શું છે સમગ્ર મામલો? આ અંગે મળતી માહિતી મુજબ, ચુડા તાલુકાના જોબાળા ગામે રહેતી હેતલ જુવાલિયાને 4 વર્ષ પહેલાં ગામના અને હાલ આર્મીમાં ફરજ બજાવતા યુવાન સંજય બચુભાઈ લીંબડિયા સાથે આંખ મળી ગઈ હતી. સંજય અને યુવતી હેતલ બન્નેએ મૈત્રી કરાર કર્યા હતા. ત્રણ વર્ષ પહેલાં યુવતીએ એક પુત્રને પણ જન્મ આપ્યો હતો, જોકે આ બન્નેનાં લગ્ન યુવકનાં પરિવારજનોને મંજૂર ન હોવાથી આજથી બે વર્ષ પહેલાં યુવક સંજયે એક યુવતી સાથે લગ્ન કરી લીધા હતા.
યુવક પરિણીત હોવા છતાં યુવતી સાથે પ્રેમસંબંધ ચાલુ રાખ્યો સંજય પરિણીત હોવા છતાં ગામની જ યુવતી હેતલ સાથે તેણે પ્રેમસંબંધ ચાલુ રાખ્યો હતો. આ વાતની જાણ સંજયની પત્નીને થતાં તેણે વિરોધ કર્યો હતો, જેથી બન્ને વચ્ચે ઝઘડો પણ થયો હતો. એ બાદ સંજય અને તેની પત્નીએ છૂટાછેડા લીધા હતા.
યુવતીએ સંજયના ઘરે રહેવા જવાની જીદ કરી બીજી તરફ સંજયના છૂટાછેડા બાદ હેતલ સંજયના ઘરે રહેવા આવવાની જીદ કરતી હતી. યુવતી હેતલને બીજે ક્યાંય લગ્ન કરવા ન હતા અને સંજયે તેને સાથે રાખવાની વાત કરી હતી, પરંતુ તે આર્મીમાં ફરજ બજાવતો હોઈ, નોકરી પર જતો રહ્યો હતો. સંજયનાં પરિવારજનોને આ સંબંધ મંજૂર ન હોઈ, તેના પિતા બચુ વશરામભાઈ લીંબડિયા અવારનવાર હેતલના ઘરે આવતા હતા અને મારા દીકરાને મૂકી દે, નહિતર જાનથી મારી નાખીશ એવી ધમકી આપતા હતા.
યુવકના પિતાએ છરીના ઘા ઝીંકી યુવતીને પતાવી દીધી યુવકનાં પરિવારજનોએ હેતલને ન સ્વીકારતાં હેતલ તેની માતા સાથે જ રહેતી હતી અને રાણપુરની એક કંપનીમાં નોકરી કરતી હતી. તા. 15મીના રોજ સવારે તે નિત્યક્રમ મુજબ ટિફિન લઈને રાણપુર નોકરીએ જવા નીકળી હતી. ત્યારે ગામના બજારમાં જ યુવકના પિતાએ તેની છરીના ઘા ઝીંકીને કરપીણ હત્યા કરી નાખી હતી. આ બનાવને પગલે લીંબડી ડીવાયએસપી વી.એમ.રબારી, ચુડા ઈન્ચાર્જ પીઆઈ એન.એ. ડાભી સહિતનો પોલીસકાફલો ઝોબાળા દોડી ગયો હતો, લાશને પીએમ માટે મોકલી હત્યાની ફરિયાદ નોંધી અને આરોપીને ઝડપી લેવા તજવીજ હાથ ધરી હતી.
આરોપીએ પોલીસ સમક્ષ ગુનો કબૂલ્યો પોલીસે આ મામલે યુવક સંજયના પિતા બચુ લીબડિયાને જોબાળાની સીમમાંથી ઝડપી પાડ્યો હતો. ચુડા પોલીસે આરોપીને ઝડપી ચુડા પોલીસ સ્ટેશન લઈ જવાયો હતો. આરોપીએ પોલીસ સમક્ષ કબૂલાત કરી હતી કે હું એટલો ગુસ્સામાં હતો કે મેં યુવતી પર આડેધડ છરીના 36 ઘા ઝીંકી ગામ વચ્ચે તેનું ઢીમ ઢાળી દીધું હતું. વધુમાં મારો પુત્ર આર્મીમાં હોવાથી નોકરીએ હતો અને આ યુવતી રોજ સવારે અમારા ઘરે આવીને ઝઘડા કરતી હતી, આથી એ દિવસે મારો પિત્તો ગયો ને મેં છરીના ઉપરાછાપરી ઘા ઝીંકી તેને પતાવી દીધી હતી.
આરોપીના 7 દિવસના રિમાન્ડ મંજૂર ચુડા પોલીસે આરોપીને કોર્ટમાં રજૂ કરી 10 દિવસના રિમાન્ડ માગ્યા હતા, પરંતુ કોર્ટે 7 દિવસના રિમાન્ડ મંજૂર કર્યા છે.
આ મામલે DySPએ શું કહ્યું? આ અંગે લીંબડી DySP વિશાલ રબારીએ જણાવ્યું હતું કે ચુડા તાલુકાના ઝોબાળા ગામે એક બનાવ બન્યો હતો, જેમાં હેતલબેન ચુવાલિયાની હત્યા ગામની સ્કૂલની બાજુમાં ગલીમાં થઈ હતી. આ બેનની હત્યાના અનુસંધાને તેની માતા ગીતાબેન ભૂપતભાઇ ચુવાલિયાએ ગુનો દાખલ કરાવ્યો હતો. આ ગુનામાં એક આરોપી બચુ વશરામભાઇ લીંબડિયાનું નામ ફરિયાદી તરફથી આપવામાં આવ્યું હતું અને પોલીસ તપાસમાં પણ આ જ વ્યક્તિએ બનાવને અંજામ આપેલો હોઈ, એનું નામ ખૂલ્યું હતું.
પોલીસે વધુ તપાસ હાથ ધરી તેમણે વધુમાં જણાવ્યું હતું કે આ વ્યક્તિની તપાસ કરતાં આજુબાજુના તમામ વિસ્તારો અને અલગ અલગ પોલીસ સ્ટેશનની ટીમો બનાવીને સર્ચ કરતાં મંગળવારે સાંજના સમયે આ બચુ વશરામભાઇ લીંબડિયાની અટકાયત કરવામાં આવી હતી. અટકાયત બાદ તેની પ્રાથમિક પૂછપરછ કરી આગળ વધુમાં વધુ પુરાવાઓ એકઠા કરવા તજવીજ હાલમાં ચાલુ છે. બુધવારે આરોપી બચુને કોર્ટ સમક્ષ હાજર કરી તેના રિમાન્ડ મેળવી આગળની તપાસ હાથ ધરાશે.
