સુરત સાયબર સેલના ડીસીપી બિશાખા જૈન અને તેમની ટીમે જ્યારે કોલ સેન્ટરના રેકેટની તપાસ શરૂ કરી, ત્યારે આ જટિલ કોર્પોરેટ સ્ટ્રક્ચરની પાછળ છુપાયેલો ચહેરો સામે આવ્યો. તપાસમાં બહાર આવ્યું કે, નિતેશનો પ્લાન માત્ર પૈસા લૂંટવાનો જ નહીં, પણ ડિજિટલ ડેટા એકઠો કરી પોતાની કંપનીનું વેલ્યુએશન વધારીને મોટો નફો કરવાનો પણ હતો. આખરે ગણિતનો આ હોશિયાર વિદ્યાર્થી ગુનાની બાદબાકીમાં પકડાઈ ગયો. જેલના અનુભવ અને કોર્પોરેટ જ્ઞાનનો દુરુપયોગ કરીને તેણે 1200 લોકોની જિંદગી સાથે રમત રમી.
ખંડણી માગતો હતો સુરત સાયબર સેલના ડીસીપી બિશાખા જૈને જણાવ્યું હતું કે, પોતાની કંપની બનાવીને તે બીજી જ કંપનીની એપ ડાઉનલોડ કરાવતો હતો. વાઈટસોલ્વરમાં જોબ અપાવવા માટે તેણે ત્રીજી કંપની ઊભી કરી હતી, જે ગ્લોબલ ઇન્ડેક્સ સર્વિસીસ હતી. જે તેણે સંકેત પાસેથી ખરીદી હતી.
ડીસીપીએ વધુમાં કહ્યું કે, આ ઉપરાંત, ગ્લોબલ ઇન્ટેક્સ સર્વિસીસ તેણે આજ વર્ષમાં કોઈ ત્રીજા માણસને વેચી દીધી, જેમનું નામ સત્યેન્દ્ર પાલ છે. છતાં લોગિન, પાસવર્ડ, ઓપરેશન - એ બધું પોતે સંભાળતો હતો. ફક્ત નામ લીગલી રેકોર્ડ ઉપર નહીં આવે, આ માટે તેણે બીજાને વેચી દીધી અને ડોક્યુમેન્ટ તેના નામ પર કરાવી દીધું પરંતુ ડિરેક્ટર તરીકે તે પોતે જ સંભાળતો હતો
Image Gallery
